ناوەندی هەواڵ

 

٢ی تەمموز، وەزارەتی فەرمان بە چاکە و قەدەغەکردنی خراپەی تاڵیبان نامەیەکی لە میدیاکانی ئەفغانستان بڵاوکردەوە، کە واژۆی هەیبەتوڵا ئاخوندزادە، ڕێبەری توندڕەوی تاڵیبانی لەسەرە و بۆ هەموو ئارایشتگاکانی ژنان نێردراوە، تیایدا وادەی دیاری کردووە بۆ کۆتایی هێنان بە کارەکانیان و هەڵوەشاندنەوەی سەرجەم مۆڵەت و گرێبەستی ئارایشتگای ژنان.

 

ئیدارەی تاڵیبان داوای لە شارەوانی پارێزگای کابول کردووە ئەم نامەیە لە ٣٤ ناوچەی ئەو وڵاتە بڵاو بکاتەوە و دڵنیابێت لە جێبەجێکردنی.

 

دوای ئەوەی تاڵیبان لە نزیکەی دوو ساڵ لەمەوبەرەوە دەستی بەسەر ئەفغانستاندا گرت، کۆت و بەندی جۆراوجۆر بەسەر ژناندا سەپێنراوە و دوای داخستنی قوتابخانە و زانکۆکان و دەرکردنی کارمەندی ژن لە سەرجەم فەرمانگە حکومی و ناحکومییەکان، زۆربەی ژنان ڕوویان لە ئارایشت و بەرگدروو کردووە بۆ پاڵپشتیکردن، بەڵام تاڵیبان ئەم هیوایەی لێ سەندنەوە.