سلێمانی

 

شاندێکی پێکهاتوو لە ژنانی ئەندام پەرلەمان و هاوسەرۆکی شارەوانییەکانی باکووری کوردستان سەردانی شاری سلێمانییان کرد و ئامانجیانە لەگەڵ لایەن و کەسایەتی و ڕێکخراوەکاندا پرسی گەلی کورد، دۆخی ژنان لە پارچەکانی کوردستان هەڵدەسەنگێنن و ئامانجیان پێکهێنانی یەکێتی نەتەوەییە.

 

لەو چوارچێوەیەدا،  ئەمڕۆ لە دیوانی پارێزگا لەگەڵ هەڤاڵ ئەبوبەکر، پارێزگاری سلێمانی کۆبوونەوە و تاوتوێی ڕێبازەکانی پێکهێنانی یەکێتی نەتەوەییان کرد.

 

شاندەکە پێکهاتوون لە، سەباحەت ئەردۆغان، ئەندامی پەرلەمان لە شاری سێرت، عەدالەت چیمەن، هاوسەرۆکی شارەوانی سلۆپی، گوڵبەهار گوزەل، بەرپرسی ڕێکخراوی ژن، نەسلیهان ئاجەر ، ئەندامی کۆنگرەی گەلی دیموکرات، گوڵبەهار ئاڵپ سۆی، ئەندامی ئەنجومەنی ژنانی هەدەپە.

 

بڕیارە هەر ئەمڕۆ، بە مەبەستی باسکردنی دۆخی ژنانی باشوور و تێکۆشانی هاوبەشی ژنان، کاتژمێر ١:٣٠ی نیوەڕۆ لەگەڵ یەکێتی ژنان لە بارەگای یەکێتی ژنان کۆببنەوە، پاشان کاتژمێر ٣:٣٠ی پاشنیوەڕۆ سەردانی ڕێکخراوی ژنانی ئازادی کوردستان-ڕژاک بکەن.