سروە نێرگز

 

سلێمانی- "گەیشتن بە خۆبوون تەنها لەسەر خودی ئازادی دەبێت، کاتێک ئازادی نەبێت، ئەو کاتە خۆبوون بوونی نابێت، لەبەر ئەوە یەکەم هەنگاو جێبەجێکردنی بیردۆزی ئازادی ژنە"

 

ئەمە وتەی ژنە تێکۆشەری کورد، ناگیهان ئاکارسەل، ڕۆژنامەنووس، نووسەر و دامەزرێنەری ئەکادیمیایی ژنۆلۆژییە، کە تا دوا ساتەکانی تەمەنی تێکۆشا بۆ بڵاوکردنەوەی ئەو زانستەی بوو بە ڕوناکی بۆ تەواوی ژنان لە چوارچێوەی زانستی ژنۆلۆژیەوە.

 

ژنۆلۆژی زانستی ژن و هاوژیانی ئازادە، بە ڕوانگەیەکی ژنانە هەڵسەنگاندن دەکات و دونیابینی و زانستی ژنە، کە لە  کۆمەڵگە و سروشتدا لە مێژووی ژن دەکۆڵێتەوە. بۆ ئەوەی حەقیقەتی ژن زیندوو بێت، ژنۆلۆژی گرنگی بە کولتوور و هونەر ”ئێستاتیک” دەدات.

 

هونەر لە فراوانترین واتایدا چالاکی ئافرێنەرانەی مرۆڤە، بۆیە لە ڕوانگەی ژنۆلۆژییەوە خۆبوون لەسەر بنەمای فەلسەفەی ئازادی بریتییە لە: وڵاتپارێزی، هەروەها ئیرادە و بیرکرنەوەی ئازاد، بەئاگابوون- هۆشیاری بەرانبەر بە ڕەگەزی خۆت، خۆبەڕێخستنکردن، تێکۆشانکردن و ئێستاتیکە و هونەر ڕێبازێکی نیشاندانی ئەم خۆبوونەیە.

 

خۆبوون ئامانجی ئەوەیە لەسەر فەرهەنگ و کولتووری خۆیی، خۆ-وڵاتی (کوردی) خۆی ئاوا بکات و خۆی بونیاد بنێت.

 

لە باشووری کوردستان ناگیهان ئاکارسەل ڕۆڵی کاریگەری هەبوو لە دەستپێکردنی پڕۆژەی "خۆبوون"دا، کە پڕۆژەیەکی هونەری کۆمەڵێک لە ژنانی هونەرمەند بوو، لە کار، پڕۆژە و چالاکی هونەری پێکهات و لە سیمینارەکاندا تیۆر و فەلسەفەی خۆبوون ناسێنرا، بۆ ئەوەی هونەرمەندان بە ڕێی خۆبوونەوە جەوهەری هونەری ژن بناسن.

 

یەکەمین پێشەنگای هونەری خۆبوون لە ١٢ی کانوونی یەکەمی ٢٠٢١ بەڕێوەچوو بۆماوەی ٦ ڕۆژ بەردەوام بوو، کە چەندین ژنی هونەرمەند بەکاری جیاواز تێدا بەشدار بوون، ئەوانیش؛

 

خۆبوون پرۆژەیەکی هەرەوەزی هونەریی ژنە، بۆ ئەوەی هونەرمەندانی ژن ئەزموون و ئیشی هونەریی خۆیانی تێدا بڵاوبکەنەوە، بە زمانی  هونەر ناسنامەی ژن پێناسە بکەن. ئامانجی خۆبوون ئەوەیە ژن لەناو هونەردا خۆبوون و ناسنامەی خۆی پیشان بدات. هەروەها لە ڕێگەی هونەرەوە بەها مەعنەوییەکانی ژن دەربخەن و بەڕێگەی جیهانبینی ژنۆلۆژییەوە هونەری ئەلتەرناتیڤ پێشبخات. هەروەها لە ڕوانگەی ژنۆلۆژییەوە لە ڕێگەی هونەرەوە بتوانین پرسی ژن، پرسی پەیوەندیی ژن و پیاو، پرس و کێشەکانی کۆمەڵگە پیشان بدرێن و شرۆڤە بکرێن، ڕەخنە بکرێن و چارەسەری و ئەلتەرناتیڤ پێشبخرێن.

 

هونەری ژن کاریگەری لەسەر کۆمەڵگە هەیە، لەبەرئەوەی ناسنامەی ژن، ناسنامەیەکی کۆمەڵگەیی و ژیانییە.  ژن لە هونەردا دەتوانێت کێشە و ئاستەنگەکانی بەردەمی خۆی بناسێنێت و بە زمانی هونەر ڕەخنەیان بکات، بەم ڕوانگەیەوە، ناگیهان ئاکارسەل لەوپێناوەدا چەندین ساڵ لە باشووری کوردستان و بە تایبەت لە شاری سلێمانی هەوڵیدا تا پرۆژەی خۆبوون دابمەزرێت و ژنانیش لەناو هونەردا، خۆبوون و ناسنامەی خۆیان پیشان بدەن.

 

ماوەتەوە بوترێت، تێگە و کۆنسێپتی خۆبوون: واتا بوون بە خودی خۆت، پڕۆسەیەکە بۆ گەیشتن بە ڕاستەقینەی خود، ڕێگەیەکە بۆ خەباتکردن لە دژی سیستمە ستەمکار و چەوسێنەرەکان لەناو خۆمان و لە جیهانی دەرەوەدا، بۆ دۆزینەوە و گەیشتن بە جوانی و ڕاستی و هونەری ژن.

 

ئەرشیف؛