دایکانی عەفرین لە کامپەکانی کۆچبەریدا بەهۆی هاتنی زستانەوە ڕووبەڕووی دژواری دەبنەوە، ئاماژە بەوەدەدەن کە لە چادری نایلۆندا دەژین، یەک ئامانجیشیان هەیە ئەویش گەڕانەوەیە بۆ عەفرین بە شكۆداری.

 

شیرین عەلی

شەهبا- دوای داگیرکردنی عەفرین لەلایەن چەتەکانی دەوڵەتی تورکیاوە، دانیشتوانەکەی ئاوارەبوون و نزیکەی چوار ساڵە لەناو کەمپەکانی کانتۆنی شەهبا نیشتەجێ بوون و ڕووبەڕووی زۆری و زەحمەتی بوونەتەوە، هەموو هیوای عەفرینییەکان لەناو کەمپەکاندا، گەڕانەوەیانە بۆ عەفرین بە شکۆدارییەوە.

 

لە کامپەکاندا ژیان لەناو چادرە نایلۆنەکاندا تێدەپەڕێت، ئەو چادرانە منداڵان لە سەرمای زستان ناپارێزن، دایکانیش دەربارەی ژیان و ئامادەکارییان بۆ زستان بۆ نوژنها دوان.

 

"شارەوانی بەردەوامە لە کارکردن بۆ خزمەتی گەل"

خەدیجە عەبدۆ، کارمەندی شارەوانی کامپی بەرخۆدان لە ناوچەی فافین-ی کانتۆنی شەهبا ئاماژە بەوەدەکات کە پێداویستیەکانیان بۆ هاوڵاتیان ئامادە دەکرێت، "ئێستا ئامادەکاری دەکەین بۆ وەرزی زستان، بەرد و چیمەنتۆ و خاک و چادرمان داوەتە هاوڵاتیان تا چادرەکانیان چاک بکەن و ماڵەکانیان ئامادە بکەن و لە سەرمای زستان پارێزراو بن، لە داهاتوویەکی نزیکدا ئامادەکارییەکان تەواو دەکەین، لە کەمپەکەدا ڕێگا دروستدەکەین بۆ ئەوەی ڕێگە و قوڕ و ئاو دروستنەبێت، هەروەها بەردەوامیشین لە ڕێکخستن بۆ بنیاتنانی کۆمەڵگایەکی ئازاد.

 

"گەمارۆ ژیانمان قورس دەکات"

فیدان مەمۆ، خەلکی گوندی شۆربەیە لە ناوچەی مابەتە و ماوەی چوار ساڵە لە کامپی بەرخۆدان دەژی، دەربارەی ژیانیان دەڵێت: "بەهۆی شەڕەوە لە کامپ دەژین، ژیانمان زەحمەتە، لە سەرەتای هاوین و زستاندا ڕووبەڕووی قورسی دەبینەوە، شارەوانی چەندین پزیشکی هێناوە و ڕێگەکان چاک دەکەن، داوا لە نەتەوە یەکگرتووەکان دەکەین کە پێویستیەکانی گەل دابیبکات و چارەسەری بدۆزنەوە، ئەو گەمارۆیەی لەسەرمانە ژیانی منداڵان و خەڵکی مەدەنی دەخاتە مەترسییەوە".

 

ڕۆشنا خەلیل، دایکی دوو منداڵە و زۆزان ڕەشید دایکی پێنج منداڵە، باس لەوەدەکەن کە ژیانیان بە دژواری تێدەپەڕێنن و بە هاتنی زستانیش ڕووبەرووی سەرما و نەبوونی پێداویستی دەبنەوە، داوا لە نەتەوە یەکگرتووەکان و ڕێکخراوەکانی مافی مرۆڤ دەکەن کە خاوەنداری لە خەڵکی مەدەنی بکەن".

 

ت.پ