عەفرین ناڤدار

 

حەسەکە- ژنانی شەڕڤان لە یەکینەکانی پاراستنی ژنان (یەپەژە) دەڵێن چوونە پاڵ هێزەکانی ژنان کە لە ڕۆژئاوا دامەزراون و دواتر فراوان بوون ، تەواوی جوگرافیای باکوور و ڕۆژهەڵاتی سووریا دەگرێتەوە ،کاریگەری لەسەر کەسایەتییان هەبوو و ئازادی و هێزیان پێبەخشیون و ئەو تێکۆشانەی یەپەژە لە لایەنی سەربازی و سیاسییەوە بەڕێوەی دەبات زۆرێک لەو چەمکانەی بەسەر ژناندا سەپێنراون گۆڕیوە.

 

داکۆکی لە مافەکانی ژنان کرد لە دێرەزوور

یەکینەکانی پاراستنی ژنان (یەپەژە) لە ٤ ی نیسانی ٢٠١٣ دامەزرا و لە ١٢ هەمین ساڵیادی دامەزراندنیدا شەڕڤان ئارین هەژین وتی: لە ژیانمدا ڕووبەڕووی ئاستەنگی زۆر بوومەوە، بەڵام چوونم بۆ ناو یەپەژە هەنگاوێکی گرنگ بوو، بۆ بەدەستهێنانی ئازادی و پشتیوانیکردن لە مافەکانی ژنان لە پارێزگای دیرزوور، چونکە ئامانجی بەشداریکردنم بەرەنگاربوونەوەی نادادپەروەری و بەرەوپێشبردنی مافەکانی ژنانە لە کۆمەڵگەیەکدا کە بەدەست کۆتوبەندێکی زۆرەوە دەناڵێنێت.

 

وتیشی: سەرەڕای ئەو ئاستەنگیانەی کە لە سەرەتادا ڕووبەڕووم بووەوە، بەتایبەتی لە ژینگەیەکی خێڵەکیدا کە ڕازی نەبوو بە بیرۆکەی چوونە ناو یەکەکانی پاراستنی ژنان، توانیم بەشێک بم لەم هێزە و هەستم بە گرنگی کاری هاوبەش کرد بۆ پاراستنی ژنان و بەرەوپێشبردنی مافەکانیان.

 

ئارین هەژین کە ئەندامێکی عەرەبە وتی :یەکەکانی پاراستنی ژنان تەنها هێزێکی سەربازی نین، بەڵکو هێمای ئازادی ژنان، یەکسانی ڕەگەزین و ئێمە لێرەین بۆ بەرەنگاربوونەوەی توندوتیژی دژ بە ژنان و دابینکردنی ژینگەیەکی سەلامەت بۆیان و هەروەها بەرزکردنەوەی پێگەیان، بەشداریکردن لەم یەکانە ڕەنگدانەوەی پابەندبوونمە بە کێشەکانی ژنان و بەدواداچوونی دادپەروەری و یەکسانی.

 

بەبۆنەی ساڵیادی دامەزراندنی یەکینەکانی پاراستنی ژنانەوە جەخت لەوە دەکەینەوە کە لە دیرزوور ڕۆڵی گرنگی خۆمان دەگێڕین لە پێناو پاراستنی ژنان ، بەردەوامین لە هەوڵەکانمان بۆ دادپەروەری و یەکسانی.

"دەسەلاتداران ناتوانن کاریگەریان لەسەر تێکۆشانمان هەبێت"

