HESNA MIHEMED

Şehba- Ji 4'ê Cotmehê ve dewleta tirk a dagirker û komên çete yên girêdayî wî ve êrîşên xwe li ser herêmên Bakur û Rojhilatê Sûriyê berfirehtir kirine, di encama van êrîşan de 2 zarok û 48 kes jiyana xwe ji destan û gelek kes jî birêndar bûn, her wiha binsaziya herêmê di van êrîşan de hatin hedefgirtin.

Li Şehbayê êriş û rêgirî

Li kêlek êrîşên ku li ser herêmê pêk tên Hikumeta Şamê li ser kantona Şehba Bakur û Rojhilatê Sûriyê rêgiriya xwe dijwartir kiriye û pêdîviyên jiyanî derbasî herêmê nake. Li hember van siyasetên tunekirinê jinên Efrînê yên koçber û li wargeha Berxwedan dijîn nameya xwe ya berxwedan û têkoşînê ji ajansa me re parve kirin.

Nisrîn Horo bal kişand ser zehmetiyên ku di nava êrîş û dorpêçê de dijîn û wiha vegot: "Em zehmetiyên gelek dijwar dijîn. Aliyekê dewleta tirk a dagirker êrîşî me dike aliyê din jî Hikumeta Şamê dorpêça xwe ser me zêdetir dike. Bi balafiran êrîş dike û dixweze berxwedan û îradeya me biçewsîne. Rewşa wargehan cudatirin ger êrîş bike wê hemû kamp bê hilweşandin ji ber çadirin û nêzî hevdu ne. Erdoxan hemû qanûn û sînorên exlaqî derbas dike û hesab ji kesekî re nake û bi çekên qedexekirî êrîşên xwe pêk tîne. Li kêlek wê dorpêç jî ser me girantir dibe bi taybet em ber bi zivistanê ve nêz dibin nahêlin mazot û pêdîviyên gel derbasî herêmê bibin. Hemû dewlet li dijî Kurdan hevkarin û dixwazin îradeya me bidin çewisandin. Li dijî vê hevkarê em ê bibin yek û berxwedana xwe bilind bikin, em ê bi vîna xwe li dijî balafirên dagirkeran bi îsrar bisekinin."

'Berxwedana me ji dorpêç û êrîşên dagirkeran mezintir e'

Zozan Ebdo jî tekes kir ku êrîşên dagirkeiryê xeteriyekê bi xwe re ava dike, lê tu carî neghînin armancên xwe û got: "Nêzî 6 sal in em li kampê li dijî her cureyên zehmetiyan berxwedana xwe bilind bi îsrar didomînin. Em di gelek zehmetî û astengiyan re derbas dibin, Hikumeta Şamê jî gelek pêdîviyên jiyanî ser me qutkiriye zivistan û havînê em zehmetiyan dibînin dîsa berxwedana me ji dorpêç û êrîşên dagirkeran mezintir e. Dewleta tirk bi balafir û êrîşên xwe tu carî nikare ji vîna me bişkîne."

'Li dijî êrîşan em ê serî hildin'

Heyat Birîm êrîşên dagirkeriya dewleta tirk û dorpêça Hikumeta Şamê şermezarkir û wiha pê de çû: "Berxwedana me li wargehên koçberiyê bû 6 sal bê navber û westandin berdewam dike. Di nava van salan de rojane dewleta tirk bi êrîşên xwe dixwaze em berxwedana xwe bisekinînin û teslîmkariyê qebûl bikin. di van demên dawî de Erdoxan êrîşên xwe zêdetir kiriye ji Şehba heya Dêrîkê bigire. Bi êrîşên xwe dixwaze yekbûna li Bakur û Rojhilatê Sûriyê tê jiyankirin bin pêk bike. Em ê tu carî nehêlin dijmin bighîne armancên xwe. Em tune û qir nabin li hember her cureyê qirkirinê em ê serî hildin. Li kêlek wê dorpêçkirin jî avêtine ser me. Bersiva me ji dijmin re ku em ê her tim di çalakî û kolanan de bin û li dijî êrîşan ser piya bin. Em ê serî hildin û jiyanek bi rûmet bijîn, dûrî koletî û bindestiyê ve."