ناوەندی هەواڵ

 

لەگەڵ زیادبوونی فشارەکانی ڕژێمی کۆماری ئیسلامیی ئێران بۆ سەر کۆمەڵگە، ژنان وەک پێشەنگێکی ئازادیخواز لە پێشەنگی ئەم خەباتەدان، سەرکوتکردنی بەربڵاو، دەرکردنی سزای قورس بۆ زیندانیانی سیاسی و هەوڵدان بۆ کۆنترۆڵکردنی کۆمەڵگە لە ڕێگەی سنووردارکردنی کۆمەڵایەتی و سیاسییەوە، سیاسەتە بەردەوامەکانی ڕژێم لەدژی هەر ناڕەزایەتییەکە، بەڵام لە لایەکی ترەوە خەبات بۆ ئازادیی گەل و بەتایبەت ژنان بەردەوامە و بە شەپۆلێکی ناڕەزایەتی و هەڵمەت و خۆپیشاندانی جەماوەری بەرەنگاری ئەو سیاسەتە سەرکوتگەرایانەی کردووە.

 

 بەمەبەستی وردبوونەوە لە بارودۆخی ئێستای ڕۆژهەڵاتی کوردستان و ئێران، ئاژانسەکەمان چاوپێکەوتنێکی لەگەڵ دەنیز دەریا، ئەندامی ئەنجومەنی کۆردیناسیۆنی کۆمەڵگەی ژنانی ئازادی ڕۆژهەڵاتی کوردستان (کژار)ی ئەنجامدا، لەم چاوپێکەوتنەدا بارودۆخی ئێستا و چڕبوونەوەی فشارەکان دژی ژنان و بەرخۆدان لە زیندانەکان و کۆمەڵگە و ئاسۆی داهاتووی خەبات شی کردەوەو هەڵسەنگاند.

 

 سەرکوتکردنی سیستماتیکی و سزای دڕندانە بەرامبەر بە ژنانی چالاکوان

 دەنیز دەریا سەرەتا ڕێزی لە پەخشان عەزیزی و جوانا سنە و زەینەب جەلالیان گرت کە تا ئێستاش دیلن و ئاماژەی بەوەدا کە ئەم ژنانە نموونەی بەرخۆدانن لە دژی سیستەمی ستەمکار و وتی: حکومەتی ئێران هەمیشە هەوڵی داوە بە سەرکوتکردنی ڕێ لە دەنگەکانی ئازادی و ڕێبازی خەبات بگرێت، بەڵام ناتوانرێت ئەو خەباتانە بوەستێنرێت، ڕژێم دەزانێت کە ژنان هێزی سەرەکی گۆڕانی کۆمەڵایەتین و هەر لەبەر ئەم هۆکارەش فشاری زیادەیان لەسەر دروست دەکات، زیادبوونی سزای قورس و سەرکوتکردنی بەربڵاوی زیندانیانی سیاسی وەک پەخشان عەزیزی، وریشە مورادی و ژنە تێکۆشەرانی دیکە دەرخەری ترسی ڕژێم لەم ڕەوتەیە.

 

 هەروەها ئاماژەی بە ڕۆڵی زیندانیانی سیاسی لە تەڤگەری ئازادیدا کرد و وتی: زیندان نەک هەر نەیتوانیوە ژنان لە تێکۆشان ڕابگرێت، بەڵکو کردوویەتی بە سیمبولی کۆڵنەدان و ئیلهام بۆ کۆمەڵگە، ژنانی پشت دیواری زیندان، بە بەرخۆدان، بناغەکانی ستەمیان لەرزاندووە.

 

 هەڵمەتی "نا بۆ لەسێدارەدان، بەڵێ بۆ ژیانێکی ئازاد"؛  خەباتێک لە دەرەوە بۆ ڕاگرتنی لەسێدارەدان

 ئەندامی ئەنجومەنی هەماهەنگی کەژار لە درێژەی قسەکانیدا بە ئاماژەدان بە هەڵمەتی "نا بۆ لەسێدارەدان، بەڵێ بۆ ژیانی ئازاد" وتی: ئەم هەڵمەتە تەنیا بەرەنگاربوونەوەی سزای لەسێدارەدان نییە، بەڵکو نوێنەرایەتی شەڕێکی هەمەلایەنەیە لەدژی سیاسەتە مەرگناس و ژنکوژییەکانی ڕژێمی ئێران، ئەم خەباتە لە یەک کاتدا دژی تێکدانی ژینگە و چەوساندنەوەی کۆمەڵایەتی و سنووردارکردنی سیستماتیکی ئازادی ژنانە، ڕژێمی ئێران شەرعیەتی خۆی لەدەستداوە و ئەم هەڵمەت و ناڕەزایەتیانە بەڵگەی ڕوونی ئەم ڕاستییەن.

 

ڕۆڵی خێزان لە بەرهەمهێنانەوەی عەقڵیەتی پیاوسالاری و سەرکوتکردنی ژنان

 

 دەنیز دەریا لە درێژەدا ئاماژەی بە پێکهاتەی پیاوسالاری ڕژێم و ئەو ئامرازانەی کە بۆ کۆنترۆڵکردنی ژنان بەکاری دەهێنێت، لەوانە دامەزراوەی خێزان، یاساکانی دادوەری و شەرەف دا و ڕوونیشی کردەوە: ڕژێمی ئێران نەک تەنیا لە ڕێگەی یاساکانی حکو\ومەتەوە، بەڵکو بە کەڵک وەرگرتن لە ئامرازە کۆمەڵایەتییەکانی وەک بنەماڵە، عەشایەری و شەرەفمەندی، ژنان دەچەوسێنێتەوە، لە بەرامبەر ئەم سیستمە ستەمکارەدا، ژنان ڕووبەڕووی کوشتن و دەستدرێژی و توندوتیژی ڕێکخراو دەبنەوە، زۆرێک لەو تاوانانە بە شاراوەیی ماونەتەوە و تەنیا چەند حاڵەتێکی کەم لە میدیاکانەوە باس دەکرێن، لە ڕاستیدا خێزان لەم سیستمەدا بووەتە 'دەوڵەتێکی بچووک' کە لە ناوەوە زوڵمکردن لە ژنان بەرهەم دەهێنێتەوە.

