ناوەندی هەواڵ

 

لە کاتێکدا شەڕی سەرتاسەری نێوان ئێران و ئیسرائیل دەچێتە پێنجەمین ڕۆژەوە، ڕاپۆرتەکان ئاماژە بە دۆخێکی نیگەرانکەر دەکەن لە زیندانەکاندا، بەتایبەتی بۆ زیندانیانی سیاسی لە ئێران. زیندانی ئێڤین کە ساڵانێکە ناوەندی دەستبەسەرکردنی زۆرێک لە زیندانیانی سیاسی و چالاکوانی مەدەنی و ڕۆژنامەنووسان بووە، ئێستا تووشی هێرشی مووشەکی بووە، لە هەموو کاتێک زیاتر بێهێزتر بووە.

 

مەهوەش (سایە) سەیدال، چالاکوان بارودۆخی ناو زیندانی ئێڤین لە نێوان شەڕی بەردەوامی ئێراندا پێناسە دەکات و وتی: لە ئێڤین لە هەموو ساتێکدا مردن دەبینین، لە نێوان ترسی بۆمبەکانی ئیسرائیل و هەڕەشەی هێرشی ناوخۆیی.

 

بارودۆخی ناپارێزراوی زیندان

زیندانەکانی ئێران و بەتایبەت زیندانی ئێڤین، لە چوارچێوەی پەرەسەندنی شەڕی نێوان ئێران و ئیسرائیل ڕووبەڕووی خراپتربوونی بارودۆخێک بوونەتەوە، بەگوێرەی شایەتحاڵی زیندانیانی سیاسی، ئەم زیندانانە جگە لە پچڕانی بەردەوامی کارەبا، بەدەست کەمیی خۆراک و ئاو و دەرمانەوە دەناڵێنن.

 

مەهوەش (سایە) سەیدال، زیندانی سیاسی و چالاکوانی مافی ژنان لە نامەیەکدا لە ناو زیندانەوە، دۆخەکەی بە یەکێک لە تیرۆری بەردەوام پێناسە کردووەو وتی: لە ئێڤین لەنێوان ترسی بۆردوومانی ئیسرائیل و هەڕەشەی هێرشی ناوخۆدا دەژین، مردن لێرە لە هەموو ساتێکدا ئامادەیە، هیواش بووەتە تاوان، باسی ئاسایشمان بۆ مەکەن.

 

مەترسی بۆردوومان و پشتگوێخستن

سەرەڕای هۆشدارییەکانی سوپای ئیسرائیل و دۆناڵد ترەمپ، پێشەنگی ئەمریکا سەبارەت بە چۆڵکردنی دەستبەجێی تاران، لەنێوان پەرەسەندنی شەڕی نێوان ئێران و ئیسرائیلدا، زیندانیانی سیاسی لە ئێران ڕووبەڕووی مەترسی زیاتر دەبنەوە، چونکە تا ئێستا هیچ ڕێنماییەکی فەرمی سەبارەت بە چۆڵکردنیان بۆ شوێنی سەلامەتتر دەرنەچووە.

 

بە وتەی سەجاد حائیری برای ئەحمەد ڕەزا حائیری زیندانی سیاسی، بەڕێوبەرایەتی زیندانی قەزل حەسار لە شاری کەرەج، پچڕانی سەرجەم پەیوەندییە تەلەفۆنییەکانی لە سەرەتای هێرشەکانی ئیسرائیلەوە ڕاگەیاند، کە بووە هۆی ناڕەزایەتی لەناو زیندانیەکەدا، لە ڕێوشوێنێکی ناوازەدا، دەسەڵاتداران ڕێگەیان بە دەستگیرکراوەکاندا تەنها بۆ ماوەی پێنج خولەک مۆبایلەکانیان بەکاربهێنن دوای ئەوەی گرژییەکان لە بەشی ٨ پەرەی سەند.

 

لە ئێستادا زیندانیەکانی ڕۆژهەڵاتی کوردستان و ئێران دۆخێکی لە ڕادەبەدەر ناڕەحەتیان بەخۆوە بینیوە کە پارێزگارییەکی کاریگەریان بۆ ژیانی زیندانیان لە نێوان بێدەنگیی دەسەڵاتداراندا نییە، دەنگی مەهوەش (سایە) سەیدال وەک هۆشدارییەکی پڕ لە ئازار کاردەکات کاتێک وتی: لە زینداندا تەنها نەبوونی ئاسایش نییە، بەڵکو ترس و گۆشەگیری زۆرەملێ و لەبیرچوونەوەیە کە لە زیادبووندایە، هەڕەشەن کە سات بە سات بەسەر زیندانییەکاندا دەسوڕێنەوە.

 

ئاژانسەکانی هەواڵی مافی مرۆڤ بڵاویان کردەوە کە هێرشێکی ئاسمانی بۆ سەر دامەزراوەیەکی سەربازی لە نزیک زیندانی دیزل ئاباد لە کرماشان بووەتە هۆی تەقینەوەیەک کە بە تەواوی لەنێو کۆمەڵگەی زیندانیەکەدا بڵاوبووەتەوە، ترس و دڵەڕاوکێی لای زیندانییەکان دروست کردووە.

 

بەگوێرەی ڕاپۆرتەکە، لەئەنجامی ئەو پشێوی و ترسەی کە لە نەبوونی زانیارییەوە سەرچاوەی گرتووە، گرژی و ئاژاوە لە هەندێک لە زیندانەکاندا سەریهەڵداوە، هێزە ئاسایشییەکان لەبری ئەوەی دۆخەکە بەڕێوەببەن، پەنایان بردە بەر بەکارهێنانی چەکی ئاگرین لەدژی زیندانییەکان، بەهۆیەوە پێکدادانی توندوتیژ و خوێناوی لێکەوتەوە.

 

بەپێی زانیارییە سەرەتاییەکان، لانیکەم ١٥ زیندانی کوژراون، زیاتر لە ٣٠ی دیکەش برینداربوون، بریندارەکان بۆ چارەسەرکردن بۆ نەخۆشخانەکانی "ئیمام ڕەزا" و "تاڵەقانی" گواستراونەتەوە.