سلێمانی

 

ژنان هەمیشە بەدەستەکانیان کاری جوانیان ئامادەکردووە، لەوانەش چنین و ڕستن، سیرامیک و گڵکاری، هەم بۆ پاراستنی کولتوورو هونەر بووە، هەمیش پاڵنەرێکی ئابووری باش بووە بۆیان، بوونەتە خاوەن داهاتی سەربەخۆو پشتیان بە خۆیان بەستووە، هەرچەندە لە رابردوودا ژنان لە بازاڕی کار دووردەخرانەوەو بەربەستییان بۆ دروست دەکرا، کە ئەمەش وایکردبوو ژنان هەمیشە چاویان لەدەستی پیاوانی ناوخێزانەکانیان بێت جا "باوک، برا، یان هاوژین"بێت، نەیاندەتوانی پێداویستییەکانی خۆیان دابین بکەن، بەڵام ژنان چیتر ئەمەیان قبوڵ نەکردو بەشداری بازاڕی کار بوون، بە بەرهەمە دەستییەکانیان و هەتا بازرگانی کردنیش توانیویانە بژێوی خۆیان و تەنانەت خێزانەکانیشیان دابین بکەن.

 

ماوەی هەفتەیەکە لەبەردەم باخی گشتی شاری سلێمانی فێستیڤاڵی نەورۆزو بەهارە دەستیپێکردووە، بە شەوان لەژێر چەند کەپرێکدا ژنان کارەکانیان دەخەنەڕوو.

 

بێریڤان حەمەساڵح، خاوەنکار ئاماژەی بەوەکرد، بۆ دابینکردنی بژێوی ژیانی ماوەی چەند ساڵێکە دەستی بەم کارە کردووەو دەست لەکەس پان ناکاتەوە، خاوەنی داهاتی خۆیەتی و دەتوانێت خۆی بەڕێوەببات.

 

"تووشبووی شێرپەنجەم و کار کردن سەربەرزییە"

ڕەمزیە ئەحمەد لە ساڵی ١٩٩٢ەوە دەستی بەکاری سیرامیک و تەختە کردووە کە کەلوپەلی جوانکاری و خانووی کۆنی کوردەواری لەگەڵ دروست دەکات، وتی: ٣٣ سالە ئەم کارە دەکەم، بۆ زیندووکردنەوەی کولتوورو ئاشنا کردنییەتی بە نەوەی داهاتوو، من نەخۆشی نەخۆشخانەی هیوام و ٦ ساڵە چارەسەر وەردەگرم، کار کردن سەربەرزییە، لەڕێگەی کار کردنەوە بەسەر بەربەستەکاندا زاڵ بووم، زۆرکەس هانیان داوم و هەروەها زۆر کەسیش ویستوویانە لە کار کردن پەشیمانم بکەنەوە، بەڵام من گوێم پێنەداون و بەردەوام بووم لە کارو ویستی خۆم.

 

ئەم فێستیڤاڵانە بۆ خاوەنکارە نوێیەکان بەسوودە

شروق زیا کە لە موورو جانتای شانی ژنانی دروست دەکرد بەدەم هۆنینەوەی مووروەکانەوە قسەی بۆ کردین و وتی: من هەرچەندە نابینام بەلام پێمخۆشبوو کارێک بکەم، لەبەرئەوە بەشداری خولێکم کردوو سەرکەوتووانە تەواوم کرد، ماوەی سێ مانگە دەستم بەکار کردووە، بۆ بژێوی ژیان کار کردن پێویستە.

 

ئاماژەی بەوەشکرد، ئەم جۆرە فێستیڤاڵانە بۆ ئەو ژنانەی سەرەتای کارکردنیانە وەک من، شتێکی باشەو کارەکانیان دەناسێندرێت، وەک پیشەی سەرەتایی من یەکەم کارمەو بەشداری فێستیڤاڵەکە بووم.