ناوەندی هەواڵ

 

ڕێکخراوی مافی مرۆڤی ئێران ڕاپۆرتی مانگی ئایاری خۆی بڵاوکردەوە و دووپاتی کردەوە کە لانیکەم ١٥٢ کەس لەسێدارە دراون کە پێنج ئەفغانی و ١٩ بەلوشی و ٩ کورد و دوو عەرەبن. لە ماوەی ٥ مانگی یەکەمی ساڵی ٢٠٢٥دا لانیکەم ٥١١ کەس لە سێدارە دراون کە ١٦ ژن و ٣٢ ئەفغانی بوون.

 

لە ڕاپۆرتەکەدا ئاماژە بەوە کراوە کە تەنیا ٢٨ لەسێدارەدان بە فەرمی ڕاگەیەندراوە، ئەوەش پشتڕاستی کردووەتەوە کە ژمارەی لەسێدارەدان لە ٥ مانگی یەکەمی ساڵی ٢٠٢٥ بە ڕێژەی ٩٦% زیادی کردووە بە بەراورد بە ٢٦١ لەسێدارەدان لە هەمان ماوەی ساڵی ٢٠٢٤دا.

 

بەڕێوەبەری ڕێکخراوەکە جەختی لەوە کردەوە کە ئەوانەی لەسێدارە دەدرێن دادگاییکردنی دادپەروەرانەیان بۆ ناکرێت، زۆرجار لە ڕیزی لاوازترین چینەکانی کۆمەڵگەدان. سەرەڕای ئەو ژمارە زۆرەی لەسێدارەدان کە لە ئێراندا بێ وێنە بووە، کۆمەڵگەی نێودەوڵەتی بە شێوەیەکی گونجاو وەڵامی ئەم قەیرانەی مافی مرۆڤی نەداوەتەوە. "داوا لە نەتەوە یەکگرتووەکان، یەکێتیی ئەورووپا و وڵاتانی خاوەن پەیوەندی دیپلۆماسی لەگەڵ کۆماری ئیسلامی دەکەین، ناڕەزایەتی دەرببڕن و تێچووی لەسێدارەدان بۆ دەسەڵاتدارانی ئێران زیاد بکەن. ئەگەر هیچ هەنگاوێک نەگیرێتەبەر، "ئەگەر هەنگاو نەگرین، لە چەند مانگی داهاتوودا سەدان لەسێدارەدانی دیکە دەبینین".

 

سەبارەت بە وردەکاری لەسێدارەدانەکان، لەوانەش ئەو تاوانانەی کە تاکەکان لەسەریان سزا دراون و نەتەوە جیاوازەکانی ئەوانەی لەسێدارە دراون، وەک بەلوش و کورد و عەرەب و ئەفغانی، ڕاپۆرتەکە پشتڕاستی کردووەتەوە کە تەنها ١٥ لەسێدارەدان لەلایەن سەرچاوە فەرمییەکانەوە ڕاگەیەندراوە. حەفتا و چوار کەس بە تاوانی کوشتنی "تۆڵەسەندنەوە" سزا دراون، ٦٨ لەوانەی لەسێدارە دراون بە تاوانی پەیوەندیدار بە ماددە هۆشبەرەکانەوە، چوار کەسیش بە تۆمەتی پەیوەندیدار بە ئاسایشی (یاخیبوونی چەکداری) و شەڕکردن لە سێدارە دران. یەکێکیان تۆمەتبارکرابوو بە سیخوڕیکردن بۆ ئیسرائیل، سێ کەسی دیکەش تۆمەتبارکرابوون بە دزی چەکداری.

 

لە ڕاپۆرتەکەدا ئاماژە بەوە کراوە کە شەش کەس بە تاوانی دەستدرێژی سێکسی سزای لەسێدارەدانیان بەسەردا سەپێنراوە، چوار ژنیش لەسێدارە دراون. ئاماژەی بەوەشکردووە، لەنێو ئەوانەی لەسێدارە دراون، ١٩ کەسی بەلوش و ٩ کورد و دوو ئەندامی کەمینە عەرەبییەکان هەبوون.