ناوەندی هەواڵ

 

پێشنیوەڕۆی ئەمڕۆ ٦ی تشرینی یەکەم، دەوڵەتی داگیرکەریی تورک، بە فڕۆکەی بێفڕۆکەوان ناوچەی مەدەنییان لە شارەدێی بۆسکێنی سەر بە شارۆچکەی ڕانیەی ڕاپەڕین، بۆردوومان کرد.

 

شوێنی بۆردوومانەکە شەقامی سەرەکی بۆسکێنە و نزیک دوکان و ماڵ و شوێنی مەدەنییە، بە گوێرەی زانیاری سەرچاوە هەرێمییەکان دوو بریندار هەن کە کرێکارن و نزیک بوون لە شوێنی بۆردوومانەکە، هەروەها چەندین ماڵ زیانیان بەرکەوتووە و زەرەری مادی بەر دوکانێک و کارگەیەکی فەرش شۆردن کەوتووە.

 

سەرحەد ڕەسوڵ، بەڕێوبەری شارەدێی بۆسكێن بۆ میدیاکان جەختی کردەوە کە، پێشنیوەڕۆی ئەمڕۆ دەوڵەتی داگیركەری تورك لە ڕێگای فڕۆکەی بێفڕۆکەوانەوە ناوەندی بۆسکێنی بۆردوومان كردووە و لە ئەنجامدا دوو کەس بریندار بوون.