ناوەندی هەواڵ

 

دوای سەرهەڵدانەکانی  ڕۆژهەڵاتی کوردستان، کە بە کوشتنی ژینا ئەمینی، لەلایەن پۆلیسی ڕەوشتی تاران، لە مانگی ئەیلولی ٢٠٢٢دا دەستیپێکرد، تا ئێستاش سەرەڕای ستەم و سەرکوتکردنی ڕژێمی ئیران، شۆڕشی "ژن، ژیان، ئازادی" بەردەوامە.

 

بەپێی ڕاپۆرتەکانی پەرلەمانی ئێران، لە ئێستادا پڕۆژە یاسای "پاراستنی خێزان لەڕێگەی پەرەدان بە کەلتووری داوێنپاکیی و حیجاب" لە بەردەستی ئەندامان و لیژنەی یاساداناندایە و ئامادە کرێت بۆ کارنامەی پەرلەمان و گفتوگۆ کردن لەبارەیەوە، ڕەشنووسی یاسا نوێیەکە، لە ٧٠ ماددە پێکهاتووە و سزاکانی پەیڕەونەکردنی حیجابی زۆرەملێ توندتر دەکاتەوە و زیاتر لە جاران پێشێلکردنی مافەکانی ژنان دەکات.

 

ئەو یاسایە سەرجەم جومگەکانی وڵات، کە ژنان کاری تێدا دەکەن و ڕۆڵیان هەیە تێیدا، سنووردار دەکات و دەیانخاتە ژێر چاودێریی توند، بۆ نموونە لە خوێندنگە و زانکۆ و دامەزراوەکاندا سزای توند بۆ ئەو ژنانە دانراوە، کە پابەندی حیجابی زۆرەملێ نابن، هەروەها بابەتی پشتیوانی ژیانی ئیسلامی بۆ خێزان و ڕۆشنبیری داوێن پاکی و حجاب، لە سەرجەم قۆناغەکانی خوێندندا بۆ ژنان و کچان دابنرێت و زانکۆ و ناوەندی خوێندنی تایبەت بە ژنان بکرێتەوە.

 

ڕێگەی بە چالاکی کولتووری و ڕۆشنبیری ژنان نادرێت

لە بڕگەی پێنجەمی یاساکەدا ئاماژە بەو سزایانە دەکات، کە بەسەر ئەو کەسانەدا دەسەپێندرێت پابەندی ئەو یاسایانە نین، پڕۆژە یاساکە داوای لە وەزارەتەکانی پەروەردە و زانست و توێژینەوە و تەکنەلۆژیا دەکات، ڕێسای دیسپلین و ڕێنماییەکانی بۆ شێوازی پۆشینی جلوبەرگ بۆ مامۆستایان و فەرمانبەران و خوێندکاران دەربکەن.

 

جگە لەوەی وەزارەتی گەشت و گوزار و میراتی ڕۆشنبیری و پیشە دەستییەکان ئاگادار کراونەتەوە ڕێگە بە هیچ چالاکییەکی ژنان نەدەن، بێ پێدانی مۆڵەت هیچ چالاکییەکی کولتووری و ڕۆشنبیری ڕێکناخرێت و بەپێچەوانەشەوە، بەو یاسا نوێیە توندترین سزا دەدرێن.

 

پڕۆژە یاسای ژینا ئەمینی ئامادە دەکرێت

لەلایەکی دیکەوە، لە نوێترین هەڵوێستدا، مارکۆ ڕۆبیۆ، سیناتۆری کۆمارییەکان و ئەلێکس پادیلا، سیناتۆرێکی دیموکراتەکان، پڕۆژە یاسایەکیان بە ناوی "یاسای ژینا ئەمینی بۆ لێپرسینەوەی ئاسایشی و مافەکانی مرۆڤ" داوە بە کۆنگرێسی ئەمریکا و لەلایەن هەردوو پارتی کۆمارییەکان و دیموکراتەکان پشتیوانی زۆری لێدەکرێت.

 

پڕۆژە یاساکە بۆ سزادانی زیاتری ئێرانە و سەرۆکی ئەمریکا پابەند دەکات بەوەی، هەموو ٩٠ ڕۆژ جارێک ڕاپۆرتێکی ئاشکرا بڵاوبکاتەوە و بیدات بە کۆنگرێس، دەربارەی حاڵەتەکانی پێشێلکاری مافی مرۆڤ لە ئێران، هەروەها سزاکانی تیرۆر و پێشێلکاری مافی مرۆڤ و سزاکانی پەیوەست بە بەرنامە ئەتۆمیەکە بەسەر ئەم بەرپرسانە و دەزگاکانیان دەسەپێندرێت.