MEDÎNE MAMEDOGLU

Mereş - Piştî du erdhejên ku navendên wan Mereş û Dîlok bûn, li 10 bajaran bi hezaran malan rûxiyan, bi dehezaran mirovan jiyana xwe ji dest dan, bi hezaran jî birîndar bûn. Kesên ku ji erdhejê rizgar bûne jî di nava sir û seqemê de rojên zehmet derbas dikin. Yek ji van kesan jî Hatîce Kaşikduzen a li Bazarcixê ye. Hatîce Kaşikduzen, di dema erdhejê de bi zarokên xwe re ji malê rizgar kiriye, bi zarokên xwe re li kolanan di bin naylonan de bi betaniyeyan li ber xwe didin.

‘Jixwe her tişt diyar bû’

Hatîce Kaşikduzen da zanîn ku hewa gelek serma ye û wiha domand: “Em ê xwe ji sermayê biparêzin, zarokên xwe biparêzin, xwe ji erdhejê biparêzin em jî nizanin. Ev ne erdhej e, felaket e. Êdî tu gotin nemaye, rewş gelek xirab e. Gelek mirov di bin avahiyên rûxiyayî de ne, cenaze li erdê ne. Rizgarkirina kesek pir girîng e ji bo me. Gelek kesên min ew nas dikirin jiyana xwe ji dest dan. Her tişt xuya ye. Malên me bûn xwelî, gelek xizmên me mirin.”

‘Zarokên me ji tirsê ranazên’

Hatîce Kaşikduzen got ku derûniya zarokên wê xirab bûye û wiha domand: “Ez zarokên xwe carÊ dibin cihekî. Dema ku dengê wesayîd û kepçeyan tê ji tirsê dilerizin. Dixwazin em ji vê derê biçin, nikarin razên. Ez û hevjînê xwe heta serê sibehê li ber serê wan in. Cîrana me jî di heman rewşê de ye bi tenê ye me xwe spartiye hev û hewl didin destek bidin hev.”

Bertek nîşanî AFAD’ê da

Hatîce Kaşikduzen diyar kir ku di rojên destpêkê yên erdhejê de tu alîkarî ji wan re nehatiye û wiha bi dawî kir: “Komên lêgerîn û rizgarkirinê pir dereng hatin. Roja destpêkê heta êvarê tiştek nekirin. Pir dereng dest bi xebatê kirin. Her wiha AFAD’ê konan neda me. Dema em çûn me xwest, nasnameya me û îmze ji me xwestin. Dûre jî ji me re gotin; ‘li bendê bin dema dora we hat em ê bidin we’. Ji bo vê jî mirovan dixin dorê di vê sir û seqemê de. Di vê sermayê de em ê li benda çi bin.”