میهرەبان سەلام کاکەیی

هەڵەبجە- گەرەکێکی شاری هەڵەبجەیە و ژمارەیەکی زۆر لە ژنان بۆ دابینکردنی بژێوی ژیانیان خەریکی نان کردنن، ئەوەی جێگەی سەرنجە ئەو گوزەرە بووە بە گوزەری ژنانی نانکار و ئەو ژنانە دەتوانن نانی بەشێکی زۆر لە دانیشتوانی هەڵەبجە دابینبکەن.

 

خونچە و لەیلا دوو نمونەی گوزەری ژنانی نانکارن لە هەڵەبجە، ئەم دوو ژنە ڕەنجکێشە داوا لە ژنان دەکەن کە لە کارکردن بەردەوام بن.

 

 داوا دەکەین کوشتنی ژنان بوەستێنرێت

لەیلا عەلی، بە دەم نانکردن و بەڕێکردنی کڕیارەکانییەوە باسی لەوەکرد ٨ی ئادار ڕۆژی ژنانە بەڵام لەو ڕۆژەدا سوکایەتی بە ژنان دەکرێت و دەکوژرێت، "سوکایەتی کردن بە ژنان هی ئێستا نییە، بەڵکوو لە پێشینانەوە بۆ ئێستا هاتووە و هەر ژنێک لە کۆندا کچی بووبێت وتویانە دواڕۆژی ڕوون نییە، بەڵام ئێستا بە پێچەوانەوەیە، ژن سەرجەم پایەکانی ژیانیان گرتووە و ژنمان هەیە حاکمە، هەیە سەرۆکی پەرلەمانە و مامۆستایە، ژن رەنجکێشە".

 

منداڵ لە هێلانەکەی هاتە دەرەوە جیاوازی نییە نێر بێ یاخود میێ

لەیلا عەلی قسەمان بۆ دەکات و نمونەیەکی پەندی پێشینان دەهێنێتەوە کە دەڵێت "ژن لە لانەکەی هاتە دەرەوە جیاوازی نیە نێر بێ یاخود مێ"، واتە ژن توانای کارکردنی هەیە، لەیلا عەلی دەربارەی کاری ڕۆژانەی خۆیان قسە دەکات کە دووی شەو دێن بۆ کارکردن و تا ١٢ی نیوەڕۆ بەردەوام دەبن، دەشڵێت تا کڕیار هەبێت دەست لە کار هەڵناگرن، "ئیشکردنمان قورسە بەڵام توانامان هەیە و دەیکەین".

 

"ئێمە بەهێز و ڕۆشنبیرین و بەردی بناغەی خێزانین، شیرازەی خێزان لە دەست ئێمەی ژنە، ژنمان هەبووە دوانزە منداڵی پەروەردە کردووە بە ئێستاشەوە، بۆیە پێویست ناکات هێرشی بکرێتە سەر و سوکایەتی پێبکرێت".

 

خونچە مەحمود، لەگەڵ لەیلادا پێکەوە کاردەکەن، باس لەوەدەکات بەردەوام کاریکردووە تا بژێوی ژیانی خۆی دابیبکات، "تەنانەت لە پێش کیمیابارانکردنی هەڵەبجە کڵاشم چنیوە و شاڵم ڕستووە و کاری دەرەوەم کردووە، لە کاتی گرانیشدا گوڵچنیم کردووە".

 

خونچە لە هیچ سەردەمێکدا لە کارکردن دانەبڕاوە

خونچە باس لە پێش کیمیابارانکردنی هەڵەبجە دەکات ڕوویان لە شاخ و کێوەکانی هەڵەبجە کردووە، سەردەمێک بۆ پەیداکردنی خواردن و بژێوی ژیانی تا کاتژمێرە درەنگەکانی شەو کڵاش چنی کردووە، لە دوای ئاوارەبوونیان بۆ ڕۆژهەڵاتی کوردستان شاڵی چنیوە، هەموو ئەمانەش لەپێناو لەسەر پێ وەستانی خۆی بووە، "لە ساڵی ١٩٨٥ەوە خەریکی کارم بە بێ وەستان، ئێستاش خەریکی نانکردنم لەم گوزەرەدا".

 

ت.پ