ڕۆنیدا حاجی

 

حەسەکە - کێشە کۆمەڵایەتی و ئابوورییەکان، نەبوونی دەرفەتی یەکسان لە بازاڕەکاندا، پاشخستنی ژنان و فشار و توندوتیژی دژیان، چەند کۆسپێکی سەرەکین کە ژنان لە ژیانی خۆیدا رووبەڕوویان دەبنەوە. لەم چوارچێوەیەدا، دەزگای خزمەتگوزاریی کۆمەڵایەتی و گەشەپێدانی ژنان لە حەسەکە لە ٢٢ی ئابدا کرایەوە. ناوەندەکە هەوڵ دەدات لە ڕێگەی کارەکانییەوە، بە خزمەتگوزاری و بەرنامەی جیاواز چارەسەر بۆ ئەم کێشانە بدۆزێتەوە.

 

دامەزراوەی خزمەتگوزاری کۆمەڵایەتی و گەشەپێدانی ژنان بە دەستەی بەڕێوەبەری بەڕێوەدەبرێت کە لە حەوت ئەندام پێکهاتووە، دەستەی کارگێڕی پێکدێت لە سەرۆکی دەستەی کارگێڕی و جێگرەکەی و گەنجینەی و سکرتێر و سێ ئەندامی دەستەی کارگێڕی.

 

دەزگاکە بۆ ژنان چەندین خزمەتگوزاریی کۆمەڵایەتی و پێویست پێشکەش دەکات، لە ناو ئەم خزمەتگوزارییانەدا ڕاوێژی یاسایی، ڕێبەریی دەروونی و لیژنەی ئاشتکردنەوەی خێزانەکان هەن.

 

پەیوەست بەم بابەتەوە، نۆرا عومەر، ئەندامی دەزگای خزمەتگوزاریی کۆمەڵایەتی و گەشەپێدانی ژنان، ئاماژەی بەوەشکرد، کە ناوەندەکە بە ئامانجی وەڵامدانەوەی کێشە کۆمەڵایەتی و ئابوورییەکانی ژنان و پشتگیریکردنیان دامەزراوە، تیشکی خستە سەر گرنگیی سەربەخۆیی ئابووریی ژنان و وتی: ژنان بە بوونی ئابووریی خۆیان دەتوانن بەرامبەر فشارەکان بوەستن، لە بوارەکانی کۆمەڵایەتی، ئابووری و سیاسیدا ڕۆڵێکی چالاکتر بگێڕن، هەروەها دروستکردنی ناوەندەکە پەیوەندی بە گۆڕانکارییە کۆمەڵایەتی و ئابوورییەکان و ئەو فشارانەوە هەیە کە لەم قۆناغەدا لەسەر خێزانەکان، بەتایبەت لەسەر ژنان زیاتر بوون.

بۆ بەهێزکردنی ژنان، پەروەردەی دیجیتاڵی

لە چوارچێوەی کارەکانی دەزگاکەدا، پەرەپێدانی لێهاتووییەکانی ژنان شوێنێکی تایبەت دەگرێت، لەم چوارچێوەیەدا دەزگای خزمەتگوزاریی کۆمەڵایەتی و گەشەپێدانی ژنان ڕایگەیاند، کە خولی فراوانی بەرنامە بنەڕەتییەکانی ئۆفیسی مایکرۆسۆفت (Microsoft Office) دەبەخشرێت.

 

خوولەکە لەژێر چاودێریی مامۆستا محەمەد ئیسماعیل عەبدوڵا بەڕێوە دەچێت، بەگوێرەی ئەو زانیارییانەی لە دەزگاکەمان وەرگرتووە، تۆمارکردن لە ١٨ی ئابی ٢٠٢٦ـەوە دەستی پێکردووە و تەنها ژمارەیەکی دیاریکراو لە بەشداربووان قەبوڵ دەکرێن. نرخی بەشداریکردن ٣٠٠ هەزار لیرەی سوورییە.

 

بۆ ئەو ژنانەی ڕووبەڕووی توندوتیژی بوونەتەوە، خزمەتگوزاریی دەروونی و کۆمەڵایەتی

نۆرا عومەر ڕوونیکردەوە، کە پشتگیریکردنی ئەو ژنانەی ڕووبەڕووی توندوتیژی بوونەتەوە، یەکێکە لە بابەتە سەرەکییەکانی دەزگاکە. لەم چوارچێوەیەدا، لەگەڵ ژناندا کۆبوونەوە و دیمانەی پشتگیریی دەروونی و کۆمەڵایەتی ڕێک دەخرێن و وتی: دەزگاکە لە بوارەکانی کۆمەڵایەتی، تەندروستی، یاسایی، پاراستن و مافەکانی ژناندا خزمەتگوزاری پێشکەش دەکات، ئامانج لێی ئەوەیە ئەو ژنانەی تووشی توندوتیژی بوون بە پاڵپشتی پێویست بەسەر کاریگەرییەکانی توندوتیژیدا زاڵبن و بگەڕێنەوە بۆ ژیانی کۆمەڵایەتی.

 

”سەربەخۆیی ئابووری پێویستییەکی بنەڕەتییە”

نۆرا عومەر تیشکی خستە سەر گرنگیی بەهێزکردنی ئابووریی ژنان و سەربەخۆیی ئابووری لەم قۆناغە هەستیارەدا بۆ ژنان پێویستییەکی بنەڕەتییە و وتی: ژنان کاتێک سەربەخۆیی ئابووری بەدەست دەهێنن، دەتوانن خاوەن دەنگ بن، لە بەرامبەر فشار و ئەو گۆڕانکارییانەی ڕووبەڕوویان دەبنەوە بوەستن و لە مەیدانە جیاوازەکانی ژیاندا بەشداریی خۆیان زیاد بکەن. لەم چوارچێوەیەدا، دەزگاکە بەرنامەی پەروەردەیی، کارەکانی داهات و پشتگیریی پڕۆژە بچووک و ناوەندەکان پێشکەش دەکات، ئامانج لەم بەرنامانە ئەوەیە کە ژنان بە هێزی ئابوورییەوە بەشداریی مەیدانە کۆمەڵایەتی، ئابووری و سیاسییەکان زیاد بکەن و لە قۆناغەکانی بڕیارداندا ڕۆڵێکی چالاک بگێڕن.

 

فراوانکردنەوەی خزمەتگوزارییەکان

نۆرا عومەر جەختی لەوە کردەوە، کە دەزگاکە لە داهاتوودا خزمەتگوزارییەکانی خۆی فراوانتر دەکات و بۆ گەیاندنی خزمەتگوزارییەکان بە ژنانی شارە جیاوازەکان، نووسینگەکانی ناوەندەکە لە شارە جیاوازەکاندا دەکرێنەوە و وتی: لە هەمان کاتدا کۆوردیناسیۆن لەگەڵ ڕێکخراوەکانی کۆمەڵگەی مەدەنی، دەزگا حکوومییەکان و بازاڕی تایبەتدا پەیوەندیی هاوکاری دروست دەکات تاوەکو خزمەتگوزاریی پێویست بۆ ژنان پێشکەش بکرێت.

 

نۆرا عومەر لە کۆتایی قسەکانیدا، جەختی لەوە کردەوە، کە ئامانجی سەرەکیی دەزگای خزمەتگوزاریی کۆمەڵایەتی و گەشەپێدانی ژنان، گەیشتن بە ژمارەیەکی گەورەتر لە ژنان، زیادکردنی هۆشیارییان و یارمەتیدانیانە لە ڕووی تێپەڕاندنی کۆسپە کۆمەڵایەتی و ئابوورییەکانەوە.