هێلین ئەحمەد

 

سلێمانی_ پاش نیوەڕۆی ئەمڕۆ، لە سیتەک، لە شاری سلێمانی، لە لایەن کۆمیتەی ئازادی ڕێبەر ئۆجەلان، بەهۆی ساڵیادی لە دایکبوونی ڕێبەری گەلی کورد 'عەبدوڵا ئۆجەلان'، لە لایەن ( سنور ڕەحمان ڕۆژنامەنوس، ڕێکەوت ئیسماعیل توێژەر و نووسەر، محەمەد بەکر نووسەر)، دیبەیتێک پشکەشکرا.

 

کۆمیتەی ئازادی بۆ عەبدوڵا ئۆجەلان، لە بەیان نامەیەکدا ئاماژەیان بەوەکرد: کە ئەمڕۆ ٤ی نیسان ساڵیادی لەدایکبوونی بیرمەندی گەورەی گەلەکەمان بەڕێز عەبدوڵا ئۆجەلانە. ڕێبەر ئۆجەلان پێدەنێتە نێو ٧٦ مین ساڵی تەمەنیەوە.

 

ئەمڕۆ ڕۆژبوونی ڕێبەرێکە کە ژیانمانی لێوانڕێژ کردووە لەهزری ئازادی. هێزی ناسین و تێگەیشتنی پێمان  بەخشیوە و ڕێگای ئەڤین و هەقیقەتی ژیانی ئازادی پێنیشان داوین.

 

 گەلەکەمان ئەمڕۆژە وەک ڕۆژی ژیانەوە و باڵابوونی نەتەوەیی و ئازادی و دیموکراتی بەناو دەکات. بەتایبەت ژنان ئەمڕۆژە گەلێک پیرۆز و بەبەها دەنرخێنن و بەڕۆژی هەڵکشانی ژنانی ئازادی ناوزەد دەکەن.

 

ئەمڕۆ ڕۆژبوونی بەرزە ڕێبەرێکە  کەڕەنجێکی مەزنی لەپێناو ئازادی گەلی کورد و ئازادی ژنان و ئازادی گەلانی ڕۆژهەڵاتی ناوین و تەنانەت مرۆڤایەتیش داوە. ئەمڕۆژە نەک تەنیا بۆ گەلی کورد بەڵکو بۆ تەواوی گەلانی ناوچەکە ڕۆژێکی واتادار و پرشنگدارە و ڕەهەندی ژیانێکی ئازاد و دیموکرات و شکۆداری هەیە.

 

ڕێکەوت ئیسماعیل، توێژەر و نووسەر دەڵێت:" ئەو پارادایمەی کە ڕێبەر ئاپۆ بەرپای کرد سەرلەنوێ لە دایکبوونەوەی مێژووی کورد بوو، چونکە پێش لەدایکبوونی ڕێبەر ئاپۆ زهنییەتی لۆزان چووبووە ناو بیری تاکی کوردەوە، تاکە سەرکردە توانی دژایەتی لۆزان و ئەو بیرە بکات، فەلسەفە و فکری ڕێبەر ئاپۆ بوو، هەربۆیە بنەمای شۆرشەکەی ڕێبەر ئاپۆ ڕەتکردنەوەی زهنییەتی لۆزان بوو، بەرێز ئۆجالان لە زوڵمی دەوڵەت-نەتەوە دەیکرد بەرامبەر بە گەلی کورد تێگەشتبوو، تاکە سەرکردەیە تێدەگات لەوەی دەبێت ناسیۆنالیزمی سیاسی بگۆڕێت بۆ ناسیۆنالیزمی کولتووری و ڕەتکرنەوەی سیستەمی سەرمایەداری."

 

 

محەمەد بەکر، نووسەر باسی لەوەکرد: "ڕێبەری گەلی کورد 'عەبدوڵا ئۆجەلان' وەک خوڵقێنەرێکی ئیلاهی بۆ دۆزە گرنگەکانی کورد دروستبووە، ڕێبەری گەلی کورد لە سەرەتایی لە دایک بونیوە وەک خوڵقێنەرێکە بۆ بەرگریکردن لە کورد، ئەو ڕێبەرە لەگەڵ لە دایک بونیدا بەردەوام لە پێناو ئازادییەکانی گەلی کورد تێکۆشانی ئەنجام داوە، لەگەڵ لە دایکبوونیدا لە ناوچەکەی خۆی و لە گوندەکەیەوە هەردەم هەوڵی بۆ گۆڕانکاری و نوێبوونەوە داوە، ئەو فکر و فەلسەفەیەی کاری بۆ کردووە، لە ئێستادا تەواوی جیهانی هاوفکر و ڕێبازی ڕێبەری گەلی کوردن، لە ڕووی هزری و فەلسەفی و ئازادی ژن بە ژیان و بە کردەیی خۆی پێشکەشی گەلی کورد کردووە، ئێستاش گەلی کورد لە چوارچێوەی ئەم تێکۆشانەدا خەبات دەکات، هەبوونی فکری ڕێبەری گەلی کورد 'عەبدوڵا ئۆجەلان' دەرکەوتنی تیشکی ڕۆژێکی نوێیە بۆ ژنانی ڕۆژهەڵاتی ناوەڕاست، کە لە جیهاندا سەددەی ٢١ بە سەدەی ژن دادەندرێت."

