زیانەکانی خواردنەوەی کحول لەماوەی دووگیانیدا
پزیشک هودا محێدین ئاماژە بەوەدەکات، پێویستە ژنانی دووگیان ئاگاداری ئەو خواردن و خواردنەوانە بن کە دەیخۆن، هەروەها خواردنەوە کحولیەکان لەوانەیە ببێتە هۆی لەبارچوون.
ناوەندی هەواڵ
پزیشک هودا محێدین، ڕاوێژکاری ژنان و منداڵ بوون، دەربارەی خواردنی ژنانی دووگیان نووسیویەتی: خواردن کاریگەرییەکی زۆری هەیە لەسەر تەندروستی دایک و کۆرپەلە، بۆیە پێویستە ژنی دووگیان زانیاری ھەبێت لەسەر ھەموو ئەو لایەنانەی کە دەکرێت زیانی پێ بگەیەنێت، بەتایبەتی لە سێ مانگی یەکەمی دووگیانیدا، کحول ماددەیەکە دەکرێت بە وێلاشدا تێبپەڕێت بۆ خوێنی کۆرپەلە و لەوانەیە ببێتە هۆی لەبارچوون، یان لەدایکبوونی کۆرپەلە بە مردوویی، یان کەمئەندامی جەستەیی و دەروونی و هەڵسوکەوتی منداڵەکە.
بەکارهێنانی کحول لە کاتی دووگیانیدا دەبێتە ھۆی دەرکەوتنی دیاردەی کحولی و چەندین نیشانەی دەرکەوتووی هەیە لە کۆرپەلەدا، وەک؛
-شێواوی ڕووخسار.
-بچووکی سەری کۆرپەلە.
-نەبوونی درێژی پێویستی کۆرپەلە.
-کێشی کەمتر لە کێشی ئاسایی.
-ناتەواوی لە جووڵەی پەلەکان.
-زۆر چالاکی.
-کەمو کوڕی لە تەرکیزکردن و سەرنج و یادەوەری.
-دواکەوتنی فێربوونی قسە.
-کێشەی خەوتن و شیردانی منداڵ لەماوەی تازە لەدایکبووندا.
-کێشەی بیستن و بینین.
-کێشەی گورچیلە، ئێسک و کێشەی دڵ.
لەوانەیە ببێتە هۆی دەرکەوتنی ئەم نیشانانە لە دایکدا:
-وشکبوونەوەو ڕشانەوە.
-بەرزی پەستانی خوێن.
-ناتەواوی خۆراکی.
-شەکرەی دووگیانی.