 

 ئاماژەی بە کوشتنی نیان چەلەبیانی کرد وەک نموونەی توندوتیژیی ڕێکخراو دژ بە ژنان و جەختی لەوە کردەوە کە بۆ ڕووبەڕووبوونەوەی ئەم سیستمە خەباتێکی فراوان و هاوبەش پێویستە.

 

 شەڕی ئایدیۆلۆژی؛  دەوڵەتی نەتەوەیی لە بەرامبەر بەدیلێکی دیموکراسی

 دەنیز دەریا لە درێژەدا ئاماژەی بەوەدا کە سیستمی دەوڵەت نەتەوە لەگەڵ سیستەمی کۆمەڵایەتی گەلان لە ململانێدایە و وتیشی: پژاک و کژار لەسەر بنەمای پارادایمی دیموکراتیک بەشدارانە و بەڕێوەبردنی هاوبەش دژی ئەم ستەم و نایەکسانییە تێدەکۆشن، ڕژێمی ئێران لە ڕێگەی سیاسەتی سەرکوتگەرایانەی خۆیەوە نیشانی داوە کە دژی هەر بزووتنەوەیەکی ئازادیخوازە، بەڵام خەبات دژی سیستمی دەوڵەت نەتەوە، خەباتێکی جیهانییە کە تەنیا لە ئێران و ڕۆژهەڵاتی کوردستاندا سنووردار نییە.

 

 ناوبراو لە درێژەی قسەکانیدا جەختی لەوە کردەوە: وەک کژار و پژاک هەمیشە هەوڵمان داوە خەباتێکی دروست و بنچینەیی لە دژی ناوەندگەرایی و پیاوسالاری بەڕێوەببەین، ئامانجمان دروستکردنی سیستمێکە کە لەسەر بنەمای بەشداریکردنی گشتگیر و ئازادی و دادپەروەری بێت.

 

 ئێران لە قەیران و ڕۆڵی شۆڕشی ژن  ژیان ئازادی

بە ئاماژەدان بە بارودۆخی ئێستای ناوچەکە و جیهان وتی: شەڕی جیهانی سێیەمیش ڕژێمی ئێرانی خستۆتە قەیرانەوە، بەڵام ئەم دەسەڵاتە لە جیاتی دۆزینەوەی ڕێگاچارەیەک بۆ باشترکردنی بارودۆخی ئابووری، کۆمەڵایەتی و کولتووری، سیاسەتی سەرکوتکردنی خۆی چڕتر کردووەتەوە، بەڵام کۆمەڵگە بە هۆشیاری و وریاییەوە جارێکی دیکە ئەم سیاسەتانەی بێکاریگەر کردووە و لەسەر ڕێگای خەبات بەردەوام بووە.

 

باسی لەوەشکرد کە شۆڕشی ژن، ژیان، ئازادی سەرەتای ڕێگایەکی نوێیە بۆ ژنان و هەموو کۆمەڵگە و وتیشی: ئەم خەباتە تەنیا بزووتنەوەیەکی ناڕەزایەتی نییە، بەڵکو ڕێگایەکە بۆ گۆڕینی بنەڕەتی کۆمەڵگە و ڕزگارکردنی خۆمان لە سیستەمی دەوڵەتی نەتەوەیی ستەمکار، ژنان لەم قۆناغە مێژووییەدا بەرپرسیارێتییەکی گەورەیان لەسەرە و دەبێت هۆشیاری کۆمەڵایەتی بڵاوبکەنەوە و بەرخۆدان بەهێزبکەن.

 

 ئایندەی خەبات و پێویستی هاودەنگی کۆمەڵایەتی

 لە کۆتایی گفتوگۆکەدا دەنیز دەریا ئاماژەی بەوەدا کە کژار و پژاک بە ئامانجی بەدیهێنانی کۆمەڵگەیەکی ئازاد و یەکسان درێژە بە خەباتی بونیادنانی نەتەوەی دیموکراتیک دەدەن، هەروەها جەختی لە گرنگی بەشداریی بەکۆمەڵ و بونیادنانی هاوپەیمانیی کۆمەڵایەتی و بەهێزکردنی بەرخۆدان لە بەرامبەر ستەمدا کردەوە و وتی: ئامانجی ئێمە ئێرانێکی دیموکراسییە کە لەسەر بنەمای پێکەوە ژیانی گەلان دامەزراوە، ئەگەر دەوڵەت نەتەوە ئێران ئەم ڕێبازە پەیڕەو نەکات، ئەم ڕژێمە بە شێوەیەکی سروشتی دەڕوخێت، چونکە کۆمەڵگە ڕووبەڕووی دوو سیستم دەبێتەوە؛  یەکێکیان پیاوسالاری و ستەمکارییە و ئەوی دیکەیان لەسەر بنەمای دیموکراسی و بەشداری گشتی دامەزراوە، ئایندە هی ئەو  گەلەیە کە خەبات بۆ ئازادی و یەکسانی دەکەن.