کابول- لە ١٥ی ئابی ٢٠٢١، تاڵیبان کۆنترۆڵی ئەفغانستانی کرد، بەپێی ئەو پلانەی کە لەلایەن ئەمریکا و ناتۆوە داڕێژراوە، ئەمڕۆش دووەمین ساڵیادی کۆنترۆڵکردنی ئەفغانستانە، دوو ساڵی ترسناک تێپەڕی کە تاڵیبان قێزەونترین پێشێلکاری دژ بە ژنان ئەنجام داوە، مێژووی کۆنترۆڵ ڕووخانی دوایین نیشانەکانی ئازادی و مرۆڤایەتی بووە، کە تیایدا خوێندکارانی  کچ لە خوێندن بێبەش کراون و سەرەتاییترین مافەکانیان لێ قەدەغەکراوە.

ژنان و چالاکوانانی ئەفغانی ڕۆژی دووشەممە ١٤ی ئاب، لە دووەمین ساڵیادی داگیرکردنی تاڵیباندا، ڕێپێوانێکی ناڕەزاییان لە کابول ئەنجامدا.

لە میانەی ڕێپێوانەکەدا خۆپیشاندەران ڕێککەوتنەکەی نێوان ئەمریکا و تاڵیبانیان شەرمەزار کرد و نووسراوی "ژن، ژیان، ئازادی" و "نە ئەمریکا، نە تاڵیبان، دەسەڵات لە دەستی گەلدایە" بەرزکردەوە.

لە بەیاننامەیەکدا هاتووە کە لە ڕۆشنایی ئەم پێشێلکارییانە و کردەوە خنکێنەرەکانی سەر ژنان، ژنان دەنگی خۆیان بەرزدەکەنەوە و تێکۆشان دەکەن بۆ گەڕاندنەوەی مافەکانیان، لە کاتێکدا ئەو ژنانەی کە ڕێپێوانی خۆپیشاندانیان ڕێکخست بەڵێنیان داوە بەردەوام بن لە خەبات و تێکۆشان دژی تاڵیبان و داوایان لە ژنان لە سەرانسەری جیهاندا کرد دژی ستەمکاری و چەوساندنەوە بوەستن.