ناوەندی هەواڵ

 

لە یەکەمین ساڵیادی شەهیدبوونیان، خەباتکارانی ڕاگەیاندنی ئازاد لە باشووری کوردستان، بە بەیاننامەیەک یادی شەهیدانی ڕاگەیاندنی ئازاد "جیهان بیلگین و نازم داشتان"یان کردەوە، کە لە کاتی ڕووماڵی ڕۆژنامەوانیی بەرخۆدانی گەل و شەڕڤانان لە نزیکی بەنداوی تشرینی ڕۆژئاوای کوردستان بەهۆی هێرشی ئاسمانیی دەوڵەتی داگیرکەری تورک شەهیدبوون.

 

دەقی ڕاگەیەندراوەکە بەمشێوەیەیە:

“بە شەهیدانی ڕاگەیاندنی ئازاد جیهان بیلگین و نازم داشتان سەربەرزین

ساڵی پار لە ڕۆژی ١٩-١٢-٢٠٢٤ ڕاگەیاندنی ئازاد دوو رۆژنامەنووسی خاوەن توانا و بە ئەزموونی لەدەستدا، لەکاتێکدا هەردوو رۆژنامەنووسی ڕاگەیاندنی ئازاد جیهان بلگین و نازم داشتان، شانبەشانی شەرڤانانی ڕۆژئاوا و باکوور و ڕۆژهەڵاتی سووریا ڕووماڵی هێرشە داگیرکارییەکانی دەوڵەتی تورک و چەتەکانیان دەکرد بۆ سەر بەنداوی تشرین و ڕوو ڕەشی ئەوانیان ئاشکرا دەکرد.

 

دەوڵەتی داگیرکەری تورک ساڵانێکە لەپێناو ئەوەی دەنگی حەقیقەتی گەلی کورد نەگات بە ڕای گشتی جیهان، هەمانکات بۆئەوەی زوڵم و زۆردارییەکانی لەسەر گەلی کورد ئاشکرا نەبن، بە شەهیدکردن  و زیندانیکردن بە ئاشکرا دوژمنایەتی خۆی لەبەرانبەر ڕاگەیاندنکارانی ئازاد نیشانداوە و لەناوخۆدا زیندانەکانی پڕکردووە لە ڕۆژنامەنووس و ڕاگەیاندنکار و ئازادیخوازان، هەروەها لە ڕۆژئاوا و باشووریش پەلاماری ڕۆژنامەنووسانی ڕاگەیاندنی ئازاد دەدات و تیرۆریان دەکات، شەهیدان گوڵستان تارا و هێرۆ بەهادین و عەزیز کۆیلوئۆغلو نموونە زیندووەکانن لەو هێرەشانەی کە لە باشوور کراونەتە سەر ڕاگەیاندنکاران.

 

ڕاگەیاندنکارانی راگەیاندنی ئازاد، لە هەرشوێنێکی کوردستان و جیهان بن خاوەن هەمان پەیامن، ئەویش دەرخستنی ڕاستییەکان و بوون بە دەنگ و ڕەنگی گەلەکەیانە. لە سەدەی ڕابردوو لەبەر نەبوونی ڕاگەیاندنی ئازاد، تەواوی ئەو کۆمەڵکوژی و دوژمنایەتییەی لەبەرانبەر گەلی کورد ئەنجامدرابوو، بەشاراوەی بێدەنگی لێکرا.

 

ڕاگەیاندنی ئازاد لەماوەی ٤٨ ساڵ لە تەمەنی خەباتی خۆی، پەردەی لەسەر سەرجەم ئەو تاوان و زوڵم زۆردارییانە هەڵداوەتەوە کە لەلایەن داگیرکەرانەوە لەسەر گەلی کورد و گەلانی ناوچەکە بەڕێوەچوونە.

 

لە ساڵیادی شەهیدبوونی هەردوو ڕاگەیاندنکاری پێشەنگ، وەکو هەڤاڵان و هاوخەباتانی جیهان و نازم، جارێکیتر بەڵێنی وەفاداری و پابەندبوون بە ڕێبازی خەباتی ڕاگەیاندنی و حەقیقەتی ئازادی ئەوان دووپاتدەکەینەوە و هەموو تواناکانمان بەگەڕدەخەین لەپێناو گەیاندنی پەیامی هاوڕێیانی شەهیدمان. دووبارە سووربوونی خۆمان نیشاندەدەین کە خاوەنداریی لە قەڵەم و کامیراکانیان بکەین و تا سەرکەوتن پابەندی ئەو بەڵێن و پەیامانەبین کە بەیەکترمان داوە.”