Navenda Nûçeyan- Li Îranê ku nêzî 61 milyon hilbijêr lê hene, ji bo hilbijartina 290 parlementerên ku dê 4 salan di yek dewrê de bixebitin, sindoqên dengdanê li pêş gel hatin danîn. Herwiha dengdêr dê bi dengdanê 88 endamên Parlamentoya Pisporê ku erkê danîn û dûrxistina rêberê olî ye ji bo heyama 8 salan hilbijêrin. Li Îranê ku çend roj berê banga boykotê dihat kirin, xwediyê Xelata Nobelê ya Aştiyê û çalakvana girtî ya Îranê Nergis Muhammedî jî bang li raya giştî kir ku boykot bike.

 Rojnameger hatin astengkirin

Rojnamevanekî li Urmiyê diyar kir ku tevî ku nasnameyên wan ên çapemeniyê hebûn jî, ji bo şopandina hilbijartinan rê li ber wan hatiye girtin, ji aliyê parêzgariyê ve ji wan hatiye xwestin ku akredîtasyona wan bê dayîn û bi destûra ku ji wan re hatiye dayîn jî, nahêlin ku navendên hilbijartinê bibînin.. Rojnameger diyar kir ku heta nûçegihanê IRNAyê ku yek ji mezintirîn ajansên nûçeyan e li welêt jî hatiye astengkirin û ji cihê hilbijartinê hatiye dûrxistin.

Bangên boykotê tên şopandin

Rojnameger diyar kir ku piraniya raya giştî bangên boykotê dişopînin û got ku li gelek navendên hilbijartinê yên ku serdana wan kiriye rêjeya dengdanê gelekî kêm bûye. Rojnameger çavdêriyên xwe yên der barê navendeke hilbijartinê de ku dengdêrên Besîc ên alîgirê dewletê lê amade bûn, parve kir û diyar kir ku wî dîtiye ku gelek kêm kes li wir deng dane.

Rêjeya beşdarbûnê kêm e

Rojnameger diyar kir ku her çend di hilbijartinên berê de rêjeya beşdariyê gelekî kêm bû jî, mudaxele li encaman hat kirin jî, ji bo hilbijartinên îro bên kirin dê manîpulasyonek zêdetir were kirin û ji ber boykotê jixwe hewl hat dayîn ku were nîşandan. Li ser kaxezê rêjeya beşdariyê ji hilbijartinên berê baştir bû û hem rêjeya beşdariyê û hem jî raya giştî bilind bû û diyar kir ku encamên wê hatine amade kirin ku hin ji wan piştgiriya hikûmeta niha dikin.

Di hilbijartinên parlementoyê yên sala 2020’an de 57 milyon û 718 hezar û 159 hilbijêran mafê dengdanê hebû û ji sedî 42 yê hilbijêran çûn ser sindoqan. Ev rêjeya beşdariyê wek kêmtirîn rêjeya beşdariyê di hilbijartinên piştî şoreşa Îranê ya sala 1979an de hat tomarkirin.