ناوەندی هەواڵ

 

نێرگس محەممەدی، چالاکوانی مافی مرۆڤ کە لە زیندانی ئەڤین زیندانی کراوە، لە نامەیەکدا تێکچوونی بارودۆخی ناهید تەقاوی بڵاوکردووەتەوە کە هاوڵاتی خاوەنی هەردوو ڕەگەزنامەی ئێرانی-ئەڵمانی و زیندانیکراوی زیندانی ئەڤینە.

 

نووسیویەتی: ئەمە دووەم جارە ناهید تەقاوی تەمەن ٦٨ ساڵ لە دۆخێکی وادا دەبینم، ئەوەندە ئازاری هەیە کە بە ڕوونی ئازارەکانی سەر ڕووخساری دەبینرێت، بەزەحمەت لە جێگاکەی هەڵدەستێت و دەچێتە نەخۆشخانە و دەرزی ئازارشکێنێکی بەهێزی بۆ دەکرێت و دەگەڕێتەوە سەر جێگاکەی.

 

لەم نامەیەدا نێرگس محەمەدی باسی لەوە کردووە کە نەخۆشی و ئازارەکانی ناهید تەقاوی دەرئەنجامی ٢٢٠ ڕۆژ زیندانی تاکەکەسییە، لەو ماوەیەدا تەنها بە سێ بەتانی "یەکێکیان لەژێر سەری، یەکێکیان لەژێر لەشیدا و یەکێکیان لەسەر دەموچاوی ژیاوە" لە ژینگەیەکدا کە ڕووناکی و هەوای پێویستی تێدانیە.

 

لە ساڵی ٢٠٢٠ ناهید تەقاوی لە ماڵەکەی خۆی لە تاران لە لایەن هێزە ئەمنییەکانەوە دەسبەسەرکرا و لە یەکێک لە شانە تاکەکەسییەکانی ئیتلاعاتی سوپای پاسدارانی ئێران ناسراو بە بەندی دووی ئەی زیندانی ئەڤین لێکۆڵینەوەی لەگەڵ کرا و دوای ٥ مانگ لێپرسینەوەی لەگەڵ کرا دواتر بۆ بەشی ژنانی زیندانی ئەڤین گواسترایەوە.

 

ناوبراو کە تووشی دیسکی کەمەر بووە، هەروەها دوای زیندانیکردنی تاکەکەسی تووشی دیسکی مل و شەکرە و بەرزبوونەوەی پەستانی خوێن بووە و لە خزمەتگوزاری پزیشکی بێبەش بووە.