 

 

سنور ڕەحمان ڕۆژنامەنوس، ئاماژەی بەوەدا:"ڕێبەر ئاپۆ بە ئەزموونی شەڕ دەستی پێکرد، ئێستا لە پرۆسەی ئاشتیدایە، بناغەی ڕێکخستنی سیاسی پێویستی بە دیدگایەکی ڕێبەر ئاپۆ هەبوو، هەربۆیە خۆی لە چەقبەستویی سیستەمی سەرمایەداریی و دەوڵەت-نەتەوە وەدەرنا و خەبات و تێکۆشانی گەلی کوردی گەڕانەوە بۆ ڕەگ و ڕیشەی کوردایەتی، ڕێبەر ئاپۆ وەک شەخسێک مامەڵەی نەکردووە بەڵکوو وەک ڕێبەرێک پیرۆزبایی جەژنی نەورۆز و ڕەمەزانی لە گەلی کورد، هاوکات لە پەیامەکەی بۆ ژناندا چوار چڵە نێرگزی پێشکەش بە ژنانی هەر چوار پارچەی کوردستان کرد، بۆیە ٤ـی نیسان بە واتای سەرلەنوێ ژیانەوە و نوێبوونەوە دێت، بە پێشکەشکردنی چوار چڵە نێرگزلە نزیکبونەوەمان لە جەژنی نەورۆزی کورد چەندین پەیام و بەرپرسیارێتی بۆ ژنانی ئازادیخواز لەخۆ دەگرێت، تێیدا بەرپرسیار کراوین بۆ هەڵگرتنی ئاشتی و گەیاندنی پەیامەکەی بە تەواوی جیهان، هەروەها هەوڵ بۆ دەستەبەرکردن و ڕوبەڕوبوونەوەی ئەقڵیەتی کۆمەڵگەیەکی چەقبەستووی ببینەوە."

 

سنور ڕەحمان، ڕۆژنامەنوس وتیشی:"هەبوونی فکری ڕێبەر ئاپۆ ئافراندن و بونیادنانی ژنیکی ئازاد لەخۆ دەگرێت، لەدوای دامەزراندنی پەکەکە و دامەزراندنی ئارتێشی ژنان، قۆناغێکی هزری لەسەر ئەساسی ڕەخنەدانی پیاوسالاری و دوبارە بونیادنانەوەی ژنی کورد بونیادنرا، لە ئێستادا لە باکووری کوردستان ژنان لە پەرلەمانەکاندا دژ بە زهنیەتی دەسەڵات دەنگ هەڵدەبڕن، لە ڕۆژئاوای کوردستان لەسەر بەنداوی تشرین و هێزەکانی بەرگری لە ڕۆژئاوا دژی دەوڵەتی داگیرکەری تورکیا بەرخۆدانی ئەنجام دەدەن، لە ڕێگەی ئازادبوونی ژنان هەوڵ بۆ کۆمەڵگەیەکی ئازاد دەدەن.

 

"گەلی کورد لە دارێکی وشکەوە کردە دارێکی سەوزبوو "

ڕوناک مەجید، ئەندامی کۆمیتەی ئازادی ڕێبەر ئۆجەلان، لە چواری نیساندا بۆ ڕۆژی لە دایکبوونی ڕێبەری گەلی کورد دەڵێت:" لە دایکبوونی ڕێبەر'عەبدوڵا ئۆجەلان' لە دایک بوونێکی ئاسایی نییە، هەبوونی لە دوای تەمەنی حەوت ساڵیەوە کار و خەباتی دژ بە زهنییەتی کۆمەڵگەکەی ئەنجام داوە، هەر لە گوندەکەیەوە هەوڵی گۆڕانکاری داوە، کە شیکردنەوەی بۆ ژنان لە دایکیەوە سەرچاوەی گرتووە، پاشان لە کاتێکدا بەشوودانی هاوڕێ کچەکەی لە تەمەنێکی کەمدا دوبارە هۆکارێکی دیکەی ڕوبەڕووبونەوەی ئەو عەقڵیەت و زهنییەتەیە کە کۆمەڵگە بونیاتی ناوە، پاشان بەرکەوتە و سەپاندنی زمانی داگیرکەر بەسەریاندا ڕێگەیەکی دیکەیە بۆ ئازادبوون لە زهنیەتی دەوروبەری، ئاشنابوونی بە سیاسەت و قڵبوونەوەی و دانانی پارتی کرێکارانی کوردستان، دەبێتە هۆکار بۆ ئەوەی گەلی کورد لە گەلێکی مردووەوە بۆ گەلێکی زیندوو ژیانەوە هەوڵبدات، واتە گەلی کورد لە دارێکی وشکەوە بۆ دارێکی زیندوو دەرکردنی گەڵای سەوز لێوەی دەگۆڕدرێت." 

 

ڕوناک مەجید، ئەندامی کۆمیتەی ئازادی ڕێبەر ئۆجەلان لە کۆتاییدا وتیشی:"لە دایکبوونی ڕێبەری گەلی کورد 'عەبدوڵا ئۆجەلان' لە دایکبوونی فەلسەفە و زمان و کلتورێکە. ژنان لە خاوەندارێتی کردن لە فکر و کەسایەتی عەبدوڵا ئۆجەلان جیاواز لە سەرکردەکانی دیکە کار بۆ بەرەوپێشبردنی فکری دەدەن، ٤ی نیسان لەدایکبوونی ئازادیە بۆ تەواوی کورد و لە ناویاندا ژنانکورد."