بەرچەم جودی

 

کۆبانێ- چەتەکانی داعش لە ١٥ی ئەیلوولی ٢٠١٤ لە هێرشێکی سەختدا کە ڕوانگەی دەوڵەتی تورکیای گرتبوو چوونە کۆبانێ، شەڕڤانانی یەپەژە ویەپەگە و نیشتمانپەروەرانی کورد لە چوار بەشی کوردستانەوە ڕۆیشتن بۆ کۆبانێ و بۆ ماوەی ١٣٤ ڕۆژ لە کۆبانێ بەرخۆدانیان کرد و لە ٢٦ی کانوونی دووەمی ٢٠١٥دا سەرکەوتنی کۆبانێیان ڕاگەیاند.

 

ئەو بەرخۆدانە بەهێزەی لە کۆبانێ ڕوویدا، بووە بەرخۆدانێکی جیهانی بە سایەی خەباتی شەڕڤانانەوە کە وەک هێمای بەرخۆدان و سەرچاوەی لەناوبردنی داعش دیاریکراوە، بەرخۆدانی ١٣٤ ڕۆژە لە سەرانسەری جیهاندا لە ٣٠ وڵاتی جیهان و کوردستانەوە بیستراوە لە ١ی تشرینی دووەمی ٢٠١٥، وەک ڕۆژی جیهانی پشتیوانی لە کۆبانێ، لەم مێژووەدا، ٣٠ وڵات و لە هەمان کاتدا بە دروشمی "جوڵاندنی جیهانی بۆ کۆبانێ و مرۆڤایەتی دژی داعش" چوونە شەقامەکان و پشتیوانی خۆیان دەربڕی.

 

بە بۆنەی نۆیەمین ساڵیادی ڕۆژی جیهانی پشتیوانی کۆبانێ، ژنانی کانتۆنی کۆبانێ بۆچوون و ناڕەزایەتی خۆیان لە هەڵوێستی جیهان دەربڕی.

 

"کۆبانێ ڕۆژ بە ڕۆژ ڕووبەڕووی هێرشی داگیرکاری دەبێتەوە"

عەدلە بۆزان تیشکی خستە سەر هێرشەکانی دەوڵەتی تورک کە ماوەی ٩ ساڵە بەردەوامە و وتی: ئەو کۆچە لەبیر ناکەین کە لە ساڵی ٢٠١٤ بینیمان، لەبیرمان ناچێت دەوڵەتی تورک چۆن هەوڵیدا لە ڕێگەی داعشەوە خاکەکەمان داگیر بکات و لێمانی زەوت بکات، بەڵام بە سایەی کچەکانمان گوڵیمۆر کوڕە ئازاکانمان کە ژیانی خۆیان کرد بە قوربانی بۆ پاراستنی خاکی کۆبانێ، بەرخۆدانی کۆبانێ سەرکەوت، کۆبانێ ناوچەیەکی جوگرافی بچووکە، بەڵام بە ناو و بەرگرییەکەیەوە بەهادار و مەزنە، لە ١ی تشرینی دووەمی ٢٠١٥، ڕۆژی جیهانی کۆبانێ ڕاگەیەندرا کە خەڵکی سەرانسەری جیهان پشتگیریمان دەکەن، کۆبانێ بۆ ماوەی ٩ ساڵە ئازادکراوە، بەڵام هەڕەشە و بۆردومانەکانی دەوڵەتی تورکیا لەو ساڵانەدا نەوەستاون، کۆبانێ ڕۆژ بە ڕۆژ ڕووبەڕووی مەترسی داگیرکاری دەبێتەوە، دەبینین جیهان بۆ کۆبانێ بێدەنگە، ئەو وڵاتانەی کە لە چالاکییەکانیاندا دەڵێن "بژی بەرخۆدانی کۆبانێ" چەندین ساڵە لەبەرامبەر ئەو هێرشانە بێدەنگن.

 

عەدلە بۆزان دووپاتی کردەوە خاوەنداری لر ناو و میراتی بەرخۆدانی کۆبانێ دەکەن و وتی: کۆبانێ میراتێکی جیاوازی بۆ گەلی کورد هەیە و لە دڵی هەمووماندا بەهایەکی گەورەی هەیە، لەبەر ئەم هۆکارە، هەرچی دەوڵەتی تورکیا دەیکات، دەستبەرداری ئەم خاکە نابین، کۆبانێ خاکی ئێمەیە و فڕۆکە و تانک و تۆپەکانی تورکە داگیرکەرەکان کاریگەری لەسەر بەرخۆدانمان نابێت، مردن جارێک لە ژیانی مرۆڤدا هەیە، بۆ ئێمەش، ئەگەر مردن هەبێت، با شەرەفمەند بێت و لەسەر خاکەکەمان بێت.