 شەڕڤان ئامارکی زاگرۆس جەختی لەسەر دەستکەوتەکانی ژنان لە شۆڕشی ڕۆژئاوا و ڕۆڵی کاریگەری یەکینەکانی پاراستنی ژنان لە تێکۆشان لە دژی هەموو ئەو هێرشانە کردەوە کە بوونی ژنان کردۆتە ئامانج وتی: ئەو تێکۆشانەی یەپەژە لە لایەنی سەربازی و سیاسیەوە ئەنجامیان دا زۆرێک لەو چەمکانەی بەسەر ژناندا سەپاندوون گۆڕی و دووبارە بوونی ژنانی زیندوو کردەوە، چونکە تێکۆشانی ئێمە ئەو بیروباوەڕە توندڕەوەی کردە ئامانج کە ژنان تەنها وەک کرێکاری ناوماڵ و دایەن دەبینێت، یەکینەکانی پاراستنی ژنان ڕۆڵی پێشەنگایەتییان هەبوو لە تێکۆشانی ژنان لە ئاستە جیاجیاکانی سەربازی و سیاسی و ئابووری و دیپلۆماسی ، بەپێی بنەماکانی دەوڵەتی دیموکراتی کە ڕێبەری گەلی کورد عەبدوڵا ئۆجالان پێشکەشی کرد بۆ کۆمەڵگەیەکی باشتر ،دەتوانین بڵێین یەکینەکانی پاراستنی ژنان نموونەی ئەو دەستکەوتانەن کە ڕێبەری گەلی کورد عەبدوڵا ئۆجالان بۆ ژنان بەدەستی هێناوە "

 

ئەمارکی زاگرۆس تیشکی خستە سەر قوربانیدان و بەرخۆدانی مێژوویی ژنان لە ڕزگارکردنی خاکەکەیان لە دەستی داعش و تورکیای داگیرکەر و بەکرێگیراوەکانی، یەکینەکانی پاراستنی ژنان بوونەتە هێمای قارەمانێتی و هانی سەدان ژن لە سەرانسەری جیهاندا دا بەرەو باکوور و ڕۆژهەڵاتی سووریا بەڕێبکەون بۆ فێربوون لە توانای ژنانی شەڕڤان بۆ پاراستنی ژنان لە توندوتیژی بە هەموو شێوەکانی کۆمەڵگە و ڕژێمە دیکتاتۆر و سەرمایەدارەکانەوە.

 

ئەو بیروباوەڕە توندڕەوەی جیهادییەکانی هەتەشە پەیڕەوی دەکەن ناتوانێ خەباتی یەکینەکانی پاراستنی ژنان بوەستێنێت وتی: شوێنێک کە ژنان ڕۆڵێکی چالاکیان تێدا نەبێت و دیموکراتی و ئازادی تێدا نییە، بۆیە لە بەرپرسیارێتیمان بەرامبەر بە ژنان و کۆمەڵگەدا دووپاتی دەکەمەوە کە ئەم هێزە دەسەڵاتدارانە ناتوانن کاریگەری لەسەر خەباتی ئێمە وەک یەکینەکانی پاراستنی ژنان هەبێت، ئێمەش بەردەوام دەبین لە بەرەنگاربوونەوەی ئەو بیروباوەڕەی کە ژنان پەراوێز دەخات، تا ئەو کاتەی دڵنیا دەبینەوە کە سووریا دیموکراتی و فرەیی بێت، هەموو پێکهاتە و مەزهەبەکان بگرێتەوە، یەپەژە کۆت و زنجیرەکانی ترسی شکاند و هێزیان لە دڵی هەموو ژناندا چاند ،ڕێنمایی کردن بۆ ئەوەی خۆیان بناسن و بپارێزن لە هەموو هێرش و هەوڵەکانی لەناوبردن."

 

ئەمارکی زاگرۆس جەختی لەسەر جیاوازی بیروڕای  ڕێبەری گەلی کورد عەبدوڵڵا ئۆجالان کردەوە،کە ئازادی ژنانی وەک بنەمای ئازادی کۆمەڵگە دانا، وتی: ژنان تاکە هێزن کە دەتوانن بنەما و ڕەوشتی کۆمەڵگە بپارێزن، چونکە ژنان دادپەروەر و پارێزەر و دروستکەرن. ئێمە شەڕ و چەک هەڵگرتن خۆش ناکەین ،بەڵام کاتێک هێزێک هەوڵی پێشێلکردنی مافەکانمان دەدات ئەوا مافی خۆمان دەبێت، ئەمە مافێکی ڕەوامانە، ئێمە وەک یەکینەکانی پاراستنی ژنان ئەرکی پاراستنی خاک و ژنمان لە دەست ئەو هێزە دڕندانەی کە توندوتیژیی لەسەر خاک و گەلەکەمان ئەنجام دەدەن.

