سوەیدا - ژنانی شاری سوەیدای سووریا ناڕەزایی خۆیان لە پێکهاتەی کابینەی نوێی حکومەتی سووریا دەربڕی و پێیان وایە دابەشکردنی پۆستە وەزارەتییەکان دەبێت ڕەنگدانەوەی واقیعی کۆمەڵایەتی و سیاسی وڵات بێت. بەڵام لە کۆی ٢٣ وەزارەت تەنها ژنێک وەک وەزیر دەستنیشان کراوە، ئەمەش ڕەنگدانەوەی بەردەوامی پەراوێزخستنی ژنان و ڕەخنەی بەربڵاوە لە نەبوونی نوێنەرایەتی ژنان لە ناوەندەکانی بڕیاردان.

 

ئێنساف عەبدولباقی، مامۆستای خانەنشینکراو و ئەندامی پێشووی ئەنجومەنی شارەوانی سوەیدا و یەکێتی ژنان، هۆکاری پەراوێزخستنی ژنانی بەم شێوەیە خستە ژێر پرسیارەوە و ئاماژەی بەوەدا کە پێدانی ژنان تەنها وەزارەتی کاروباری کۆمەڵایەتی و کار، ڕەنگدانەوەی تێڕوانینێکی تەقلیدییە بۆ ڕۆڵی ئەوان؛ چونکە ژنان تەنها لە کەرتە کۆمەڵایەتییەکان سنووردار دەکرێن و لەبری ئەوەی لە وەزارەتە گرنگەکان یان هەستیارەکاندا دەسەڵاتیان پێبدرێت، لە پەراوێزدا دەمێننەوە.

 

ئاماژەی بەوەشکرد: ژن نیوەی کۆمەڵگایە، ئەو کەسەیە نیوەکەی تر پەروەردە دەکات. بۆچی دەرفەتی پێنادرێت تواناکانی خۆی لە هەموو بوارەکاندا بسەلمێنێت؟ ژنانی سووریا سەلماندوویانە کە توانای تەحەدا و بەرەنگاربوونەوەیان هەیە، ئەگەریش لەدوای پیاوێکەوە بجوڵێت ئەوە بابەتی کەرامەتە نەک لاوازی، بەڵام ئەمە بەو مانایە نییە کە ئێمە پەراوێزی بخەین و لە بڕیاردان دووری بخەینەوە".

 

ئێنساف عەبدولباقی جەختی لەوە کردەوە کە سەرکەوتنی هەر حکومەتێک پێویستی بە نوێنەرایەتییەکی دادپەروەرانەی ژنان هەیە، بەتایبەتی دوای ڕۆڵی دیاریان لە ناڕەزایەتی و بزووتنەوە مەدەنییەکان لە سوەیدا و سەرتاسەری سووریا.

 

هەروەها جەختی لەوە کردەوە کە پێویستە ژنان لە پۆستە سەرکردایەتییەکاندا لە دامودەزگا و وەزارەتەکانی حکومی جیاوازدا ئامادە بن، وەک بەدرێژایی مێژوو نیشانیانداوە کە توانای بەڕێوەبردن و هەڵگرتنی بەرپرسیارێتییان هەیە.

ئیلهام حەمەد لە ڕوانگەی چالاکوانێکی سیاسییەوە، کە بەشداری لە بزووتنەوە جەماوەرییەکانی سوەیدادا کرد، وتی: ئێمە بۆ ئازادی و یەکسانی لەگەڵ پیاوان هاتینە دەرەوە و دوای ئەو هەموو تێکۆشانە، لە حکومەتی نوێدا بە دانانی تەنها یەک وەزیری ژن پەراوێزخراوین، لە کاتێکدا ٢٢ پۆستی وەزیری بۆ پیاوان تەرخان کراوە. "ئەمە بە تەواوی پێچەوانەی ئەو داواکاریانەیە کە لە ساڵانی ڕابردوودا کردوومانە و ئەوە نیشان دەدات کە یەکسانی جێندەری هێشتا تەنها قسەیەکی بەتاڵە."

 

ئەو پێی وایە حکوومەتی کاتی بەڵێنەکانی پێشووی جێبەجێ نەکردووە کە ٣٠%ی پۆستەکان بۆ ژنان تەرخان بکات، ئاماژە بەوە دەکات کە پێکهاتەی حکومەت دەبێت ڕەنگدانەوەی فرەچەشنی کۆمەڵگەی سووریا بێت لەگەڵ هەموو پێکهاتەکانی، نەک تەنها لە گروپە دیاریکراوەکاندا سنووردار بێت.

 

ئیلهام حەمەد هەروەها جەختی لە دژایەتی خۆی بۆ پەراوێزخستنی سیاسی و جوگرافی لە پێکهاتەی کابینەی حکومەتدا کردەوە و ڕایگەیاند، سووریا پێویستی بە حکومەتێک هەیە کە نوێنەرایەتی هەموو هاوڵاتیانی بکات، بەبێ هیچ جیاکارییەک لەسەر بنەمای ڕەگەزی یان پەیوەندی سیاسی یان ناوچەیی.