ناوەندی هەواڵ

 

هەڵمەتی iسێشەمەکانی نا بۆ لەسێدارەدانi لە ١٣٠ـەمین هەفتەی خۆیدا دژ بە سزای لەسێدارەدان لە ڕۆژهەڵاتی کوردستان و ئێران ڕاگەیاندراوێکی بڵاو کردەوە.

 

لە ڕاگەیاندراوەکەدا هاتووە: لە سەرەتای ئەمساڵەوە تا ئێستا زیاتر لە ٢٨٠ زیندانی لە گرتووخانەکانی ڕۆژهەڵاتی کوردستان و ئێران لەسێدارە دراون، هەروەها سەدان زیندانی بە تۆمەتی گشتی بەبێ ئاگاداریی خۆیان سزای لەسێدارەدانیان بۆ دەرچووە و زۆرێک لە سزاکانیش ڕۆژانە جێبەجێ دەکرێن.

 

ئاماژە بەوەش کراوە، دەسەڵاتی دادوەریی ڕژێمی ئێران، لە هەفتەی ڕابردوودا جارێکی دیکە چوار زیندانیی سیاسی بە ناوەکانی «عارەف خۆشکار، محەمەد ئەمینی دەهاقانی، عیرفان ئەسفەندیاری و گوڵمحەمەد محەمەدی» بە شێوازی سەدەکانی ناوەڕاست لەسێدارە داوە.

 

بەپێی ڕاگەیاندراوەکە، مانگرتنەکە لە بەشێکی زۆر لە گرتووخانەکانی ئێران و هەروەها گرتووخانەکانی کرماشان، ورمێ، سەڵماس، خۆی، نەغەدە، مەهاباد، بۆکان، سەقز، بانه، مەریوان، سنە، کامێران و ئیلام لە ڕۆژهەڵاتی کوردستان بەردەوامە.

 

جێگای ئاماژەیە، هەڵمەتی “سێشەمەکانی نا بۆ لەسێدارەدان” لە ٩ـی کانوونی دووەمی ٢٠٢٣ وەک ناڕەزایەتییەک دژی لەسێدارەدانی دەستبەسەرکراوانی ڕۆژهەڵاتی کوردستان و ئێران دامەزرا، کە هەموو ڕۆژانی سێشەمەیەک ئەندامانی هەڵمەتەکە دەست بە مانگرتن لە خواردن دەکەن.