سلێمانی

 

سبەینێ ١٤ی تشرینی دووەم، یادی ٢٣٩یەمین ساڵی بونیادنانی شاری سلێمانیە و چالاکی جۆراوجۆر بۆ ئەو یادکردنەوەیە و پیرۆزکردنی دەستی پێکردووە.

لەو بارەیەوە لەیلا عومەر، سەرۆكی شارەوانی سلێمانی لە كۆنگرەیەكی ڕۆژنامەنووسیدا وتی: كۆمەڵێك مەڕاسیممان لە یادی ٢٣٩ ساڵەی سلێمانی کە دەكاتە سبەینێ سێشەممە ئامادە كردووە، بریتین لە سەوزایی و پڕۆژە و سەردانی چەند پرۆژەیەك، وەک كۆنكرێت بۆ گەڕەكەكان و دروستکردنی پرد.

ئاماژەی بەوەشکرد، لەبەر ئەوەی چالاكییەكان زۆرن بەشێكییان خستووەتە ئەمڕۆ، کە یەكێكیان بریتی بوو لە چاندنی ٢٣٩ نەمام لە بلواری شەقامی مەلیك مەحمود و ٧٠ نەمام لە سەرچنار.

سەبارەت بە ڕێژەی سەوزایی پرۆژەكان باسی لەوەكردووە، كۆمەڵێك لە بازرگانان و وەبەرهێنەرەكان كە پرۆژەكانیان دروستكردووە دەبوو ٢٥% ی سەوزایی بێت، بەڵام ئەوان سەرجەم زەوییەكانیان كردووە بە باڵەخانە بۆیە دەبێت بەپێی یاسا لە شوێنێكی دیكە ئەو پڕۆژەی سەوزاییە جێبەجێبكەن و خۆشیان بەڕێوەی ببەن.