 

"هەڵوێستی جیهان بەرامبەر هێرشەکانی دەوڵەتی تورک دەبێت وەک ١ی تشرینی دووەم بێت"

ئەمینە عوسمان ئاماژەی بەوەکرد، مرۆڤایەتی قەرزاری بەرخۆدانی کۆبانێیە، بەڵام بەگوێرەی ئەوە کار ناکات و وتی: "لە ساڵی ٢٠١٤ کۆبانێمان بەجێهێشت، بەڵام ڕۆح و دڵ و ڕابردوومان هەمیشە لە شوینەکەمان بوو، ئەو ڕووداوانە و دەستەکانی بەرخۆدان کە لە کۆبانێ ڕوویاندا، بوونە هۆی ئەوەی ئەمڕۆ لە ماڵەکانی خۆماندا بین، چەتەکانی داعش، کە دەیانتوانی لە ماوەی چەند کاتژمێرێکدا چەندین ناوچە داگیربکەن و سوپا نەیتوانی لە دژیان شەڕ بکات، لە کۆبانێ شکستیان هێنا،  چەتەکان، مەترسییەکی گەورە بوون بۆ سەر هەموو مرۆڤایەتی، لەلایەن شەڕڤانان و شۆڕشگێڕە کوردەکانەوە شکستیان پێهێندرا، بۆیە هەموو مرۆڤایەتی قەرزاری ئەم بەرخۆدانەیە، ڕاستە کە ئەم خەڵکانە خاوەنداریەتی خۆیان لە کۆبانی نیشاندا لە ١ی تشرینی دووەم، بەڵام ئەمە بەس نییە، ئەمڕۆ گەلی کورد و مرۆڤایەتی ڕووبەڕووی هەمان مەترسی دەبنەوە، ئەو هەست و پشتیوانییە لەم کاتەدا نابینین.

 

"بەهۆی سنوورەکانی کۆبانێوە نەچووم"

ئایسەل ئیبراهیم چیرۆکی جێهێشتنی کۆبانێی گێڕایەوەو وتی: لەکاتی بەرخۆدانی کۆبانێ، کچەکەم کە شەرڤانی یەپەژە بوو بریندار بوو، لەو کاتەدا بڕیارم دا کە کۆبانێ بەجێ نەهێڵم و لەگەڵ کچەکەم و هاوڕێکانی بمێنمەوە، بەڵام کاتێک جەنگ گەیشتە شارەکە و پێکدادانەکان توند بوون، ناچار بووم کۆبانێ بەجێبهێڵم لەگەڵ خێزانەکەم، لەو کاتەدا، من لە پرسوس مامەوە، کە لەبەردەم کۆبانییە، شەو و ڕۆژەکانم بە فرمێسکەوە بەسەر برد، زۆر قورس بوو بۆم کە لەژێر ڕووناکی دەوڵەتی تورکیادا بژیم، گەل و هاوڕێکانمان ڕۆیشتن بۆ شارە گەورەکانی باکووری کوردستان و تورکیا، بەڵام من نەچووم بۆ ئەوەی لە نزیک کۆبانی بمێنمەوە، ئەو شوێنەی کە لێی مامەوە کارگەی مریشک بوو، بەڵام ڕازی بووم بەو بارودۆخە، چادرێکم لەو کارگەیەدا دانا، کاتێک کۆبانێ ئازادکرا، دەستبەجێ لەگەڵ خێزانەکەم گەڕامەوە.

 

ئایسەل ئیبراهیم باسی لەوەکرد کۆبانێ کەرامەتێکی مرۆییە و وتی: ئەو پرۆسەیەی ئێستا تێیدا دەژین هەمان ڕۆژمان بیردەخاتەوە، نەک تەنها ڕۆژانی کۆچ و ئازار، بەڵکو هەستی بەرخۆدان و خەبات بۆ پاراستنی کۆبانێ ڕۆژ بە ڕۆژ لەگەڵمان نوێ دەبێتەوە، کۆبانێ شەرەفێکە بۆ ئێمەو ئەم خاکە بەجێناهێڵین هەتا زیندوو بین.