ناوەندی هەواڵ 

کەمپەینی سێ شەمان نا بۆ لە سێدارەدان لە ١٢٦ەمین هەفتەی خۆیدا، بە بەشداربوونی بەندینخانەی کەهرامانا لە ئێستادا لە ٥٧ بەندینخانەی جیاوازی سەرانسەری ئێراندا بەردەوامە. کەمپەینەکە ڕایگەیاند کە لە ماوەی مانگێکدا ١٣٤ بەندکراو لەسێدارەدراون کە دوو ژنیشیان لەناودایە.

لە بەیاننامەی کەمپەینەکەدا ئاماژە بەوە کراوە کە ئاسیە فەراهمەند ٢٨ ساڵ و زەینەب زەرینی ٣٢ ساڵ لە ٧ی حوزەیراندا لە بەندینخانەی قەزوین لەسێدارەدراون. هەروەها تیشک خراوەتە سەر ئەوەی کە لە ئێراندا سزای لەسێدارەدان ئامرازێکی دادپەروەری نییە، بەڵکو زیاتر میکانیزمێکە بۆ بڵاوکردنەوەی ترس و بێدەنگکردنی نەیاران.

 

دەقی بەیاننامەی کەمپەینی ‘سێشەممەی دژی سێدارە’ بەمشێوەیەیە:

لە کاتێکدا کە دەبێت کەرامەتی مرۆڤ بەردی بناغەی یاسا، دادپەروەری و بەڕێوبەرایەتی بێت، ئامێری لەسێدارەدان و مەرگی ڕژێمی سێدارەی ئێران بێوچان کار دەکات. بەپێی زانیارییە بەدەستگەیشتووەکان، دوو ژن بە ناوەکانی ئاسیە فەراهمەند ٢٨ ساڵ و زەینەب زەرینی ٣٢ ساڵ، لە ٧ی حوزەیراندا لە بەندینخانەی قەزوین لەسێدارەدراون. بەهۆی ئەوەی بەرپرسان بە شێوازێکی شەفاف زانیاری بڵاوناکەنەوە، هەواڵی ئەم لەسێدارەدانانە تەنیا لەم دواییانەدا گەیشتووەتە دەستمان.

 

لە ماوەی مانگێکدا ١٣٤ کەس لەسێدارەدراون

هەروەها، لە ١٦ی حوزەیراندا لە شاروود، دوو بەندکراوی سیاسی بە ناوەکانی ئەبولفەزل ساعدی و جەواد زەمانی، کە بەهۆی بەشداریکردنیان لە خۆپیشاندانەکانی مانگی کانوونی دووه‌می ٢٠٢٦ دەستبەسەرکرابوون، لەسێدارەدران. بەم شێوەیە، ژمارەی گشتی ئەو بەندکراوانەی کە لە نێوان ٢١ی ئایار و ٢٢ی حوزەیراندا لەسێدارەدراون گەیشتە ١٣٤ کەس.

 

لە ئێراندا، سزای لەسێدارەدان ئامرازێک نییە کە بۆ جێبەجێکردنی دادپەروەری بەکاربهێنرێت؛ بەڵکو میکانیزمێکە کە بۆ بڵاوکردنەوەی ترس، بێدەنگکردنی دەنگە نەیارەکان و بەهێزکردنی سیستمی دەسەڵاتی زاڵ بەکاردێت.

لەلایەکی دیکەوە، دوای چەندین مانگ لە شەڕی سەربازی و باجە قورسەکانی کە گەلی ئێران داویەتی، هەفتەی ڕابردوو لە نێوان ڕژێمی ویلایەتی فەقیهی ئێران و ویلایەتە یەکگرتووەکانی ئەمریکادا ڕێککەوتنێکی سەرەتایی واژۆکرا. بەڵام، هەڵسەنگاندنی وتارە بڵاوکراوەکان دەری دەخات کە هیچ باس و سەرنجێک نە خراوەتە سەر پێشێلکارییەکانی مافی مرۆڤ، سەرکوتکاری و لەسێدارەدانە ترسناکەکانی ئێران. ئەمەش ئەوە نیشان دەدات کە هێزە گەورەکان لایەنگری گۆڕانکاری nین؛ گەل دەبێت بۆ گۆڕانکاری پشت بە هێزی خۆی ببەستێت و بەستراوەی هیچ هێز یان دەوڵەتێکی دەرەکی نەبێت.

