ناوەندی هەواڵ

 

بەپێی گرتەیەکی ڤیدیۆیی کە لە تۆڕە کۆمەڵایەتییەکان بڵاوکراوەتەوە، بەنداوی فریمان لە پارێزگای خوراسانی ڕەزەوی وشک بووەتەوە، لەگەڵ وشکبوونی ئەم بەنداوە، کە یەکێکە لە شوێنە گەشتیارییەکانی ناوچەکە و ڕۆڵێکی گرنگی هەبووە لە دابینکردنی ئاو بۆ زەوییە کشتوکاڵییەکانی گوندەکانی دەوروبەری، خەڵک ڕووبەڕووی کێشەی دابینکردنی ئاوی خواردنەوە و کشتوکاڵ بوونەتەوە.

 

ماوەیەک بەر لە ئێستا، بەڕێوەبەری کارپێکردن و چاککردنەوەی دامەزراوەکانی ئاوی کۆمپانیای ئاوی ناوچەی خوراسان، ڕەزەوی، ڕایگەیاند کە یەدەگی خەزنەی بەنداوی فریمان کەمترە لە ٪١٩، وتیشی، کە وشکەساڵی و نەبوونی ئاو وایکردووە بەنداوی فریمان لە ماوەی ئەم ساڵانەی کۆتاییدا لە خراپترین بارودۆخدا بێت.

 

بەنداوی مێژوویی فریمان لەسەر ڕووباری فریمان بە دووری نزیکەی ١١ کیلۆمەتر دروستکراوە و ڕۆڵێکی گرنگ بۆ ئاودێری ١٠ هەزار جووتیار دەگێڕێت، بەڵام جگە لە گەرمبوونی هەوا و کەمبوونەوەی بەرچاوی ڕێژەی بارانبارین، خراپ بەڕێوەبردنی کاربەدەستان لە پلاندانان بۆ بەکارهێنانی ئاو، یەکێک لە هۆکارەکانی وشکبوونەوەی بەنداوەکان و کەمبوونەوەی یەدەگی ئاو لە ئێراندایە.