Navenda Nûçeyan- Meclisa Giştî ya Rêveberiya Xweser a Bakur Rojhilatê Sûriyeyê, civîna asayî ya 90’emîn li dar xist. Di civîna ku li avahiya Rêveberiya Xweser a Reqayê hat lidarxistin de, Lijneya Serokatiyê ya Rêveberiya Xweser û nûnerên meclisên rêveber ên 7 herêman amade bûn.

Di civînê de li ser Hevpeymana Civakî ya ku Komîteya Berfireh a Saziya Hevpeymanê pêşkêş kir nîqaş hatin kirin. Alîkarê Hevserokê Meclisa Rêveberiya Xweser Yasir El Silêman, 134 bendên Hevpeymana Civakî yek bi yek xwend û dûre ji aliyê beşdaran ve hat nirxandin. Di dawiya civînê de Meclisa Giştî Hevpeymana Civakî pejirand. Hevpeyman ji niha û pê ve dê bikeve meriyetê.