ناوەندی هەواڵ

 

ڕۆژی دووشەممە، ڕوقیە کەبیری، شاعیری ناسراو و نووسەری تەبرێز، پاش بەشداری کردن لە گردبوونەوەی ناڕەزایەتی پارێزەرانی ژینگە لە دژی وشکبوونەوەی دەریاچەی ورمێ لە بەردەم پارێزگای تەبرێز، لە کاتی پەیوەندییەکی تەلەفۆنیدا بانگهێشتی بەشی زانیاری ئەم شارە کراوە.

 

لە پەیوەندییەکی تەلەفۆنی داوای لێکرا ئەمڕۆ سێشەممە لە فەرمانگەی ڕاگەیاندنی تەبرێز ئامادەبێت.

 

ئەم نووسەرە ناسراوەی خەڵکی تەبرێز لە هەژماری خۆی لە تۆڕی کۆمەڵایەتی ئینستاگرام ڕایگەیاند کە یەکێک لەو کەسانەی ئامادەی کۆبوونەوەی پارێزەرانی ژینگەیە "پێدەچێت هێزی ئەمنی بێت" بە ئامادەبووانی وتووە، کە هەموو ئەوانەی ئامادەبوون وێنەیان گیراوە و هۆکاری بانگهێشتکردنی بۆ ئەم هۆکارە بووە.

 

لە ماوەی چەند ڕۆژی ڕابردوودا ژمارەیەک لە ژنانی تەبرێز لە کاتی ناڕەزایەتی دەربڕین بەرامبەر وشکبوونی دەریاچەی ورمێ لە بەردەم بینای بەڕێوبەرایەتی گشتی سامانە سرووشتییەکان و بەڕێوەبردنی ئاو و قایمقامیەت گردبوونەوەیەکی ناڕەزایەتییان ئەنجامدا، ژنانی ناڕازی دروشمی "بەنداوەکان بشکێنن و دەریاچەکە زیندوو بکەنەوە"یان وتەوە و خوازیاری چارەسەرکردنی دۆخی کارەساتباری ئەم دەریاچەیە بوون.

 

پێشتریش لە کاتی ڕاپەڕینی شۆڕشگێڕانەی "ژن، ژیان، ئازادی"، ڕوقیە کەبیری لە هەژماری خۆی لە تۆڕی کۆمەڵایەتی ئینستاگرام ڕایگەیاند: "وەک نووسەری ٢٠ ناونیشانی چیرۆک، ڕۆمان و شیعر و سەفەرنامە بە زمانی دایکم (تورکی ئازەری) لە ناڕەزایەتییەک بەرامبەر بە سانسۆری هەواڵ، سەرکوتکردنی توندوتیژانەی داواکارییە مەدەنییەکانی منداڵانی نیشتمانەکەم لە سەرتاسەری وڵات و زانکۆی تەبرێز، ڕایدەگەیەنم کە هیچ کتێبێک بە سەرپەرشتی وردبینی وەزارەتی ئیرشاد چاپ ناکەم."

 

ئەم شاعیر و نووسەرە بەناوبانگە لە کاتی ناڕەزایەتییەکانی ساڵی ٢٠١٩ یەکێک بوو لە براوەکانی "کورتە چیرۆک بۆ خۆگونجاندن"، بەهۆی گیانلەدەستدانی ژمارەیەک خۆپیشاندەر ئامادە نەبوو خەڵاتەکەی وەربگرێت.