ناوەندی هەواڵ

 

پێشێلکارییەکانی حوسییەکان لە دژی خەڵکی سڤیل لە یەمەن بەربڵاو و سیستماتیکن، لەوانە کوشتنی ڕاستەوخۆ، تۆپبارانی بێ جیاوازی، دامەزراندنی زۆرەملێی منداڵان، بێسەروشوێنکردنی زۆرەملێ، ئەشکەنجەدان، دەستبەسەرداگرتنی ماڵ و موڵک و بە سەربازیکردنی دامەزراوە مەدەنییەکان، کە هەموو ئەمانە پێشێلکردنی مافە مرۆییەکانیان پێکدەهێنن.

 

سەرچاوە پزیشکی و مەیدانییەکان دوێنێ ١٠ی ئەیلوول بڵاویانکردەوە، حوسییەکان کاروانێکی مەدەنییان کردە ئامانج کە دەیان خێزانی ئاوارەی شاری حەیس، خۆخا و مۆچایان هەڵگرتبوو، کاتێک بەرەو عەدەن دەڕۆیشتن، لە ئەنجامی هێرشەکە ئاگرکەوتەوە کە نزیکەی  ١٥ ئۆتۆمبێلی گرتەوە و ژمارەیەکی زۆر لە سەرنشینەکانیش گیانیان لەدەستداوە.

 

بەگوێرەی زانیارییە سەرەتاییەکان، ژمارەی گیانلەدەستدان ١٠٠ کەسی تێپەڕاندووە، کە زۆرینەیان ژن و منداڵن، هاوکات دەیان کەسی دیکەش برینداربوون، هەندێکیان باری تەندروستییان سەختە، ژمارەیەک لە بریندارەکان بەمەبەستی چارەسەرکردن بۆ نەخۆشخانەکانی عەدەن گواستراونەتەوە، هاوکات تیمە پزیشکییەکان بەردەوامن لە چارەسەرکردنی پاشهاتەکانی هێرشەکە و کۆکردنەوەی ژمارەی تەواوی قوربانییەکان.

 

ئەم هێرشە لە کاتێکدایە کە گرژییە سەربازییەکان لە کەناراوەکانی ڕۆژئاوا پەرەی سەندووەو بە ئامانجگرتنی ژێرخانی مەدەنی و ڕێگاکانی گواستنەوە زیاتر دەبێت، هەروەها ڕەنگدانەوەی فراوانبوونی مەودای ئۆپەراسیۆنەکانە کە ڕاستەوخۆ کاریگەری لەسەر هاوڵاتیانی مەدەنی هەیە.