ناوەندی هەواڵ

 

لە سێهەمین ڕۆژی دەستبەسەر کردنی ژمارەیەک لە ئەندامانی بنەماڵەی قوربانیانی شاری سنە، دێهگۆلان و دیواندەرە لە کاتی گەڕانەوەیان لە سەقز، دایکانی شۆڕش ئاگادارییەکیان بڵاوکردەوە و خوازیاری ئازادکردنی دەستبەسەرکراوان بوون.

 

دەقی ئاگادارییەکە بەم شێوەیەیە:

ڕێکخراوەکانی مافی مرۆڤ، خەڵکی بەڕێزی کوردستان و ئازادیخوازانی ئێران.

 

ڕۆژی هەینی، بنەماڵەی قوربانیانی شاری سنە، دێهگۆلان و دیواندەرە بە مەبەستی ڕێزگرتن لە ڕۆژی لە دایکبوونی شەهیدی هەرزەکار دانیال پابەندی و دیدار لەگەڵ بنەماڵەی دیکەی قوربانییەکان، بەرەو سەقز و پاشان بۆ بۆکان سەفەریان کرد.

 

بەڵام بەداخەوە دوای گەڕانەوەی ئەو ئۆتۆمبێلەی کە باوک و دایکی کوژراوەکەی هەڵگرتبوو، لەلایەن هێزەکانی ڕێکخراوی ئیتلاعاتەوە ڕاگیرا و ڕفێندرا و گواسترایەوە بۆ ئیدارەی ئیتلاعات بۆ لێپرسینەوە.

 

شایانی باسە لەکاتی هاتنی هێزە سەرکوتکەرەکانی ڕژێم، چوارچێوەی وێنەی کوژراوەکەیان شکاندووە و لە هەندێک گەنجیان داوە، بە بێ ڕێزییەکی تەواو مامەڵەیان لەگەڵ دەکەن و دوای لێپرسینەوە لەگەڵ دایک و خوشکی مردووەکە، کاتژمێر ٣ی بەیانی لەسەر شەقام بەجێیان دەهێڵن بەبێ ئەوەی ئۆتۆمبێلە کرێکانیان بۆ بگەڕێننەوە.

 

ئێمە وەک چالاکانی سیاسی و مەدەنی بەتوندی ئەم هەڵسوکەوتەی هێزە ئیتلاعاتییەکان شەرمەزار دەکەین و داوای ئازادکردنی دەستبەجێی باوک و برایانی کۆچکردوو دەکەین.

 

لەمبارەیەوە داوا لە هەموو خەڵکی کوردستان بە گشتی و چالاکانی مافی مرۆڤ و کۆمەڵگەی مەدەنی بەتایبەتی دەکەین کە پاڵپشتی کەسوکاری کۆچکردوو و ئەم ڕاگەیاندنە بن و هاوکارمان بن بۆ ئەوەی بە زووترین کات ئەو ئازیزانە بگەڕێنینەوە بۆ ناو کەسوکارەکانیان.

 

پێویستە ئاماژە بەوە بکرێت کە کەسوکاری کوژراوەکە هیچ تاوانێکیان ئەنجام نەداوە، بەڵکو تەنها لە شارەکانی تر سەردانی کەسوکاری کوژراوەکەیان کردووە و ئەمەش مافی سروشتی خۆیانە.

 

لە ڕاستیدا تاوانباری سەرەکی خودی هێزەکانی ڕژێمن کە دەستیان لە ڕشتنی خوێنی منداڵەکانماندا تێوەگلاوە و ئێستاش بۆ بێدەنگکردنی بنەماڵە خەمبارەکە کارێکی وەها شەرمەزارکەریان ئەنجامداوە.