ئاوارەکانی عێراق چی دەڵێن دەربارەی مەترسی کامپی هۆل؟
هێزەکانی ئاسایشی ناوخۆ بە هاوکاری یەپەژە و قەسەدە قۆناغی دووەمی ئۆپەراسیۆنی مرۆیی و ئەمنییان دەستپێکرد. ئاوارەکانی عێراق بە شێوەیەکی ناڕوون قسەیان لەسەر ئەم ئۆپەراسیۆنە و مەترسی شانە نووستووەکانی داعش کرد.
سۆرگول شێخۆ
حەسەکە- کامپی هۆل کە لە پەنابەرانی عێراقی و پەنابەرانی سووری و بنەماڵە و هاوژینەکانی داعش پێکهاتووە، دەکەوێتە ٤٥ کم لە ڕۆژهەڵاتی شاری حەسەکە لە باکوور و ڕۆژهەڵاتی سوریا. دوای ئەوەی لە ٢٣ی ئاداری ٢٠١٩ باهۆزی دێرەزۆر لەلایەن شەڕڤانانی هێزەكانی سوریای دیموكرات-قەسەدە رزگاركرا، ئەو خێزانانەی خۆیان رادەستی هێزەكانی قەسدە كردبوو، گواسترانەوە بۆ كەمپی هۆل. رۆژی ٢٨ی ئاداری ٢٠٢١، هێزەكانی ئاسایشی ناوخۆ بەهاوكاری یەكینەكانی پاراستنی ژن-یەپەژە و هێزەكانی سوریای دیموكرات-قەسەدە، دەستیان بە "ئۆپەراسیۆنی مرۆیی و ئەمنی" كرد لەسەر بنەمای بەرقەراركردنی ئارامی و ئاسایش لە كامپەكە و رێگریكردن لە کوشتنی ژن و هاوڵاتیان.
بەهۆی زۆری کوشتنی ژنان و هاوڵاتیانەوە، هێزەکانی ئاسایشی ناوخۆ و یەپەژە و قەسەدە دوێنێ، ٢٥ی ئاب قۆناغی دووەمی ئۆپەراسیۆنی مرۆیی و ئەمنییان دەستپێکرد، لە بارەی دۆخی کامپەکەوە پەنابەرانی عێراقی لەناو هۆل بۆ نوژنها قسەیان کرد.
"ناتوانین لەگەڵ کەس گفتوگۆ بکەین، سنووری ئێمە بازاڕە و هەر ئەوە"
ئایە خەڵکی شاری موسڵی عێراقە و ماوەی ٥ ساڵە لە قۆناغی یەکەمی کامپەکەدا دەژی کە بەشی ئاوارەکانی عێراقە. سەبارەت بە دۆخی کامپی هۆل و ئەو ڕووداوانەی تێیدا ڕوودەدەن، دەڵێت: ئێمە گوێمان لە کوشتن لە ناو کامپەکە دەبێت. کێ ئەو جۆرە ڕووداوانە لە دەرەوەی داعش و شانەکانیان ئەنجام دەدات؟ ئەو ئۆپەراسیۆنەی کە هێزەکانی ئاسایشی ناوخۆ دەستیانپێکرد زۆر باشە، چونکە ئێستا کامپەکە پاککراوەتەوە لە کەسانێک کە کاری خراپ دەکەن، دەمانەوێت خێزانەکانی داعش لێرە بڕۆن، ئێمەش لە ڕۆژانی داهاتوودا دەڕۆین و دەگەڕێینەوە بۆ وڵاتەکەمان، ئێمە تەنها بۆ پێداویستیەکان دەچینە بازاڕ و دەگەڕێینەوە چادرەکانمان، زۆر لە ژنانی داعش و خێزانەکانیان دەترسین، بۆیە ناتوانین بە ئازادی بجوڵێینەوە، ناتوانین بچینە ناو دیالۆگ لەگەڵ کەس، سنووری ئێمە بازاڕە و ناوێرین زیاتر بڕین.
