BAHARAN LEHÎB

Kabul - Li Afganistanê piştî ku Talîbanê rêveberiya welat bi dest xist, zextên li ser jinên Afganî zêdetir bûn. Careke din em li Afganistanê rastî cinayetên jinên ku ji ber xizanî, gerdelî û zewaca bi darê zorê ber bi xwekuştinê ve çûne yan jî ji aliyê Talîbanê ve hatine qetilkirin hatin.

9 jin hatin qetilkirin

Li gor agahiyên hatine bidest xistin jinên ku hatine qetilkirin an jî ber bi xwkuştinê ve hatine birin wiha ne:

-Di 1'ê Nîsanê de jinek li navçeya Daikundî ji ber nebûna dibistanê ber bi xwe kuştinê ve hat birin û jiyana xwe ji dest da.

-Di 22’ê Adarê de li navçeya Sorxrud a Nangarharê jinek ji aliyê mêrê ku pê re zewicî bû hat qetilkirin. Di encama gulebaranê de du kur û keçek wê birîndar bûn.

-Di 4’ê Nîsanê de, Fehîma ya 15 salî li navçeya Kohistanat a Ser-Pulê ji ber zewicandina ber bi xwe kuştinê ve hat birin û dawî li jiyana xwe anî.

-Di 5'ê Nîsanê de li taxa yekem a bajarê Kandaharê jinek ciwan ji aliyê mêrê ku pê re zewicî bû Waheed ve hat qetilkirin.

-Di 5’ê Nîsanê de, li navçeya Hesarak a Nangarharê zarokek 18 salî bi teqîna guleyek jiyana xwe ji dest da û zarokek din ê 16 salî birîndar bû.

-Di 7’ê Nîsanê de, cenazeyê jineke 22 salî ya ku diyar bû çend roj berê hatiye gulebarankirin, ji bîreke avê ya bajarê Nemrozê, hat derxistin.

-Di 7’ê Nîsanê de, li Taxa Yakwa Valang a Bamiyanê jinek ji aliyê kurê xwe ve bi recimkirinê hat qetilkirin.

-Di 14’ê Nîsanê de, Dr. Zakarî ya 27 salî ku heft mehî ducanî bû, dema diçû nexweşxaneya bajarê Texarê ji aliyê Talîbanê ve hat qetilkirin.

-Di 19’ê Nîsanê de, jineke 25 salî li navçeya Raghistan a Bedaxşanê ji aliyê Talîbanê ve hat qetilkirin.