ناوەندی هەواڵ

 

لە کۆنگرەیەکی ڕۆژنامەنوسیدا عەبدول باکی حەقانی، وەزیری خوێندنی باڵای تاڵیبان مەرجەکانی تایبەت بە خوێندنی ئەمساڵ ڕاگەیاند و سەرەکیترین مەرجیان تێکەڵ نەبوونی ڕەگەزەکانە.

 

ئاماژەی بەوەدا، ئەو ژنانەی خوازیاری تەواوکردنی خوێندنن دەبێت پابەندی ئەو یاسایانە بن کە بۆیان دادەنرێت لەوانە لەبەرکردنی پۆشاکی ئیسلامی و جیابوونەوەی هۆڵەکانی خوێندنیان لەگەڵ ڕەگەزی نێر.

 

هەروەها وتی: "تێکەڵکردنی ڕەگەزەکان لە دامەزراوە پەروەردەییەکان پێچەوانەی بنەما ئیسلامییەکان و بەهاکانی دەوڵەتە هەروەها دژی نەریت و بزووتنەوەی تاڵیبانە، هەر بۆیە دەبێت مامۆستای ژن بۆ خوێندکارانی ژن دابمەزرێت و مامۆستای پیاو بۆ خوێندکارانی پیاو دابمەزرێت".

 

لەماوەی بەڕێوەبردنی ئەفغانستان لەلایەن تاڵیبانەوە لە ساڵانی ١٩٩٦ بۆ ٢٠٠١دا ژنان لە کایە جیاوازەکانی ژیاندا وەک خوێندنی زانکۆ و قوتابخانەکان، لە وانەی مۆسیقا بێبەشکرابوون.

 

وەزیری خوێندنی باڵای تاڵیبان ئاماژەی بەوەشدا لە دوای ساڵی ٢٠٠١وە پەروەردەی ئەفغانستان لە مەترسیدابووە، بۆیە لە پاش گەڕاندنەوەیان دەڵێت: "پێویستە ئەو کارەساتانەی بەسەر خوێندندا هاتووە چارەسەرییان بۆ بدۆزینەوە".

 

بە پێی زانیارییەکانی نوسینگەی مافی مرۆڤی نەتەوە یەکگرتووەکان، بەشداربووانی خۆپیشاندانەکانی ئەفغانستان کە داوای مافی ژنانیان دەکرد بە تایبەت بۆ پەروەردە و کارکردن، لەلایەن چەکدارانی تاڵیبانەوە دەستدرێژیان کراوەتە سەر و ئەشکەنجە دراون.