 

هۆشداری لە دژی لەسێدارەدانەکان درا

ڕێکخراوی لێبوردنی نێودەوڵەتی، لەگەڵ مائی ساتۆ ڕاپۆرتەری تایبەتی نەتەوە یەکگرتووەکان و چەند پسپۆڕێکی UN، بەیاننامەی جیاوازیان بڵاوکردەوە و لە دژی پشتگوێخستنی پێشێلکارییەکانی مافی مرۆڤ لە ئێران و بەردەوامیی بێ سزا مانی بەرپرسانی ئەم پێشێلکارییانە لەسەر ئاستی نێودەوڵەتی، هۆشدارییان دا.

 

بانگەواز

ئێمە بانگەواز ئاڕاستەی کەسانی خاوەن ویژدان، ڕێکخراوە نێودەوڵەتییەکان، داکۆکیکارانی مافی مرۆڤ و دژبەرانی سزای لەسێدارەدان دەکەین:

ئێمە، بەندکراوانی کەمپەینی ‘سێشەممەی دژی سێدارە’، ماوەی ١٢٦ هەفتەیە، هەر سێشەممەیەک بەبێ دابڕان لە ڕێگەی مانگرتن لە خواردن و شێوازەکانی دیکەی نەڕەزایەتی لە بەندینخانە جیاوازەکانی ئێراندا، لە دژی لەسێدارەدانەکانی هاوشێوەی سەردەمی ناوەڕاست دەوەستینەوە. جارێکی دیکە ڕایدەگەیەنین کە مافەکانی مرۆڤی گەلی ئێران، بەتایبەتی مافی بەندکراوان، جێگەی گفتوگۆ نین. بە هەمان دەنگی گەلی ئێران، ئێمە تا کۆتا هەناسە و کۆتا هێزی خۆمان، بەردەوام دەبین لە بەرگریکردن لە ئازادی، یەکسانی و هەڵوەشاندنەوەی سزای لەسێدارەدان.

هەروەها بانگ لە گەلی وشیار و بەشەرەفی ئێران، گەلانی خاوەن ویژدانی جیهان و ڕێکخراوە نێودەوڵەتییەکانی مافی مرۆڤ دەکەین: لە هەمبەر شەپۆلی ڕو لە زیادبوونی لەسێدارەدانەکان لە ئێران بێدەنگ نەبن و هەنگاوی بەرپرسیارانە و کاریگەر بنێن بۆ ڕاگرتنی ئەم تاوانە ڕێکخراوەی کە لەلایەن فاشیزمی ئایینیی باڵادەست لە ئێراندا ئەنجام دەدرێت.

مێژوو نیشانی داوە کە هیچ ڕژێمێکی ستەمکار تەنیا بە توندوتیژی بەردەوام نەبووە و هیچ حکومەتێک نەیتوانیوە داواکاری گەل بۆ دادپەروەری و مافەکان بۆ هەمیشە بێدەنگ بکات. ئەوەی دەمێنێتەوە بیرۆکەکانی ئازادی, یەکسانی، ڕێزگرتن لە مافی ژیان و کەرامەتی مرۆڤە. گەلی ئێران بۆ بەدیهێنانی ئەم بەهایانە باجی قورسی داوە و سەرەڕای بەردەوامبوونی، دەست لەم داواکارییانە هەڵناگرن.

کەمپەینی ‘سێشەممەی دژی سێدارە’ ڕایگەیاند کە کۆمەڵێک لە بەندکراوانی بەندینخانەی کەهرامانا بۆ شەرمەزارکردنی سزای لەسێدارەدان هاتوونەتە ناو کەمپەینەکەوە. ئەم بەندکراوانە، هاوشانی بەندکراوانی بەندینخانەکانی دیکە، هەر سێشەممەیەک دەست بە مانگرتن لە خواردن دەکەن.