ناوەندی هەواڵ

 

ئەمڕۆ ٢٧ی شوبات، شاندی ئیمراڵی دەم پارتی سێیەمین دیداری خۆی لەگەڵ ڕێبەری گەلی کورد عەبدوڵا ئۆجالان لە زیندانی ئیمراڵی ئەنجام دا، شاندی ئیمراڵی دوای دیدارەکە کاتژمێر ٥:٠٠ی پشنیوەڕۆ بەکاتی ناوخۆ، لە ئەستەنبوڵ کۆنگرەیەکی ڕۆژنامەنووسی ئەنجام دەدات و پەیامی ڕێبەر دەگەیەنیت.

 

بۆ ئەم لێدوانە مێژووییە شاشەی LED لە شارەکانی ئەستەنبوڵ، ئامەد، وان، قامیشلۆ، کۆبانی، حەسەکە و سلێمانی دادەنرێت و بەیاننامەکە ڕاستەوخۆ پەخش دەکرێت، لە ئەوروپاش شاشە لە ناوەندە کۆمەڵایەتییە دیموکراتیکەکانی کورد دادەنرێت.

 

٧ کەس بەشداری دیدارەکەیان کردوو  جگە لە پەروین بۆڵدان و سڕی سورەیا ئۆندەر، شاندەکە لە تولای هاتمئۆغولاری، تونجر باقرهان، ئەحمەد تورک، ، جەنگیز چیچەک، و فایەک ئۆزگور ئۆزال لەخۆگرتبوو.

 

لە شارەکانی ئامەد لە گۆڕەپانی شێخ سەعید و وان لە گۆڕەپانی شارەکە شاشەی گەورە لە سەرتاسەری شار داندراون و پەیامەکە ڕاستەوخۆ پەخش دەکرێت.

 

شاندی دەم پارتی بە سەرۆکایەتیی پەروین بۆڵدان و سری سورەیا ئۆندەر، ڕۆژی ٢٨ی کانوونی دووەم، لەگەڵ ڕێبەری گەلی کورد عەبدوڵا ئۆجالان کۆبووەوە و پەیامی مێژوویی ٧ خاڵەکەی لەگەڵ ڕای گشتی بڵاوکردەوە.

 

دوای ئەم دیدارە، لەسەر بنەمای پێشنیارەکانی ڕێبەرعەبدوڵا ئۆجالان، خولێکی نوێی دانوستان لەگەڵ پارت و گروپەکانی نوێنەرایەتی لە پەرلەمانی تورکیا دەستیپێکرد و بۆچوونەکانیان سەبارەت بە پرۆسەی ئاشتی گەیەندرا، دوای تەواوکردنی کۆبوونەوەکانی لەگەڵ لایەنە سیاسییەکان و سیاسەتمەدارانی زیندانیکراوی تورکیە، شاندی ئیمراڵی لە ٢٢ی کانوونی دووەم سەردانێکی دیکەی بۆ دوورگەی ئیمراڵی ئەنجامدا.

 

دوابەدوای دیداری دووەم لە ئیمراڵی و لەسەر بنەمای پێشنیارەکانی ڕێبەری گەلی کورد عەبدوڵا ئۆجالان، شاندێک بۆ دانوستان لەگەڵ نوێنەرانی کورد لە باشووری کوردستان پێکهێندرا. لەم شاندەدا، پەروین بۆڵدان و سڕی سۆرەیا ئۆندەر ئەندامی شاندی ئیمراڵی، کەسکین بایندەر، هاوسەرۆکی پارتی هەرێمە دیموکراتییەکان (دەبەپە)، ئۆزگور ئەڕۆل و ئیبراهیم بیلمەز، پارێزەرانی فەرمانگەی یاسایی سەدە، بەردان ئۆزتورک، هاووتەبێژی لیژنەی پەیوەندییەکانی دەرەوەی پارتی دیموکراتک، گوڵجان کاچماز سەیگیت و مەهمەت کاماچ وەک ئەندامی پەرلەمان ئامادەبوون.

 

شاندەکە لە سەردانێکی چوار ڕۆژەدا بۆ هەولێر و سلێمانی کۆبوونەوەی گرنگیان ئەنجامدا، لە هەولێر لەگەڵ مەسعود بارزانی و نێچیرڤان بارزانی و مەسرور بارزانی قسەیان کردووە و لە شاری سلێمانیش لەگەڵ قوباد و بافڵ تاڵەبانی و هەروەها سیاسەتمەداری دیار شەهناز ئیبراهیم کۆبوونەتەوە.