"هەمووان دەبێت خەبات و خۆپاراستن یەکبخەن"

شەڕڤان زیلان زاگرۆس ئاماژەی بە ئامانجەکانی دامەزراندنی یەپەژە کرد وتی: گەلی کورد لەلایەن ڕژێمی بەعسەوە پێشێلکارییەکی زۆری بەرکەوتووە ، دامەزراندنی یەکینەکانی پاراستنی ژنان وەڵامێک بوو بۆ ئەو کارە سەرکوتکەرانەی کە دژی گەلی کورد و ژنان بەتایبەتی پەیڕەو دەکران، سەرەتا گروپێکی بچووکی کەتیبەی ژنان پێکهێنرا، لەڕێگەی ڕێکخراوەکانیانەوە توانیویانە ئایدۆلۆژیا و ئامانجەکانیان بڵاوبکەنەوە وەک یەکینەکانی پاراستنی ژنان، کۆمەڵگەیان بەو شێوەیە پێناسە کرد کە ژنان مافی پاراستنی خۆیان و کۆمەڵگەیان و خاکیان هەیە، بەو مەبەستەش دەبینین هەزاران ژنە شەڕڤان لەژێر چەترێکی هاوبەشدا کۆدەبنەوە کە ئەویش بەرگریکردنە لە ئامانجەکانیان.

 

سەبارەت بە ئامانجی دامەزراندنی یەکینەکانی پاراستنی ژنان لە ٤ ی نیسانی ٢٠١٣ ، وتیشی : لەدایکبوونی ڕێبەری گەلی کورد  عەبدوڵا ئۆجالان ڕۆژێکی پیرۆزە بۆ گەلانی چەوساوە و بەتایبەتی ژنان کە لە ڕێگەی فەلسەفەی خۆیەوە فێری ماف و توانای خۆیان بوون ،بۆ پاراستنی ماڵ و گەڕەک و زەوی و زاریان ، بۆیە یەپەژە بڕیاری دا ساڵیادی دامەزراندنی خۆی لە ڕۆژی لەدایکبوونی ڕێبەری گەلی کورد عەبدوڵا ئۆجالان ڕابگەیەنێت و ئەمەش مانایەکی گرنگ بە یەکەکانمان دەبەخشێت.

 

زيلان زاگرۆس ڕوونیکردەوە کە یەپەژە هەموو پیلانە نائەخلاقییەکانی هێزە دەسەڵاتدارەکانی تێکشکاند کە ئامانجیان کۆنترۆڵکردنی هەموو خاکی سووریا بوو، بە ناوی ئیسلامەوە، "زۆرێک لە هێزە توندڕەوەکان هەوڵیان دا کۆمەڵگە بترسێنن وە لە بەرخۆدان و تێکۆشان دووری بخەنەوە، بۆیە بە گرتنەبەری ئیسلامی ڕادیکاڵ، وەک ئایدیۆلۆژیای خۆیان چەندین کۆتوبەندی بەسەر ژناندا سەپاندووە ،بۆ ئەوەی لە گۆڕەپانی پراکتیکی و سیاسی و سەربازی دووریان بخەنەوە.

 

هەروەها ئاماژەی بە بەردەوامی ململانێکانی ناو سووریا کردو وتی: ئەو شێوازانەی حکومەتی کاتی سووریا گرتوویەتییەبەر ململانێکان لە سووریا قوڵتر دەکاتەوە، ئەو تاوانانەی لە کەناراوەکانی سووریا ئەنجامیداوە ئامانجیان لەناوبردنی کۆمەڵگەی عەلەوییە بوو، ئێمە ئەم کارە دڕندانەییە بە تاوان بار دەکەین وە بە پێشێلکاری بەرامبەر پێکهاتەکانی ناوچەکە دەزانین، دامەزراندنی حکومەتی نوێ کە یەک نژنە وەزیر لە ٢٣ وەزیر لەخۆدەگرێت ئاماژەیە بۆ بیروباوەڕی پیاوسالاری، ئەمەش نایەکسانی ڕەگەزی قوڵتر دەکاتەوە"  ،ئەو داوای لە "هەموو ژنان کرد هاوسۆزی و یەکڕیزی نیشان بدەن لە تێکۆشان و بەرخۆداندا.