Silêmanî – Îro 19’ê Tîrmehê ye salvegera 14’emîn a Şoreşa Rojavayê Kurdistanê ye. Çirûska yekem li bajarê Kobanê bi pêşengiya jin, ciwan û gelê ku baweriya wî bi azadî û serfiraziyê heye pêket. Wek îro li Kobanê ala destpotiyê hat rûxandin û ala azadiya gelan li asîmanê Rojavayê Kurdistanê biriqî.

Bi vê boneyê li Silêmaniyê, bi amadebûna partî û çalakvanên siyasî yên bajêr, çalakiyeke bîranînê hat organîzekirin. Tê de têkoşîn û destkeftiyên gelê Kurd li Rojavayê Kurdistanê û hêza jinan di serkeftinan de hatin nîqaşkirin.

‘19’ê Tîrmehê rûmeta gelê Kurd di Sûriyeya nû de ye parast’

Endama Meclîsa Partiya Yekîtiya Demokratîk (PYD) Bêrîvan Mihemmed a başûrê Kurdistanê, diyar kir ku nasnameya gelê Kurd 14 sal berê ji aliyê jinan û Kurdên Rojavayê Kurdistanê ve di 19’ê Tîrmehê de hat parastin. Bêrîvan Mihemmed got: “Wekî  gelê Kurd nehatibûn naskirin lê piştî şoreşa 19’ê Tîrmehê ku Rojavayê Kurdistanê çirûska destpêkê pêket. Her wiha gelê Kurd hebûna xwe îsbat kirin û dikaribûn wekî Kurd bijîn. Ev gel dikaribû jiyana xwe li ser bingeha neteweyeke demokratîk dest pê bike. Dîsa yek ji destkeftiyên herî mezin jî naskirina zimanê Kurdî û axaftina bi zimanê dayîkê ye.”

‘19’ê Tîrmehê dîroka mezin a gelê Kurd e’

Sîwe Sêrwan, Seroka Ragihandinê ya Navenda Metro got: “Îro salvegera 14’emîna a Şoreşa Rojavayê Kurdistanê ye. Komek endamên Navenda Metroyê ji bo piştgiriya destkeftiyên şoreşê wan serdana Rêveberiya Xweser kir.”

Sêwe Sêrwan got: “19’ê Tîrmehê ji bo Kurdên Rojavayê Kurdistanê destkeftiyek girîng e. Em her dem piştgiriya xwe ji bo Rojavayê Kurdistanê dubare dikin.”