حەسەکە

 

 لە شارۆچکەی حەسەکەی ڕۆژئاوای کوردستان، بە مەبەستی پێشکەشکردنی خزمەتگوزارییە کۆمەڵایەتی، دەروونی و یاساییەکان و گەشەپێدانی ژنان و پشتیوانیکردنیان لە بەردەم کێشە کۆمەڵایەتی و ئابوورییەکاندا، سەنتەری خزمەتگوزارییە کۆمەڵایەتییەکان و گەشەپێدانی ژنان کرایەوە.

 

لە ڕێوڕەسمی کردنەوەکەدا، نوێنەرانی کۆنگرەی ستار، یەکێتیی ژنانی سریانی و دامەزراوەکانی کۆمەڵگەی مەدەنی، هەروەها گوڵستان گوڵۆ، جێگری ڕێکخراوی کۆنگرەی ستاری ڕۆژئاوا ئامادە بوون. دەرگای سەنتەرەکە لەلایەن دایکی شەهید ئازاد جودی، ساکینە خەلۆ و دایکی شەهید عەلی دۆکۆ، نافییە ئەسەدەوە کرایەوە. بەمەش دەستپێکی فەرمیی کارەکانی سەنتەرەکە لە شاری حەسەکە ڕاگەیەندرا.

 

سەنتەرەکە لە ئەنجومەنی ئەمانات پێکهاتووە کە لە حەوت کەس پێکدێت. لە قۆناغەکانی داهاتووشدا پلان وایە بۆ ئەوەی خزمەتگوزارییەکانی سەنتەرەکە بگەنە ژنانی ناوچە جیاوازەکان، نووسینگەکانی سەنتەرەکە لە شارە جیاوازەکاندا بکرێنەوە. لە سەنتەرەکەدا خزمەتگوزاریی کۆمەڵایەتی، تەندروستی، گەشەپێدان و نیشتەجێبوون، یاسایی، بەرگری و مافەکان شوێن دەگرن. سەنتەرەکە ئامانجییەتی یارمەتیی چارەسەرکردنی کێشە کۆمەڵایەتییەکان بدات و بەرنامە و چالاکییەکانی پشتیوانی دەروونی و چارەسەرکردنی کاریگەرییەکانی دەردەدەروونییەکان پێشکەش بکات. هەروەها بۆ بارودۆخی دەروونی و ژیری، خزمەتگوزاریی تایبەت پێشکەش دەکات.

 

ژن هاوبەشی سەرەکیی گەشەپێدانە

لە ڕێوڕەسمی کردنەوەکەدا پەیامێک لەلایەن بەهییە موراد، سەرۆکی سەنتەری خزمەتگوزارییە کۆمەڵایەتییەکان و گەشەپێدانی ژنان خوێندرایەوە. بەهییە جەختی کردەوە کە کردنەوەی سەنتەرەکە دەستپێکی ڕێگەیەکی نوێیە کە ناوەندەکەی ژن، کەرامەت و هێزیەتی. ئاماژەی بەوەش کرد کە دامەزراندنی سەنتەرەکە لەسەر ئەو بڕوایە بنیات نراوە کە ژن تەنها سوودمەندی بەرنامەکانی گەشەپێدان نییە، بەڵکو لە دروستکردنی گەشەپێدان، بڕیاردان و بنیاتنانی داهاتوودا هاوبەشی سەرەکییە.

 

بەهییە ڕوونی کردەوە کە دەرگاکانی سەنتەرەکە بۆ هەموو ژنان کراوە دەبن و جیاوازییەکان نابنە ڕێگر. تیشکی خستە سەر فرەیی کۆمەڵگەی سوریا و وتی: جیاوازیی زمان و کلتور دەبێت ببێتە سەرچاوەی دەوڵەمەندی و هێز، نەک ڕێگر لە بەردەم هاوکاری و هاوبەشیدا.

 

هەروەها وتی سەنتەرەکە لە بوارەکانی بەهێزکردنی ئابووری، پەروەردە، بنیاتنانی تواناکان، هۆشیارکردنەوە، پشتیوانی کۆمەڵایەتی و دەروونی و پاراستنی مافەکانی ژناندا بەرنامە پێشکەش دەکات. هەروەها هۆشیاریی یاسایی و تەندروستی بڵاو دەکاتەوە و پشتیوانی لێپرسراوێتی پرۆژە بچووک و ناوەندەکان دەکات.

 

 

کردنەوەی سەنتەرەکە بۆ هاوکارییە لە بنیاتنانی داهاتوویەکی باشتردا

بەهییە ئاماژەی بەوە دا کە بەهێزکردنی ژن تەنها بە مانای پێشکەشکردنی یارمەتی نایەت و وتی: لە هەمان کاتدا بە مانای ڕەخساندنی دەرفەتە بۆ ئەوەی ژن بتوانێت پشتبەستوو بێت بە خۆی، بڕیارەکانی خۆی بدات و بە شێوەیەکی چالاک بەشداری لە کۆمەڵگەکەی خۆیدا بکات.

 

بەهییە جەختی کردەوە کە مەرجە سەختەکان و درێژیی ڕێگەکە بە مانای کۆتایی چیڕۆکەکە نایەت، بەڵکو هەمیشە دەرفەت و شوێن هەیە بۆ ئەوەی ژن لە نوێوە دەست پێبکاتەوە. بەم وتانە داوای لە ژنان کرد: گەڕان بکەن بۆ دەرفەت، زانست، پشتیوانی و مافەکانتان و هێزی خۆتان لە بنیاتنانی داهاتووتان و کۆمەڵگەکەتاندا نیشان بدەن.

 

لە کۆتاییدا بەهییە ئاماژەی بەوە دا کە کردنەوەی سەنتەرەکە، کردنەوەی دەرگای ئومێد و دەرفەتی نوێیە، هەروەها دروستکردنی شوێنێکە بۆ دیداری بەکۆمەڵ و هاوکاری بۆ داهاتوویەکی باشتر.