داپیرە ئایشە لەگەڵ نەخۆشی و تەمەنە زۆرەکەیدا بەردەوام گۆرانی دەڵێت
ئایشە ئوزومی ١٠٠ ساڵ هەرچەندە نەخۆشی بیرچوونەوەی هەیە، ئەو گۆرانییانەی لە پێشتردا لە ئاهەنگ و بۆنەکاندا دەوتران، لەبیرنەکردووە و باسی لەوەشکرد دوای مردنی دایک و باوکی بەتەنها ماوەتەوە، دواتر هاوسەرگیری لەگەڵ پیاوێک دەکات کە سێ ژنی هەبووە، دەشڵێت: دوای ئەوەی هاوژینەکەم مرد دووبارە بەتەنها مامەوە، گۆرانییەکانم بوونە سەرچاوەی ئابوری و سەبر بۆ من.
مەدینە مەمەدئۆغڵو
جولەمێرگ- لە جولەمێرگ کە سروشتەکەی بە دیمەن و مێژووەکەی سەروەرە، کولتور و دابونەریتی کۆن تێیدا زیندووە، ئاهەنگی هاوسەرگیری کە بە شێوەیەکی نەریتی بەڕێوەدەبرێن، ماوەی دوو ڕۆژ لەبەردەم دەرگای ماڵەکانی شاردا بەردەوام دەبێت و هەزاران کەس کۆدەبنەوە، ژنان و پیاوان جلی ڕەنگاوڕەنگ لەبەردەکەن و بە سەماکانیان ئامادەبووان سەرسام دەکەن.
ئایشە ئوزومی تەمەن ١٠٣ ساڵ دوای ئەوەی دایک و باوکی لەدەستداوە، بە وتنی گۆرانی لە ئاهەنگەکاندا بژیوی ژیانی خۆی و منداڵەکانی دابینکردووە.
"تەنها شتێک کە لەبیرم نەکردووە گۆرانییە"
داپیرە ئایشە لە گوندی شەکیتان لە ناوچەی گەڤەر نیشتەجێیە، سەرەڕای تەمەنە گەورەکەی گۆرانی دەڵێت، لەبەر دەرگا دادەنیشێت و ڕۆژانی پێشوو بەبیر خۆی دەهێنێتەوە، گۆرانی بۆ هەر میوانێک دەچڕێت کە دێتە لای، هەرچەندە نەخۆشی بیرچوونەوە-زەهایمەری هەیە، بەڵام گۆرانیەکانی تاکە شتە کە لەبیری ناچێت.
"کاتێک بە تەنها دەبم گۆرانی دەڵێم"
داپیرە ئایشە وتی: من بێ کەس مابوومەوە و کەس نەبوو ئاگادارم بێت، منیش بە وتنی گۆرانی لەسەر پێی خۆم وەستام و بژێوی خۆمم دابینکرد، کاتێک خەریکی خۆبەخێوکردن بووم، خزمەکانمان منیان بە پیاوێک کە سێ ژنی هەبوو بەشوودا، کاتێکیش ئەو مرد، من دووبارە بەتەنها مامەوە و گۆرانیم دەچڕی، تا گۆرانی بووە سەرچاوەی ئابوری و خۆڕاگریم.
هەر بەو ئابورییەی بە وتنی گۆرانی لە ئاهەنگ و بۆنەکاندا دەموت، توانیم کوڕەکانم بەخێو بکەم و گەورەیان بکەم.
ت.پ