ناوەندی هەواڵ

 

 بە پێی هەواڵێک کە لە ئاژانسی ئانهای ڕۆژئاوای کوردستان بڵاوبووەتەوە، ئەمڕۆ بە بەشداریی هەزاران هاوڵاتی، مەراسیمێکی بەکۆمەڵ بۆ ڕێزلێنان و بەخاکسپاردنی ٥ شەهیدی هێزەکانی سووریای دیموکراتیک و هێزەکانی ئاسایشی ناوخۆ-ژنان بەڕێوەچوو، ئەم شەهیدانە لە ئەنجامی هێرشە ئاسمانییەکانی دەوڵەتی تورکیا لە ناوچەکانی قامیشلۆ، مەنبج و حەلەب گیانیان بەخت کردبوو.

 

مەراسیمەکە لە گۆڕستانی شەهید دەلیل ساروخان لە قامیشلۆ بەڕێوەچوو، کە تیایدا بنەماڵەکانی شەهیدان، هاوڕێیان، ئەندامانی پارتە سیاسییەکان و چالاکوانانی کۆمەڵگەی مەدەنی ئامادە بوون.

 

ناوی شەهیدان بریتی بوون لە:

- هارون قامیشلۆ (شەخموس یوسف)

- مەزڵوم قامیشلۆ (فەرهاد خەلیل)

- موراد قامیشلۆ (عەبدولمەجید ئەلدیاب)

- میزگین کوردۆ (ئەندامی هێزەکانی ئاسایشی ناوخۆ)

- زاگرۆس (شەڕڤانی هێزەکانی کۆماندۆ)

 

لە درێژایی مەراسیمەکەدا، چەندین کەسایەتی گرنگ وتاری خۆیان پێشکەشکرد، محەمەد عەباس، ئەندامی ئەنجومەنی بنەماڵەی شەهیدان، ڕایگەیاند کە ئەوان یەکەم هەنگاوی شۆڕشی ١٩ی تەمووز لەگەڵ شەهیدان داناوە و بەڵێنیان داوە درێژە بە ڕێبازی شەهیدان بدەن.

 

ڕێحان لۆقۆ، وتەبێژی کۆنگرەی ستار، ئاماژەی بەوەدا کە شەهیدان بۆ پاراستنی ناسنامە و ئازادی گەل بەرخۆدانیان کردووە و لە درێژەی قسەکانیدا وتی: ماوەی ١٢ ساڵە هێرش بۆ تێکشکاندنی پڕۆژەی نەتەوەی دیموکراتیک و شۆڕش بە پێشەنگایەتی ژنان دەکرێت.

 

دوای وتارەکان، نامەی هەر پێنج شەهیدەکە خوێندرایەوە و ڕادەستی بنەماڵەکانیان کرانەوە، لە کۆتاییدا بنەماڵە و هاوڕێیانی شەهیدان هارون، مەزڵوم و موراد، تەرمەکانیان بە شانازییەوە هەڵگرت و بە خاکیان سپاردن.