حەنان حارت

 

مەغریب- لە گەڕەکی ڕەبات نزیک بۆشایی شالە، کە مێژووی شارە کۆنەکە لەگەڵ ڕیتمی ژیانی هاوچەرخ یەکدەگرێت، زوحا محیب هەیە کە هونەرمەندێکی مەغریبی پسپۆڕە لە وێنەکێشان لەسەر شووشە و داری لەیزەر.

 

دوای ئەزموونێکی هاوسەرگیریی شکستخواردوو، زوحا محیب بڕیاری دا سەرەتایەکی نوێ لە جیهانی هونەردا دەستپێبکات، هەرچەندە ڕێگاکە ئاسان نەبوو، بەڵام توانی ئاستەنگەکان بگۆڕێت بۆ دەرفەت و خۆی بنیات بنێتەوە.

 

ڕۆژێک لە کاتی گەڕان بەدوای چەند تابلۆیەکدا، یەکێک لە وێنە شوشەییەکان سەرنجی ڕاکێشا، ئەو سەرسام بوو کە ئەم تابلۆیانە چۆن کێشراون، بۆیە بڕیاری دا فێر ببێت، زوحا محیب دەڵێت: من پێشتر وێنەم لەسەر شووشە دەبینی و سەرم سوڕماوە کە چۆن کێشراون، پاشان دەستم کرد بە پرسیارکردن و هەوڵدان بۆ فێربوون، زانیاریم کۆکردەوە دەربارەی ئەو ڕەنگانەی کە دەتوانرێت بەکار بهێنرێن و ئەمڕۆ ئەم هونەرە ئەنجام دەدەم.

 

سەرەتای زوحا محیب مامناوەند بوو، داهاتی ئاسایی بوو، ئەو ئامرازانەی کە پێویست بوو بە نرخێکی گونجاو دەیکڕی، بەڵام وازی لە کارکردن و خۆڕاگریی نەهێنا ،وتی: داهاتم ئاسای بوو، بەڵام ئەوەی پێویستم بوو دەمکڕی، لەوێوە هەموو شتێک بەرەو پێشەوە دەچوو، بە تێپەڕبوونی کات هەستم دەکرد کە دەزووی ئەم هونەرە دێرینەم گرتووە کە بووە بەشێک لە من، بۆم دەرکەوت کە وێنەکێشان لەسەر شووشە تەواو جیاوازە لە هونەری شێوەکاری سەر تابلۆکان، "جیاوازی نێوان وێنەکێشان لەسەر شووشە و هونەری پلاستیک لەوەدایە کە شووشە تایبەتمەندی جیاوازی هەیە، و دەبێت بە وریاییەوە مامەڵەی لەگەڵدا بکرێت، من حەزم لە ڕەنگی سروشتی وەک سەوز کە هێمای سروشتیە، زەرد کە گەشبینی دەردەخات، سوور کە گوزارشت لە خۆشەویستی دەکات، شین کە هێمای ئاسمانە و سپی کە نوێنەرایەتی ئاشتی دەکات"، ئەم ڕەنگانە تابلۆکانی جیا دەکەنەوە، کە لە ڕێگەی ئەوەوە جوانی و هێزی ژنان دەردەخەن، کە بابەتی سەرەکی کارە هونەرییەکانن.

 

دەربارەی بوونی ژنان لە هونەرەکەیدا وتی: لە تابلۆکانمدا، من هەمیشە پەرۆشم بۆ تیشک خستنە سەر هێز و جوانی ئافرەت لە هەموو وردەکارییەکانی کارە هونەرییەکاندا، بۆ من ئافرەت تەنها بابەتی وێنەکێشان نییە، بەڵکو سەرچاوەی هەمیشەیی ئیلهامن، من هەردوو ڕەنگی گەش و تۆخ بەکاردەهێنم بۆ تیشک خستنە سەر ڕەهەندە جیاوازەکانی کەسایەتی ئافرەت.

 

لە هەندێک لە تابلۆکانیدا ، زوحا محیب ژنان لە بارودۆخێکدا نیشان دەدات کە هاوسەنگییان لە نێوان کار و پشوودان ، لەنێوان بەرەنگاری ڕۆژانە و ڕەنگدانەوەی ناوەکی ، ئەم دووانەیە ڕەنگدانەوەی ژیانی ژنێکە کە هێز و پێویستی بە ساتەکانی ئارامی بۆ بەدەستهێنانەوەی وزەی خۆی تێکەڵ دەکات.

 

جگە لە خولیای هونەر پێیوایە ئینتەرنێت ئامرازێکی بەهێزە بۆ فێربوون و گەشەپێدان و وتی: ئەمڕۆ ئینتەرنێت بۆتە سەرچاوەیەکی بەنرخی فێربوون و گەشەی کەسێتی ، لەڕێگەی ئینتەرنێتەوە چەندین تەکنیکی داهێنەرانەی لەبواری وێنەکێشان و هونەرە شێوەکارییەکاندا فێربووم و هەوڵ دەدەم ئەوەی فێربووم بۆ ژنانی تر بگوازمەوە، ژنان دەتوانن لە ڕێگەی ئینتەرنێتەوە بەردەوام بن لە خولیای خۆیان لە بوارە جۆراوجۆرەکاندا، چ هونەری بێت یان ئەکادیمی، ئینتەرنێت توانای پەیوەندیکردنی بەردەواممان لەگەڵ سەرچاوەکانی زانیاری لە سەرانسەری جیهاندا پێدەبەخشێت، بەم شێوەیە یارمەتیمان دەدات ئاسۆکانمان فراوانتر بکەین و دەستمان بە سەرچاوەی بێسنوور بگات.

 

سەرەڕای ئەو ئاستەنگانەی کە لە سەرەتای ژیانیدا ڕووبەڕووی بۆتەوە، بەڵام هیوای لەدەست نەداوەو وتی: باوەڕم وایە هەموو کەسێک دەبێت یەکەم هەنگاوی خۆی دەست پێبکات بۆ گەیشتن بە هونەری حەز، لە هەمووی گرنگتر ئەو باوەڕەیە کە هیچ شتێک بەفیڕۆ ناچێت، هەر هەوڵێک بکرێت لە کۆتاییدا ئەنجامی دەبێت، کاتێک ئافرەت بە هیوا و ئاواتخوازە ، دەتوانێت ڕێڕەوی ژیانی خۆی بگۆڕێت و کاریگەرییەکی بەهێز لەسەر کۆمەڵگە بەجێ بهێڵێت.

 

بەهۆی سووربوون و ویستی خۆی،زوحا محیب توانی خۆی وەک هونەرمەندێکی ناسراو لە بوارەکەیدا بچەسپێنێت، تابلۆکانی جوانی ژنان بە هەموو وردەکارییەکانییەوە دەردەخات، پەیامی پڕ لە ئومێد و ویستوتوانا هەڵدەگرن، تیشک دەخەنە سەر ڕۆڵی ژنان لە کۆمەڵگە و توانای گۆڕان و داهێنان.