سانیا مورادی 

 

سنە-بە بۆنەی ڕۆژی جیهانی خاوەن پێداویستی تایبەت لە شاری سنە پێشانگایەکی کاری دەستی لەلایەن کەسانی خاوەن پێداویستی تایبەتەوە بەڕێوەچوو. پێشانگاکە کە لە ٣ی کانوونی دووەم بە سەرپەرشتی ڕێکخراوی خێرخوازی ڕاد دەستی پێکردووە، تا ٧ی کانوونی دووەم لە کۆمەڵگەی بازرگانی بانتا ڕۆژانە بەردەوام دەبێت.

 

پێشانگاکە بریتییە لە بەرهەمە قوماشییەکان، کاری چەرم، کاری دانتێل و دەنکۆڵە، ماکرام، جلوبەرگی چەرمەسەر، ماکرام، دیزاینی گوڵ، دروستکردنی مۆم، سیرامیک، پۆرسەلین، ڕزین و بەرهەمەکانی دیکەی وەک بروش و زێڕینگەریی.

 

ڕێکخراوی خێرخوازی ڕاد هەلی کاری بۆ زۆر کەس دابین کردووە

ڕێکخەرانی پێشانگاکە ڕایانگەیاند کە ئامانجیان ناساندنی بەرهەمی خاوەن پێداویستییە تایبەتەکان و ڕەخساندنی هەلی کار بۆیان و پێشکەشکردنی پاڵپشتی ئابوورییە.

 

ڕێکخراوی خێرخوازی ڕاد ساڵانێکە ڕاهێنانی کاری دەستی پێشکەش بە خاوەن پێداویستییە تایبەتەکان دەکات و هەلی کاری بۆ زۆرێک لە فێرخوازان دابین کردووە. تا ئێستا بەشێک لەو فێرخوازانە لە ڕێگەی کاری دەستی و فرۆشتنیانەوە سەرچاوەی داراییان دەستکەوتووە.

 

یەکێک لە بەشداربووانی پێشانگاکە، ئایناز عەبدی، سەبارەت بە کارەکە وتی: تەمەنم ٢١ ساڵە و نزیکەی چوار ساڵە لە بواری کاری دەستیدا هەروەها لە بواری نواندندا کاردەکەم، بەداخەوە خاوەن پێداویستییە تایبەتەکان چ لە ڕووی ئابووری و چ لە ڕووی کۆمەڵایەتییەوە ڕووبەڕووی ئاستەنگی زۆر دەبنەوە، چاوەڕوانی پاڵپشتی ئەم پێشانگایە بووین، بەڵام بەشێک لە دوکاندارەکانی کۆمەڵگەی بازاڕکردنی بانتا ناڕەزایەتیان دەربڕی.

 

"زۆر کاری دەستی دروست دەکەم"

ئایناز عەبدی، سەبارەت بە هاتنە ناوەوەی بۆ ئەم بوارە  وتی: بە هاوکاری کۆمەڵەی گەلی باڵەکورتەکان و سەباح مەسیدی دەستم کرد بە دروستکردنی کاری دەستی و ئێستا ماکرام و چەرمەسەری بە دەنکۆڵە و مایکرۆ ماکرام و کاری دار و کەرەستەی چەرم دروست دەکەم، لەم خولانەدا ئەوانەی شەش مانگ ڕاهێنانی تیۆری و پراکتیکی بە سەرکەوتوویی تەواو دەکەن بڕوانامەی تەکنیکی پیشەیییان پێدەبەخشرێت.

 

"چاوەڕێی پشتیوانی کۆمەڵگەم"

ئایناز عەبدی، بە سەرنجدان بۆ گرنگی ئەم کارانە وتی: بۆ ئێمە لە کۆمەڵگەدا هەلی کارێکی گونجاو نییە، بەڵام کاری دەستی زۆر گرنگە هەم لەبەر ئەوەی ئێمە حەزمان لێیە و هەم لەبەر ئەوەی تاکە ڕێگەیە بۆ دابینکردنی بژێوی ژیان، وەک ژنێکی کەمئەندام هیوادارم پاڵپشتی زیاتر لەلایەن کۆمەڵگاەوە.