ناوەندی هەواڵ- سەرەڕای چەند ساڵێک هەوڵی وڵاتانی جیهان بۆ بەدیهێنانی یەکسانی جێندەری و دەستەبەرکردنی مافەکانی ژنان، هەڵاواردنی جێندەری هێشتا لە بوارە جیاجیاکاندا ڕەگی داکوتاوە.

 

ئەمڕۆ پێنجشەممە ٦ی ئادار، دەزگای نەتەوە یەکگرتووەکان بۆ مافەکانی ژنان و یەکسانی جێندەری بەبۆنەی ٨ی مارس ڕۆژی جیهانی ژنان ڕاپۆرتێکی بڵاوکردەوە و جەختی لەوە کردەوە: دوای سی ساڵ لە پەسەندکردنی ئەجێندای مێژوویی لەلایەن سەرکردەکانی جیهانەوە بۆ بەدیهێنانی یەکسانی جێندەری، مافەکانی ژنان لەژێر هێرشدایە و جیاکاری جێندەری لە ئابووری و کۆمەڵگاکاندا بە دامەزراوەیی دەمێنێتەوە.

 

ڕێکخراوەکە ئاماژەی بەوەکردووە کە نزیکەی چارەکی حکومەتەکانی جیهان لەماوەی یەک ساڵی ڕابردوودا دابەزینی مافی ژنانیان تۆمارکردووە، ڕایگەیاندووە: "هەر دە خولەکێک کچێک یان ژنێک لەلایەن هاوژینەکەی یان ئەندامی خێزانەکەیەوە دەکوژرێت، هەروەها حاڵەتەکانی توندوتیژی سێکسی پەیوەست بە ململانێ لەساڵی ٢٠٢٢وە بەڕێژەی لەسەدا ٥٠ زیادی کردووە".

ڕاپۆرتەکە ڕوونی دەکاتەوە، سەرەڕای هەنگاوەکانی حکومەت لە ماوەی پێنج ساڵی ڕابردوودا بۆ پێشخستنی یەکسانی جێندەری و دەستەبەرکردنی مافەکانی ژنان، لەوانە پەسەندکردنی یاساکانی بەرەنگاربوونەوەی توندوتیژی دژی ژنان لەلایەن ٨٨ حکومەتەوە، پێشکەشکردنی خزمەتگوزاری بە قوربانیان و قەدەغەکردنی هەڵاواردن لە شوێنی کاردا، هەروەها هەوڵەکانی ٤٤%ی حکومەتەکان بۆ باشترکردنی کوالیتی خوێندن و ڕاهێنانی پیشەیی بۆ کچان و ژنان، ئەم مافانە لە ڕووبەڕووبوونەوەی هەڕەشەکان لە سەرانسەری جیهاندا بەردەوامن.

 

هەروەها لە ڕاپۆرتەکەدا ئاماژە بەوە کراوە کە ژنان تەنها لەسەدا ٦٤ی مافە یاساییەکان بە بەراورد بە پیاوان بەهرەمەندن و هەرچەندە لە ساڵی ١٩٩٥ەوە ژمارەی نوێنەری ژن زیاتر لە دوو هێندە زیادی کردووە، بەڵام سێ لەسەر چواری نوێنەران هێشتا پیاون.

 

هەروەها سکرتێری گشتی نەتەوە یەکگرتووەکان لە بەیاننامەیەکدا ڕایگەیاند کە مافەکانی ژنان لەژێر هێرشی جیهانیدا کەوتوونەتە ژێر هێرشەوە: "لەبری پێشخستنی مافە یەکسانەکان، ئێمە شاهیدی بڵاوبوونەوەی ژنکوژیین". هەروەها جەختی لەوە کردەوە کە جیهان دەبێت بە بڕوایەکی پۆڵایینەوە بەرەو بەدیهێنانی مافەکانی مرۆڤ و یەکسانی و بەهێزکردنی ڕاستەقینە بۆ هەموو ژنان و کچانی جیهان بوەستێت.