Navenda Nûçeyan - Polîsan li Qada Galatasarayê ku tevî biryara "binpêkirina" ya Dadgeha Destûra Bingehîn (AYM) jî qedexe nehat rakirin, êrîşî Dayikên Şemiyê kirin ku dixwestin qurnefîlan bihêlin û 17 kes binçav kirin. Dayikên Şemiyê di daxuyaniya xwe de gotin, “Bi boneya Cejna Remezanê em bang li hezkiriyên xwe yên di bin çavan de hatin windakirin dikin: Em we tu carî ji bîr nakin; em ê we di mejiyê xwe de, di berxwedan û gotina xwe de zindî bihêlin” û diyar kirin ku ew ê li gel hemû astengiyan jî rastiyan bînin ziman.

17 kes hatin binçavkirin

17 kesên ku di nav de Seroka Dayikên Şemiyê û Komeleya Mafên Mirovan (ÎHD) Eren Keskîn û Hevberdevka Komîsyona Girtîgehan a Navendî ya ÎHD’ê Nûray Çevîrmen jî hene, li wesayîta binçavkirinê hatin bicihkirin û birin Midûriyeta Emniyetê ya Bajêr. 

Navê kesên hatin binçavkirin wiha ne: Mikaîl Kirbayir, Îrfan Bîlgîn, Eren Keskîn, Masîde Ocak, Sebla Arcan, Besna Tosun, Alî Tosun, Alî Ocak, Huseyîn Ocak, Hanim Tosun, Yasemîn Bektaş, Aylin Tekiner, Îkbal Eren, Setenay. , Hanife Yıldız, Leman Yurtsever, Nuray Çevirmen.

'Hûn sûc dikin'

Ji hesabê medyaya dîjîtal a Dayikên Şemiyê ev tişt hatin parvekirin:

 “Em bi qurnefîlên ku me nekarî li ser gorên xizmên xwe yên di bin çavan de hatin windakirin bihêlin, li Galatasarayê ne ku bûye sembola windahiyên me. Çalakiya me ya aştiyane ya ku me bi daxwaza eşkerekirina aqûbeta xizmên xwe yên di bin çavan de hatin windakirin û cezakirina berpirsyaran da destpêkirin, tevî biryara Dadgeha Destûra Bingehîn tê astengkirin. Em hatin binçavkirin.

Îro cejn e... Em li Galatasarayê hatin cem hev, li Qada Galatasarayê ku bûye sembola windayên me, qurnefîlên ku me nikaribûn di gorên xizmên xwe yên di binçavan de winda kiribûn bihêlin. Di serlêdana me ya li Dadgeha Destûra Bingehîn a têkildarî qedexeya Galatasarayê de hat destnîşankirin ku hevdîtinên me yên li Galatasarayê pêwîstiyeke demokrasiyê ye. Tevî hemû astengiyan jî em ê rastiyan bînin ziman. Em dest ji maf û azadiyên xwe bernadin. Bi wesîleya cejnê em bang li hezkiriyên xwe yên di bin çavan de hatin windakirin dikin: Em we tu carî ji bîr nakin; em ê we di mejiyê xwe de, di berxwedana xwe de, di gotina xwe de zindî bihêlin.

Yên ku pêşiya daxuyaniya çapemeniyê digirin, yên ku biryara binçavkirinê didin û bi cih tînin, yên ku bi zanebûn Destûra Bingehîn binpê dikin: Hûn sûc dikin. Hûn nikarin mafê me yê protestokirina aştiyane asteng bikin.”