ڕۆژنامەنووسێکی یەمەن تیشک دەخاتەسەر ئەزموونی سەرکەوتنەکانی کەسانی خاوەن پێداویستی تایبەت

ڕۆژنامەنووسی یەمەنی نەعائم خالید، لە ڕێگەی بەرنامەکەیەوە بە ناوی 'خەباتی ئیلهامبەخش'، تیشک دەخاتە سەر ژیان و چیرۆک و ئەزموونی سەرکەوتنەکانی کەسانی خاوەن پێداویستی تایبەت و ئامانجی تێکدانی چەشنە کۆنەپەرستییەکانی کۆمەڵگە.

فاتمە ڕەشاد

 

یەمەن- ڕۆژنامەنووس نەعائم خالید لە ڕێگەی بەرنامەکەیەوە بە ناوی 'خەباتی ئیلهامبەخش'، بەسەر سەختییەکاندا زاڵ بووە و هەوڵ بۆ ڕاپۆرتکردنی ئەزموونی کەسانی خاوەن پێداویستی تایبەت دەدات، ئەم بەرنامەیە ئامانجی ئیلهامبەخشین و بەهێزکردنی کەسانی خاوەن پێداویستی تایبەتە بۆ گەیشتن بە ئامانج و خەونەکانیان.

 

ئەو بەرنامەیەی کە نەعائم خالید دەیەوێت پێشکەشی بکات، تەنیا لە سەختییەکاندا سنووردار نییە، بەڵکو چیرۆکی سەرکەوتنی کەسانی خاوەن پێداویستی تایبەت دەهێنێتە سەر شاشە، کە چۆن بە بڕیاری بەهێز کارەکانیان بونیاد ناوە و چۆن لە ڕێگەی ئەو ئەرکە بچووکانە سەرکەوتنیان بەدەستهێناوە، ئەم بەرنامەیە ئەو هۆشیارییە بەرەوپێش دەبات کە کەسانی پێویست، وەک تاکێک کە بە کاتە سەختەکاندا تێپەڕیون، وەک تاکی بەرهەمدار لە کۆمەڵگەدا دەناسرێنەوە. بەرنامەی 'خەباتی ئیلهامبەخش' لە مانگی ئاداردا لە کەناڵی تەلەفزیۆنی ئەدان تیڤی یەمەن پەخش دەکرێت.

 

'بەرنامەکە تیشک دەخاتە سەر چیرۆکی کەسانی خاوەن پێداویستی تایبەت'

نەعائم خالید ئاماژەی بەوەشکرد، بەرنامەکەیان تیشک دەخاتە سەر چیرۆکی سەرکەوتنی کەسانی خاوەن پێداویستی تایبەت و پابەندبوونیان بۆ گەیشتن بە بینەران لە ڕێگەی ئەم بەرنامەیەوە بە شێوەیەکی ناوازە. نەعائم خالید وتی: ئەم بەرنامەیە نوێنەرایەتی پیشەی میدیایی من دەکات، کوالیتی بەرهەمهێنان لە بەرنامەکەدا یەکێکە لە هۆکارە گرنگەکانی سەرکەوتنی، وێنەگرتن و دیزاینی سێتی بەرنامەکە لەلایەن ژنانی ڕۆژنامەنووسانەوە ئامادەکراوە، تیمی بەرنامەکە زۆرتر ژنانن.

 

'بەرنامەکە ئیلهام بەخشە بۆ ئەو کەسانەی کە پێویستی تایبەتیان هەیە'

نەعائم خالید ئاماژەی بەوەدا کە ئەم بەرنامەیە ئیلهامبەخشە بۆ کەسانی خاوەن پێداویستی تایبەت بەتایبەتی ژنان و وتی: ئەم بەرنامەیە بەرنامەیەکی ئاسایی نییە، ئیلهامبەخش و بەهێزکردنی کەسانی خاوەن پێداویستی تایبەتە. ئەم بەرنامەیە تیشک دەخاتە سەر هێزی ئیرادەی مرۆڤ و ئەو سەرکەوتنانەی کە لە سەختترین بارودۆخدا بەدەست هاتوون، جەخت لەسەر ژنان و بەردەوامییان لە بەدیهێنانی خەونەکانیان دەکاتەوە.