ڕووداوەکانی کوشتن و دەستدرێژیکردنە سەر منداڵان و ڕفاندنی منداڵان
جەواهیر میدی ئاوارەیەکی عێراقە، ٤ ساڵە لەگەڵ خێزانەکەی لە کامپەکە دەژین. سەبارەت بە دۆخی ئەمنی کامپەکە و ئەو ناسەقامگیرییەی کە تێیدا دەژین، وتی: کاتێک هێزەکانی ئاسایشی ناوخۆ دەبینین هەست بە ئارامی دەکەین، بەڵام لەناو کامپەکەدا ئارامی نییە، بە تایبەت لە حاڵەتەکانی کوشتن و دەستدرێژی و ڕفاندنی منداڵان زۆرن، ئێمە بڕیارە بگەڕێینەوە عێراق و بێ سەبرین بۆ ئەوە، ئەو ئۆپەراسیۆنەی کە ئاسایشی ناوخۆ دەستیپێکردووە، زۆر دڵخۆشین پێی و هیواخوازین بەردەوام ئۆپەراسیۆن هەبێت، چونکە ئێمە ئاشتی و ئاسایشمان دەوێت. ئێمە بەهۆی شەڕەوە هەڵاتین و هاتینە ئێرە، و دەمانەوێت هێزەکانی ئێرە ئاشتی دابینبکەن.
"لەگەڵ کەس ناچینە ناو گفتوگۆوە"
ئیبتیسام محه‌مه‌د خه‌ڵكی شاری سه‌ڵاحه‌دینی عێراقه، هۆكاری هاتنی بۆ ئێره به‌م شێوه‌یه‌یه: "شه‌ڕێك له نێوان حه‌شدی شەعبی و چه‌ته‌كاندا هه‌بوو، به‌هۆی ئه‌وه ناچار بووین له‌وێ وه‌ك خه‌ڵكی مەدەنی لەگەڵ منداڵەکانماندا کۆچ بکەین، لەو کاتەوە تەنانەت لێرە لە کامپەکەش پەیوەندیمان لەگەڵ کەس نییە و بێدەنگ ژیان بەڕێدەکەین، دەرگامان داخستووە و لەگەڵ کەسدا گفتوگۆ ناکەین، ئێمە بۆ منداڵەکانمان دەترسین کە شتێکی هەڵە فێرببن، ئەمەش هۆکارێکە بۆ ئەوەی لەگەڵ کەسدا ناچینە ناو گفتوگۆوە.
"کەس نازانێت لە ژێر ئەو جلە ڕەشەدا چی ڕوودەدات"
حه‌مدیه محه‌مه‌د له هاوژینەکانی داعش و ئه‌و هه‌ڕه‌شانەی کە دەیکەن ده‌ترسێت و ده‌ڵێت: من ٥ ساڵه له كا‌مپه‌كه‌دا ده‌ژیم، ڕۆژ و ساڵه‌كانی پێشوو زۆر باش و ئارام بووین، به‌ڵام ئه‌م ساڵانه‌ی دوایی ژمارەیان زۆر بووە و بۆ ئێمە خراپ بوون، هەموومان جلی ڕەش لەبەردەکەین، بەڵام کەس نازانێت لە ژێر ئەو کراسەدا چی ڕوودەدات، ئەمساڵ کامپەکە بەجێدەهێڵین، دەگەڕێینەوە بۆ وڵاتەکەمان، بەڕاستی چاوەڕێی گەڕانەوەم، دەمەوێت لە عێراق ژیانی ئاسایی خۆم بژیم، دەمەوێت چاندنی بکەم و زەویەکانم کشتوکاڵ بکەم، دەمەوێت هەموو ئەو شتانە لەبیر بکەم کە لێرە ڕوویانداوە، نامەوێت هیچ لەو یادەوەری و ڕووداوانە هەڵبگرم کە لێرە ژیاوین.
"پیاو و ژن دەکوژرێن، بەڵام هۆکارەکەی چییە؟ کەس نازانێت"
پەنابەرێکی دیکەی عێراق دەڵێت: هیوام ئەوەیە سووریا بەجێبهێڵم و بچمەوە عێراق، دەمەوێت هەموو ئەو ساڵ و مانگ و رۆژانە لەبیربکەم کە لە سووریا بەسەرم بردووە، دەبیستین ژنێک یان پیاوێک کوژراوە. بەڵام هۆکارەکەی نازانرێت، لێرە کوشتن و برسێتی هەیە، دەمەوێت بچمەوە و منداڵەکانم پەروەردە بکەم.