Navenda Nûçeyan – Li Misrê, Navenda Lêkolîn û Ramanên Jineolojiyê ji bo ku jin di warê nivîskarî, lêkolîn û analîzan de jêhatîbûnên xwe pêş bixin û pirsgirêkên civakî bi kûrahîtir çareser bikin, atolyeyeke sêrojî li dar xist.

Komxebata ku îro di çarçoveya înîsiyatîfa "Hibra Jinan" de tê lidarxistin, armanc dike ku hebûna jinan di warê nivîsandinê de xurt bike. Jinên ku bi nivîsandin û mijarên civakî re eleqedar dibin, tevlî komxebatê dibin.

Komxebat ji aliyê Mecîda el-Qadî, berdevka înîsiyatîfa "Women’s Ink" û rojnamevanekê ve hate birêvebirin. Roja ewil a komxebatê li ser rêziknameyên xebata nerm bû. Mecîda el-Qadî diyar kir ku xebata nerm divê ne tenê wekî xebata ji malê neyê hesibandin, lê belê divê pratîkên cûrbecûr ên wekî demjimêrên xebata nerm, hilbijartina rojên xebatê an şiftan û xebata ji dûr ve jî di nav xwe de bigire.

Mecîda el-Qadî tekez kir ku dema li ser rêziknameyên xebata nerm ji bo jinan tê nîqaşkirin, girîng e ku meriv bipirse ka ev model çiqasî piştgiriyê dide jiyana pîşeyî ya jinan. Wê destnîşan kir ku her çend xebata nerm di hin rewşan de dikare piştgir be jî, ew dikare berpirsiyariyên zêde jî biafirîne.

Wekî din, wê destnîşan kir ku şert û mercên xebatê ji pîşeyekî bo pîşeyekî diguherin û ev yek nîşan dide ku modelên cûrbecûr ên xebata nerm dikarin di hin pîşeyan de werin sepandin, lê yên din ji ber xwezaya kar bi sînorkirinan re rû bi rû ne.

Veguherandina pirsgirêkên civakî bo mijarên rojnamegeriyê

Di komxebatê de her wiha nîqaş li ser çawaniya veguherandina pirsgirêkên civakî bo mijarên rojnamegeriyê yên lêkolînbar û analîzbar hate kirin. Beşdaran agahdar kirin ku berî ku li ser her mijarekê encamên bilez werin derxistin, divê agahî ji çavkaniyên cûda werin berhevkirin û verastkirin.

Dr. Dîna Muhsîn, Seroka Navenda Raman û Lêkolînê ya Jineolojiyê, diyar kir ku armanca navendê ew e ku ji bo fêrbûna hevpar û parvekirina ezmûnan qadekê biafirîne. Wê destnîşan kir ku ew komxebat û lêkolînên li ser mijarên civakî li dar dixin û derfetê didin beşdaran ku ramanên di komxebatan de derdikevin pêş, veguherînin gotarên lêkolînê û naveroka weşanê.

‘Karê navendê ne tenê bi lêkolînê ve sînorkirî ye’

Dîna Muhsîn da xuyakirin ku xebata navendê ne tenê bi lêkolînê ve sînorkirî ye; ew armanc dikin ku bi organîzekirina perwerdehiyên di warên wekî nivîsandin, lêkolîn, xebata meydanî û polîtîkayên herêmî de kapasîteyên beşdaran baştir bikin.

Di komxebatê de her wiha têkiliya di navbera xebata nerm û zayendê de û rola wê di xurtkirina şiyana jinan de ji bo mayîna di nava hêza kar de (bi taybetî ji ber berpirsiyariyên wan ên malbatî) hate nîqaşkirin. Beşdaran tekez kirin ku polîtîkayên kar ên bi vî rengî divê barên giran li ser jinan barnekin an jî pêşveçûna wan a pîşeyî asteng nekin.

Komxebata sêrojî dê beşdaran di warê veguherandina pirsgirêkên civakî bo mijarên rojnamegeriyê, formulekirina pirsên lêkolînê, destnîşankirina komên armanc û meşandina lêkolînên meydanî de perwerde bike. Perwerde dê her wiha girîngiya verastkirina agahiyan û berçavgirtina aliyên aborî di analîzên civakî de careke din bîne ziman.