Navenda Nûçeyan – Hêzên Piştgiriya Lezgîn (RSF) li El Faşêr, di demeke ku rewşa mirovî xirabtir dibe û xizmetên bingehîn bi tevahî hilweşiyane de, binpêkirin û îstîsmara li dijî sivîlan û xebatkarên tenduristiyê berdewam dikin.

Tora Bijîşkên Sûdanî, RSF’ê bi girtina 22 bijîşkan, di nav de 4 jin li El Faşer her wiha binçavkirina nêzî 2 hezar û 377 sivîl û personelên leşkerî, di nav de 426 zarok û 370 jin, di navbera Çile û Nîsana îsal de, piştî dagirkirina bajêr ji hêla RSF ve, tawanbar kir.

Di rapora ku roja Duşemê 27’ê Nîsanê hat weşandin de, torê rewşa mirovî û tenduristiyê ya dijwar li El Faşêr eşkere kir. Di raporê de hat diyarkirin ku di navbera bi sedan girtiyan de sivîl, zarok û jin û bijîşk jî hene.

RSF bi binpêkirinan hat tewanbarkirin

Raporê Hêzên Piştgiriya Lezgîn (RSF) bi binpêkirinan di navendên girtinê de, bi kuştina di dema îşkence û lêpirsînê de û kuştina etnîkî tawanbar kir. Di raporê de hat destnîşankirin ku di dema dagirkirina bajêr, di Cotmeha 2025’an de hejmareke zêde kes hatine kuştin û hejmara kesên ku bi giranî birîndar bûne zêde bûye, di nava hilweşîna tevahî ya xizmetên tenduristiyê û nekarîna navendên tibî de ji bo bersivdayînê.

Nêzî 1470 kesên ku di navbera wan de 370 jin hene hatine girtin

Li gorî raporê, Hêzên Piştgiriya Lezgîn (RSF) niha 907 girtiyên leşkerî û nêzî hezar û 470 girtiyên sivîl, di nav de 426 zarok û 370 jinan, digre. Ev girtî li gelek cihên girtinê, di nav de Girtîgeha Şalla û tesîsên xizmetê yên weke Nexweşxaneya Zarokan û bendera bejahî, belav bûne, ji bilî yên din di konteynirên barkirinê de tên girtin.

Girtî bi binpêkirinan re rûbirû dimînin

Raporê eşkere kir ku girtî rastî binpêkirinan hatine, di nav de bê darizandin hatine kuştin. Di meha Sibatê de, piştî ku bi tohmeta endamtiya hêzên ewlehiyê hatin tawanbarkirin, 16 sivîl li wargehên El-Raşid ên Zanîngeha El-Faşir li gorî etnîsîteya xwe hatin kuştin. Her wiha piraniya girtiyan ji ber birînên ku di dema bombebaranê de çêbûne êşê dikşînin û lênihêrîna tibî ya pêwîst nagirin.

Di du mehan de zêdeyî 300 bûyerên mirinê hatine belgekirin

Raporê li ser rewşa xirab a navendên girtinê yên ku piştî dagirkirina bajêr hatine avakirin an jî bikaranîn destnîşan kir ku bi sedan sivîl û personelên leşkerî di şert û mercên dijwar de hatine girtin. Her wiha hat diyarkirin ku di encamê de heftane di navbera 5-10 bûyeran de mirov mirine û hejmara giştî ya miriyan di nav du mehan de gihîştiye zêdetirî 300 bûyeran.