Navenda Nûçeyan – Li îranê, serhildana gel a ku piştî qetilkirina Jîna Emînî dest pê kir, bi pêşengiya jinan didome. Ji bo serhildana ku bala hemû cîhanê kişandiye ser xwe, piştgiriya jinan a navneteweyî jî mezin dibe.

Li Îngîltereyê Kolektîfa Jin Jiyan Azadî daxuyaniyek da û bal kişand ku serhildana bi dirûşma “Jin, Jiyan, Azadî” ya li Rojhilat dest pê kiriye, li hemû cîhanê belav bûye û hat diyarkirin ku hemû gelên Îranê xwedî li vê serhildanê derketine.

Di daxuyaniyê de bang li Kurd, Fars, Beluc, Azerî û gelên din ên li Îranê dijîn, hemû gelên cîhanê û aliyên ku li Îngîltereyê daxwaza azadiyê dikin, hat kirin ku di piştgiriyê bidin û tevli meşa ku dê di 28’ê Çileyê de li Londrayê were lidarxistin bibin.