ناوەندی هەواڵ

 

ئاگربەستی مرۆیی ٧ ڕۆژەی نێوان ئیسرائیل و حەماس لە کەرتی غەززە بەبێ ڕاگەیاندنی درێژکردنەوەی ئاگربەستەکە کۆتایی هات و سوپای ئیسرائیل بەیانی ئەمڕۆ دەستی بە ئۆپەراسیۆنەکان کردەوە.

 

دوای درێژکردنەوەی ئاگربەستی مرۆیی لە کەرتی غەززە بۆ ڕۆژێکی دیکە، حەماس ٦ زیندانی ئازاد کرد، دوای ئازادکردنی دوو ژن و چەند کاتژمێرێک پێش کۆتایی هاتنی ئاگربەستەکە، ئیسرائیل ٣٠ زیندانی فەڵەستینی کە ٢٣ منداڵ و ٧ ژن بوون لە زیندانەکانی ئازاد کرد.

 

دوای ئەوەی ئاگربەستە کاتییەکەی نێوان هەردوولا بەبێ ڕاگەیاندنی درێژکردنەوە کۆتایی هات، سوپای ئیسرائیل ڕایگەیاند حەماس ئاگربەستەکەی پێشێلکردووە و دوێنێ موشەکێکی هەڵداوە بەرەو خاکی ئیسرائیل و دەستپێکردنەوەی ئۆپەراسیۆنەکانی ڕاگەیاند و فڕۆکە جەنگییەکانی دەستیان کرد بە هێرشکردن بۆ سەر هەموو ناوچەکانی کەرتی غەززە.

 

نزیک نەخۆشخانەو کامپەکان کرانە ئامانج

هەروەها دوای کۆتایی هاتنی ئاگربەستەکە تۆپخانە و فڕۆکە جەنگییەکانی ئیسرائیل چەندین هێرشیان کردە سەر ناوچە جیاوازەکانی کەرتی غەززە و پێکدادانی توندوتیژی لەنێوان فەڵەستینییەکان و سوپای ئیسرائیل لە چەند ناوچەیەکی باکوور و ناوەندی کەرتی غەززە ڕوویدا، هەروەها نزیک نەخۆشخانەی ناسر لە خان یونس، کامپی پەنابەرانی یابنا، جەبالیا، شاری غەززە، ناوچەی ئەبو ئیسکەندەر، پارێزگای ناوەندی، خان یونس و شارۆچکەی عەباسان کرانە ئامانج.

 

میدیاکان ئاماژەیان بەوەکرد، بەیانی ئەمڕۆ تۆپبارانەکە چەند ماڵێکی نیشتەجێی کردە ئامانج و ژمارەیەک کەسی کوشت و بریندارکرد، ١١ کەس کە ژن و منداڵیان تیدایە، لە هێرشێکی ئیسرائیلدا لە ناوەندی ڕەفەح و ناوچەکانی مەغازی لە باشووری کەرتی غەززە گیانیان لەدەستدا.