سلێمانی

 

ئەمڕۆ لە هۆڵی خاک لە شاری سلێمانی بۆ یادکردنەوەی ناگیهان ئاکارسەل، کە لە ٤ی تشرینی یەکەمی ٢٠٢٢ لەلایەن میتی تورکەوە کوژرا، ڕێکخراوی ژنانی ئازادی کوردستان-ڕژاک و تەڤگەری ئازادی کۆمەڵگەی کوردستان ماراسیمێکیان ڕێکخست.

 

مەراسیمەکە بە دەقەیەک ڕاوەستان بۆ گیانی پاکی شەهیدان دەستی پێکرد.

 

بەیاننامەی ژنانی ئازادی کوردستان لەلایەن تانیا کەریم خوێندرایەوە و ئاماژەی بەوەکرد، دەوڵەتی تورکیا دەیەوێت بە تیرۆرکردنی ژنانی پێشەنگ دەنگمان کپ بکات هەر بۆیە ساڵێک پێش ئێستە ناگیهان ئاکارسەل ژنە تێکۆشەر و خەباتکاریان کردە ئامانج، بەڵام ئەم هەوڵانەی دەوڵەتی تورکیا بێسوودە و ئێمە بەردەوام دەبین لە تێکۆشان و درێژە بە خەباتی ناگیهان ئاکارسەل دەدەین.

 

دواتر شێرکۆ عەبدوڵا بەیانامەی کۆنگرەی نەتەوەیی کوردی خوێندەوە و ئەوەی خستەڕوو، لایەنەکانی باشوری کوردستان گیانی ئازادیخوازان ناپارێزن، بەڵکو یارمەتی دەوڵەتانی داگیرکەر دەدەن تیرۆریان بکات، هەربۆیە باشوری کوردستان چیتر جێیەک نیە ئازادیخوازان بتوانن بە بە بێ ترس و ئازادانە خەباتی تێدا ئەنجام بدەن.

 

لە درێژەی مەراسیمەکەدا زیلان ڕەحمان لەسەر ناوی ناوەندی ئەرشیف و لێکۆڵینەوە و پەرتوکخانەی ژنی کورد بەیانامەیەکی خوێندەوە و ئاماژەی بەوەکرد، ناگیهان ئاکارسەل هەمیشە هەوڵی هۆشیارکردنەوەی ژنانی دەدا بخوێننەوە و شارەزای مافەکانی خۆیان بن، بۆیە دەستێکی باڵای هەبوو لە کردنەوەی ناوەندی ئەرشیف و لێکۆڵینەوە و پەرتوکخانەی ژنه کورد، هەروەها لە کۆکردنەوەی کتێب و ئاواتی ئەوە بوو ناوەندێک بکاتەوە کە ژنانی هەر چوار پارچە بتوانن لە ڕێگەیەوە خۆیان هۆشیاربکەنەوە و تێبکۆشن.

 

هەر لە مەراسیمەکەدا چەند بروسکەیەکی ماتەمینی لە پارچەکانی کوردستانەوە پێشکەش بە گیانی ناگیهان ئاکارسەل کرا.

 

لە درێژەی مەراسیمەکەدا سینەفزیۆنێک لەسەر ژیان و خەباتی ناگیهان ئاکار سەل پێشکەش کرا، کە چۆن ژیانی خۆی تەرخان کردبوو بۆ خەبات و هۆشیارکردنەوەی ژنان و لە ماوەی ژیانیدا هەوڵی باسکردنی زانستی ژنۆلۆژی دەدا و چەندین دەستکەوتی گرنگی بۆ ژنان بەجێهێشتووە.

 

مەراسیمەکە بە دروشمی ژن، ژیان، ئازادی کۆتایی هات.