هەڵەبجە

 

سەنتەری گەشەپێدانی چالاکی لاوان بە هاوبەشی دەزگای ڕوانگە، ڕێکخراوی شنروێی کاکەیی، ڕێکخراوی نافا بۆ پەرەپێدانی توانای ژنان، ڕێکخراوی شاڕێ، کتێبخانەی باران، گروپی دۆستانی کتێب، گروپی ڕێژیار و کتێبناسی وەک نەریتێکی ساڵانە شەشەمین پێشەنگای بەخشین و ئاڵوگۆری کتێبیان کردەوە.

 

شیما سەعید، ئەندامی گروپی دۆستانی کتێب بۆ نوژنها دوا و وتی: ئامانجمانە ساڵانە بتوانین ئەو کەسانەی توانای کڕینی کتێبیان نییە و حەز و ئارەزوویان بۆ خوێندنەوەی کتێب هەیە لە ڕێگەی ئەم پێشەنگایەوە بتوانن کتێبەکانیان بەدەستبخەن و ببێتە نەریت تا هاوڵاتیان سودمەند ببن.

 

سەرسەنگ محەمەد، ژنێکی گەنجە و سەردانی پێشەنگاکەی کردووە، کتێبەکانی ئاڵوگۆڕ پێدەکات و بە گرنگیەوە لەم جۆرە پێشەنگایانە دەڕوانێت، وتیشتی: بیرۆکەکەیان زۆر جێگەی دەستخۆشیە، ئەو کتێبانەش کە لێرەن زۆر باشن و لە هەموو بابەتێکی تیادایە و هەموو تویژەکان سودی لێدەبینن.

 

نافیعە عارف، سەرۆکی ڕێکخراوی نافا بۆ پەرەپێدانی تواناکانی ژنان باسی لەوەکرد وەک ڕێکخراوەکەیان زیاد لە سەد جۆر بابەتی کتێبیان نمایش کردووە و مەبەستیانە گەنجان و کچان لە تەکنەلۆژیا و شاشەکانی مۆبایل و کۆمپیوتەر دووربخەنەوە تاوەکو بتوانن سودێک بە کۆمەڵگە بگەیەنن.